Archives de la catégorie: Toriteny

Toriteny alahady maraina na fanompoam-pivavahana hafa

1 Petera 2:9 : « Fa ianareo kosa dia taranaka voafidy, "fanjaka-mpisorona, firenena masina" (Eks. 19.6), olona nalain'Andriamanitra ho an'ny tenany mba hilazanareo ny hatsaran'ilay niantso anareo hiala tamin'ny maizina ho amin'ny fahazavany mahagaga ».

Petera nanoratra an’ity Epistily ity ho an’ny Fiangonana tany Asia minora, any Turquie amin’izao fotoana. Turquie tapany avaratra sy atsinanana no nanoratany an’io, ho an’ireo kristiana mpino nandray an’i Jesoa Kristy tany. Petera mbola tsy tany, fa vokatry ny asa fitoriana ny filazantsara nataon’i Paoly sy ny namany no nahatonga ny Fiangonana nitsangana tamin’iny faritra Asia minora iny. Fa naninona i Petera no nanoratra ho an’ireo Fiangonana ireo ? Noho ny zava-nisy tany, noho ny fahafantaran’i Petera ny zavatra nanjo ny krisitiana tamin’iny faritra Asia minora iny. Fa inona no nanjo ny kristiana tamin’izany faritra izany ? Noeson’ny mpiara-monina taminy izy. Inona no nahazo ireo kristiana tany ? Ampangain’ny olona ho mpanao ratsy ireo kristiana ireo. Inona no nahazo ireo kristiana ireo ? Mitatao aoban-dohany ny fanenjehana mamaivay ho an’ny fivavahana kristiana. Dia ireo zavatra telo ireo no nahatonga an’i Petera nanoratra ho an’ireo Fiangonana niely patrana tany Asia minora ireo. Fanesoana ny fijoroan’ireto kristiana ireto, noesoesoan’ny fiaraha-monina izy ; ny fahasahiany nijoro amin’ny fahamarinana, amin’ny fahamasinana, dia naratsian’ny olona ny fiainany. Ary satria niroborobo ny fivavahana kristiana dia nenjehina, nopotehina, noravàna izany. Dia nanoratra i Paoly, nanoratra i Petera, ary eo no ahitana hoe isikabna dia maro aza dia iray ihany ao amin’ny Tompo. Marina fa asan’i Paoly ny tany, asan’ireo mpiara-miasa amin’i Paoly ny tany, fa nahatsiaro i Petera manana adidy amin’ny vahoakan’Andriamanitra, amin’ny tontolon’ny kristiana, dia nanoratra izy. Paoly nantsoina hitory amin’ny jentilisa, Petera hitory amin’ny jiosy. Ary izay angamba no nahatonga an’i Petera , raha nanoratra, dia nampitahainy tamin’ilay jiosy fahiny ireto kristiana niova fo, lasa mpanaradia an’i Kristy ireto, ka nahatonga azy nanao fanoharana hoe : « Fa ianareo kosa dia taranaka voafidy, "fanjaka-mpisorona, firenena masina" (Eks. 19.6), olona nalain'Andriamanitra ho an'ny tenany mba hilazanareo ny hatsaran'ilay niantso anareo hiala tamin'ny maizina ho amin'ny fahazavany mahagaga ». Ary ao anatin’io andalan-tsoratra Masina io dia misy kian-teny anankiroa : ny kian-teny voalohany dia hoe : « FA » ; ary ny kian-teny faharoa dia hoe : « MBA ». Maninona moa ireo kian-teny ireo no ampiasaina matetika ? Ampiasaina ny kian-teny hoe : « Fa » rehefa anambara fiavahana na fiovana ; ary ambara ny kian-teny hoe « mba » rehefa miantso na mitaona ny olona ho amin’ny zavatra na asa takiana ataony. Dia ireo zavatra roa ireo no hojerevantsika amin’ity anio ity : ilay « fa » sy ilay « mba ». Inona ilay « Fa » ? Ilay fiavahana. Inona ilay « Mba » ? Ilay zavatra andrasana na takiana vokatr’ilay fiavahana.

Izao no zavatra nambaran’i Petera :« Fa ianareo kosa dia taranaka voafidy, "fanjaka-mpisorona, firenena masina" (Eks. 19.6), olona nalain'Andriamanitra ho an'ny tenany ». Inona ireo fiavahana 4 ireo izay nambaran’i Petera ho an’ireto olona nandray ny filazantsara nanaiky an’i Jesoa Kristy ho Tompo sy Mpamonjy ny fiainany?

1. Taranaka voafidy

Tahaka ny taranak’i Abrahama voafidy, tahaka an’i Isaka voafidy, tahaka an’i Jakoba voafidy : taranaka voafidy. Ny fifidianana dia izao : misy maro eo, fa misy sintomina na avahana nofidiana tao anatin’ny maro. Ary izany taranaka voafidy izany dia ho an’Andriamanitra, hiaina hiaraka amin’Andriamanitra, hanao ny sitrapon’Andriamanitra. Dia izay no tenenin’i Petera : taranaka voafidy ianareo ; ianareo izay tsy firenena akory taloha, izay tsy olon’Andriamanitra ; nofidian’Andriamanitra ianareo noho ny amin’i Jesoa Kristy.

Ry havana malala ao amin’ny Tompo, mba hazonao an-tsaina ve izany hoe taranaka nofidin’Andriamanitra izany ? Ny mampiavaka izany ? Ny maha-sarobidy izany ? Fa matoa tonga eto koa ianao, dia taranaka voafidy. Ary raha taranaka voafidy ianao, dia mila mijery ny fiainanao miaraka amin’Andriamanitra, ary mila mampita ny fiainanao amin’Andriamanitra ho an’ny taranakao ihany koa. Kanefa izao no tadidio : raha tsy miverina amin’i Dada ianao, tsy afaka mitsinjo ny zanaka amam-para, dia tsy ahazo hery vaovao. Fa rehefa miverina amin’Andriamanitra ianao, Dada, dia hitsinjo ny taranakao ianao, ny zanaka amam-paranao, taranaka voafidy, dia hahazo hery vaovao mandrakariva ny fiainan’ny ankohonanao. Fa firy ny fiainan’ny ankohonana tsy misy hery vaovao intsony ? Firy ny fianakaviana ankehitriny miaina ao anaty fijaliana ?  Fa ataovy devoir enti-mody fa tsy devoir mody entina, ny Salamo 78, amin’izany hoe taranaka voafidy izany. Salamo 78:1-7 : «Henoy ny lalàko, ry oloko; atongilano ny sofinareo amin'ny tenin'ny vavako. Hiloa-bava hilaza fanoharana aho; hanonona teny saro-pantarina fony taloha aho. Izay efa rentsika sy fantatsika,ary nambaran'ny razantsika tamintsika, Dia tsy mba hafenintsika amin'ny zanany; fa hambarantsika amin'ny taranaka ho avy ny fiderana an'i Jehovah sy ny heriny ary ny fahagagana izay efa nataony. Fa nanorina teni-vavolombelona teo amin'i Jakoba Izy, ary teo amin'Isiraely no nametrahany lalàna, izay nandidiany ny razantsika, hampahafantariny ny zanany; Mba hahafantatra izany ny taranaka ho avy - dia ny zaza mbola hateraka - ka hitsangana hitory izany amin'ny zanany kosa, Mba hametraka ny fanantenany amin'Andriamanitra, ka tsy hanadino ny asany, fa hitandrina ny didiny ». Izany ny taranaka voafidy : mampita fanilo ho an’ny zanany taranaka voafidy. Ny lova tsara indrindra avelanao ho an’ny zanakao, dia Jesoa Kristy. Jesosy irery ihany, ilay filazantsara soa, no lova tsara indrindra apetraho amin’ny taranakao. Torio amin’ny zanakao izany, ambarao aminy fa na ny zaza mbola hobavy aza mila ampahafantarina izany. Ny tena zava-doza amin’ny fivavahana kristiana, tsy ny firongatry ny slamo, tsy ny athéisme, tsy ny matérialisme, fa ny tena zava-doza indrindra amin’ny fiainana kristiana dia ny tsy fampitàna ny finoana amin’ny taranaka mandimby. Fa rehefa tsy miampita io, dia miova ny tantara. Lyban anie firenena kristiana e, 50 taona lasa izay ;75 taona lasa tany aloa tany, kristianisme no nanjaka ; fa amin’izao fotoana manao ahoana ? Mivadika ny tantara satria tsy niampita tamin’ny taranaka ilay hoe nofidianan’Andriamanitra antsika ao amin’i Jesoa Kristy. Jereo Angleterre, ny fitoriana ny filazantsara taty amintsika ; fa amin’izao any Angleterre, raha Fiangonana ohatran’izao, dabilio no betsaka noho ny olona. Satria maninona ? Tsy miampita amin’ny taranaka ilay fifidianan’Andriamanitra, ilay famonjen’Andriamanitra, ilay fitiavan’Andriamanitra. Fihavanana voalohany : taranaka voafidy ianao. Voafidy hanao inona ? Ho an’Andriamanitra ao amin’i Jesoa Kristy.

2. Fanjaka-mpisorona

Tsy ny rehetra no mpisorona fa ny taranak’i Levy . Fa na tao amin’ny zanak’Isiraely aza, mbola nisy nofidiana manokana, diabny taranak’i Levy.

Inona moa no tena antom-pisian’ny mpisorona ? Nanaompo an’Andriamanitra ; hitondra am-bavaka ny olona eo anatrehan’Andriamanitra. Ka raha fanjaka-mpisorona isika, inona no antom-pisiantsika ? Raha izaho sy ny ankohonako, dia hanompoban’i Jehovah izahay. Raha fanjaka-mpisorona ianao, dia antsoin’Andriamanitra ianao hanompo Azy. Ary amin’Andriamanitra, tsy misy an’izany hoe avia dia matoria, fa ao amin’Andriamanitra diabizao : Avia dia mitoria. Tsy miantso ny olona ho spectateur Andriamanitra, fa niantso ny olona ho acteur rehefa miaraka Aminy. Ka raha fanjaka-mpisorona ianao, dia izao no mila tadidiana hoe : ny hanompo an’Andriamanitra no niantsoan’Andriamanitra anao.

Ry havana malala ao amin’ny Tompo, fanjakana inona ianao ? Fa ny fanjaka-mpisorona dia manokana ny fiainany ho an’Andriamanitra. Ny fanjaka-mpisorona dia nivavaka mitondra ny olona teo anatrehan’Andriamanitra. Fa raha fanjaka-mpisorona ianao, mbola misy ve ny fiaraha-mivavaka ao an-trano ? Sa misy ihany fa ilay in-3 isan’andro ? Indraindray ary hoe indray mandeha isan’andro, satria maninona ? Tsy miara misakafo intsony ny maraina, tsy miara misakafo intsony ny hariva , fa ny hariva ihany vao manao hoe : « Atreho ny sakafonay, Jehovah Mpanome ny soa, velominao ny tenanay, ny sainay hatanjaho koa. Amin’ny anaran’i Jesoa Kristy no angatahinay izany. Amena ». Fa raha fanjaka-mpisorona ianao, atsangano ao an-trano indray ny fiaraha-mivavaka. Ajanony ny télé, esory ny téléphone :makà fara-faharatsiny 5mn ho an’ny ankohonana, raha fanjaka-mpisorona ianao.

Fa raha fanjaka-mpisorona koa ianao dia manana soatoavina lalaina : fa ny soatoavin’ny mpisorona, fara-fahakeliny, anaky telo :

1. Fahamasinana : ary izay no nahatonga ilay Malakia teo : « Raha Ray Aho, aiza ary izay hajako ? Raha Tompo Aho, aiza ary izay tahotra Ahy ? ». Ry havako, raha fanjaka-mpisorona ianao, soatoavina manao ahoana no lalainao ao an-trano ? Fa ny soatoavin’ny fanjaka-mpisorona dia fahamasinana. Manao ahoana ny fiainam-pahamasinana ? Fa rehefa ety ivelany ny olona masimasina daholo, fa rehefa ao an-trano, mba manao ahoana ?
2. Fanompoana : raha nifidy anao Andriamanitra, ny fiainana nifidianany anao dia hanompo fa tsy ho tompoina. Ary izany no olana ankehitriny : te hotompoina daholo ny olona rehetra. Fa raha miaraka amin’i Kristy ny olona dia izao, hoe : ny fiainana miaraka amin’i Kristy dia fanompoana.
3. Fitiavana :fitiavana an’Andriamanitra ary fitiavana ny olona manodidina.

Ry havana, mbola manjaka ve ny FFF ao an-trano ? Mbola mipetraka tsara ve ny 3F ? Ka ts’ilay hoe mipetraka ihany fa tsy iainana ? Fa ny soatoavin’ny fanjakan’Andriamanitra, fanjaka-mpisorona dia fahamasinana, fanompoana ary fitiavana.

3. Firenena masina

Ny dikan’ny hoe « masina » dia izao : « mis à part », voatokana. Ary ny firenena natokan’Andriamanitra, tahaka ny firenen’Isiraely, dia manana lalàna manokana, manana fitondran-tena manokana, manana vina manokana. Ka raha firenena masina isika, aoka ny lalàn’Andriamanitra no itondranao ny fiainanao eo anivon’ny ankohonanao, ny fabndaminan’Andriamanitra no handaminanao ny fiainan-tokantranonao ao an-tranonao. Ary raha firenena masina isika, aoka ho fitondran-tena manokana, mifanaraka amin’ny maha-firenena masina, ny fitondran-tenanao.

Misy fanadihadiana natao tamina firenena milaza azy ho kristiana, tao anatina toeram-piasana anankiray. Dia natao ny fanadihadiana : ato amin’ity toeram-piasana ity, ireto no mivavaka, ireto no tsy miditra am-piangonana. Dia natao ny fanadihadiana. Rehefa natao ny fikarohana manao hoe iza no tonga ara-potoana ao am-piasana ? Iza no tsy mandainga rehefa asaina manao facture ? Iza no mandoa ara-dalana ny hetra na ny impôts ? Be dia be ilay fanadihadiana, fa ny vokatr’ilay fanadihadiana dia izao : ohatrany kely fotsiny ny elanelan’ny olona tsy mivavaka sy izay olona mivavaka. Dia nivoaka ny conclusion an’ilay izy : tsy ny fidirana am-piangonana no maha-masina ny olona anankiray.

Fa jereo Madagascar, feno Fiangonana, fa jereo ny fomba fiainana. Ka raha firenena masina isika, dia tokony hita amin’ny fitondran-tena masina izany. Citoyen, manana fomba fiasa hafakely. Ary izany anie no nahatonga ny olona nanenjika ireo kristiana ireo e, nanaratsy an’ireo kristiana ireo e.

Ry havana : « Ry tanindrazanay malala o, ry Madagasikara soa » : vavaka anie izany e ; fa saingy izao : inona no fiatraikan’ilay taranaka voafidy amin’ny fiainan’ny firenena ? 2 Tantara 7:14 : « raha ny oloko izay nantsoina amin'ny anarako ho avy hanetry tena ka hivavaka sy hitady ny tavako ary hiala amin'ny ratsy fanaony, dia hihaino any an-danitra Aho ka hamela ny helony ary hahasitrana ny taniny ». Fanasitranana ny tany ve ? Any amin’i Dada ihany io : « Rainay o izay any an-danitra » : fiverenana amin’Andriamanitra

4. Olona nalain’Andriamanitra ho an’ny tenany

An’iza ianao azafady ? Na ianao an’Andriamanitra, na ianao an’ny devoly. Fa raha an’Andriamanitra ianao dia izao, hoe : tsy tompon’ny fiainanao intsony ianao fa fiainana manan-tompo ny anao, dia mahatonga anao hiteny manao hoe : « Tompo o, tsy izaho intsony anie no velona e, fa ianao no velona ato anatiko ».

Fianana mana-tompo : noho izany , navahan’Andriamanitra isika amin’ilay « FA ».

Dia mivoaka amin’izay ilay kian-teny faharoa : « MBA » : « mba hilazanareo ny hatsaran'ilay niantso anareo hiala tamin'ny maizina ho amin'ny fahazavany mahagaga ». Zavatra 4 no nanavahana antsika, fa 3 no takin’Andriamanitra amintsika :

1. Hilazanareo ny hatsaran’ilay niantso anareo

Hoy ny Romana 10:17 : « Koa ny finoana dia avy amin'ny tori-teny, ary ny tori-teny kosa avy amin'ny tenin'i Kristy » Inona no miteraka finoana ao amin’ny olona ? Ny torireny. Ianao ve mba efa nitoriteny ? Satria ny antony niantsoan’Andriamanitra anao dia mba hilaza ny hatsarany. Ary izany milaza izany, tsy hoe ny ahy ny fiainako no miteny. Marina izany. Fa mila miteny ny vavanao. Ary izay ilay olana : be dia be ny olona milaza ny tenany ho kristiana, fa matory fa tsy mitory. Hono hoa, inona no takin’Andriamanitra amintsika ? Mba hilaza ny hatsaran’ilay niantso anareo.

Ry havana, milaza ny hatsaran’Andriamanitra ve ny vavanao ? Inona moa ny hatsaran’Andriamanitra, ny filazantsara ? Kristy maty hamonjy anao, nanala anao amin’ny maizina ho amin’ny fahazavana.

Nalainy ho solom-bavany ianao. Tsara rehefa voafidy ho solom-bavam-bahoaka ; fa tsara lavitra rehefa voafidy ho solom-bavan’ny Tompo. Tsy voatery handray micro ianao vao mitoriteny. Fa miresaka ny famonjena ve ianao amin’ny zanakao ? Amin’ny vadinao ? Amin’ny mpiara-miasa aminao ? Amin’ny mpiara-mianatra aminao ?

2. Hifady ny ratsy

1 Petera 2:11 : « Ry malala, mananatra anareo aho, satria vahiny sy mpivahiny ianareo, fadio ny filan'ny nofo, fa miady amin'ny fanahy ireny ». Ny mahatonga ny olona tsy mivavaka dia ny ataon’ny mpivavaka ihany. « Aleonay ihany tsy mivavaka ; ireny hono no mba miseho mivavaka, jereo ary ny fiainany ». Efa nahare an’izany ve ianareo ? Satria izao no tadidio : « Ce que tu fais crie plus fort que ce que tu dis ». Izay zavatra ataonao no mikikika ren’ny olona kokoa noho ny zavatra teneninao. Noho izany, ilay fiainanao taranaka voafidy, fanjaka-mpisorona, firenena masina, olona nalain’Andriamanitra ho an’ny tenany, dia fiainana miala amin’ny ratsy, miady amin’ny ratsy. Fa be dia be no manova ny vavaka nampianarin’ny Tompo an. « Aza mitondra anay any amin’ny fakam-panahy, fa efa hitanay ny lalana mankany ».

Ry havana, fanjaka-mpisorona ianao ? Taranaka voafidy ianao ? Aoka hiady amin’ny ratsy ny fiainanao

3. Ho tsara ny fitondran-tena eo amin’ny jentilisa

1Petera 2:12 : « ary aoka ho tsara ny fitondran-tenanareo eo amin'ny jentilisa, mba hankalazany an'Andriamanitra amin'ny andro famangiana noho ny ahitany ny asa tsara ataonareo, dia izay anendrikendrehany anareo ho mpanao ratsy ». Ry havana, mandehana mivoaka fa ny maha-kristiana antsika, ny maha-taranaka voafidy antsika, tsy aty am-piangonana fa any amin’izao tontolo izao.

FEHINY : Fantatrao ve Andriamanitra, Ilay nanome an’i Jesoa Kristy ka nanekenao izany ? Dia nofidiany ny taranakao satria : « Minoa an’i Jesoa Tompo dia hovonjena ianao sy ny ankohonanao ». « Fa ianareo kosa dia taranaka voafidy, "fanjaka-mpisorona, firenena masina" (Eks. 19.6), olona nalain'Andriamanitra ho an'ny tenany mba hilazanareo ny hatsaran'ilay niantso anareo hiala tamin'ny maizina ho amin'ny fahazavany mahagaga ».

Amena

Lioka 23:40-41 : « Fa namaly kosa ilay anankiray, sady nananatra ny namany ka nanao hoe: Moa ianao koa tsy mba matahotra an'Andriamanitra na dia izao samy voaheloka izao aza? Ary marina ny anamelohany antsika, satria mandray ny valin'ny nataontsika isika; fa ity Lehilahy ity kosa tsy mbola nanao zavatra tsy mety na dia kely akory aza ».

Mahatahotra Andriamanitra Tompo.

Tantara somary manahirana ny tantara nomena antsika amin’ity Alahady ity satria olo-meloka, voalaza fa jiolahy no itaoman’ny tenin’Andriamanitra antsika ianarana. Ary raha ny perikopa androany no jerena dia ivon’ny fitantarana mihitsy izany. Hianatra avy amina toetra na fihetsika asehon’ny jiolahy anankiray niova fo ; manahirana izany. Kanefa na dia manahirana aza, dia tantara mamelom-panantenana satria na izay ao anatin’ny tontolo manahirana indrindra, azo lazaina hoe faran’izay maizina indrindra satria am-bavahoana ny fahafatesana no mbola manam-panantenana, mbola avotra ihany. Ilay jiolahy niova fo dia nahazo naoty tsara tamin’i Jesoa raha izany no ilazana azy : « Anio no hihaonanao Amiko any Paradisa » : mamelom-panantenana izany. Angamba mety tsy izaho ihany no hanao hoe « sambatra izy ». Fa ny fanontaniana tsy maintsy apetraka dia hoe : fa inona no nataony, na ny tsy nataony ka nahatonga azy nahazo teny mamy tahaka an’izany teo anatrehan’ny Tompo ? Ny valiny ry havana, fepetra tokana sady fototra dia ny fahatahorana an’Andriamanitra. Hoy izy nananatra ny namany teo : « Moa ianao koa tsy mba matahotra an'Andriamanitra na dia izao samy voaheloka izao aza? ».

Ny olona manana ny toe-panahin’ny fahatahorana an’Andriamanitra, manao ahoana moa izany ?

Fahamarinana 1 : NY OLONA MANANA NY TOE-PANAHIN’NY FAHATAHORANA AN’ANDRIAMANITRA DIA MIALA AMIN’NY FANIRATSIRANA AN’ANDRIAMANITRA

Ity anankiray voalohany, tsy tahotra tsy henatra, fa maneso, mandatsa, maniratsira an’i Jesoa Kristy : « Tsy Hianao va no Kristy? vonjeo ny tenanao sy izahay ». Miteniteny sahisahy ; azo ambara koa hoe miteniteny foana, miteniteny tsy am-piheverana amin’ny zavatra izay tsy fantany loatra akory ny antony ; azo ambara fa tsy fantany mihitsy aza, kanefa izany no nataony.

Fa ilay anankiray kosa izay ampianaran’ny Tompo antsika, hakana modely mety ianarana eto, dia nananatra ny namany izy. Ahoana ny fananarany ? « Moa ianao koa tsy mba matahotra an'Andriamanitra na dia izao samy voaheloka izao aza? Ary marina ny anamelohany antsika, satria mandray ny valin'ny nataontsika isika; fa ity Lehilahy ity (Jesoa izany) kosa tsy mbola nanao zavatra tsy mety na dia kely akory aza ». Teny am-pahendrena, teny amin’ny fandinihana lalina tokoa, ary teny izay maneho fahatahorana an’Andriamanitra ka mitaona ny namany hatahotra an’Andriamanitra. Teny mitsara marina ny feon’ny fieritreretany koa ; satria moa isika olombelona ry havana nomen’Andriamanitra ny feon’ny fieritreretana izay tsy azontsika fitahina fa mahalala ny miafina indrindra eo amin’ny fiainantsika. Ary iza moa no sahy fa tsy mahalala ny rariny sy ny hitsiny raha ny feon’ny fieritreretan’ny olona salama no ao aminy ao, tsy hahalala ny marina sy ny diso, ny mety sy ny tsy mety ; ary izany no mivoaka eto. Ilay feon’ny fieritreretana madio dia tena maneho ny marina. Koa ity lehilahy ity dia ekeny marimarina fa rariny ny nanamelohana azy, hoybny Soratra Masina eto hoe : valin’ny nataontsika » . Fa ilay Kristy Jesoa izay nihantona niaraka tamin’ireto jiolahy, dia tsy mba nisy heloka vitany akory aza ; ary haintsika ny tantara fa fialonana anie no tao ambadika tao e ; ny herinandro masina, mandalinaban’izany ny Fiangonana. Ny tsy finoany anie no nahatonga an’i Jesoa Kristy teo amin’ny hazo fijaliana e, ary dia neken’i Jesoa Kristy izany ho fanatanterahana ny sitrapon’Andriamanitra, fa tsy sanatria tsy mahavita na inona na inona Izy, araka izay heverin’ity jiolahy anankiray hoe : « vonjeo ny tenanao sy izahay ». Sanatria, tsy hoe tsy mahavita na inona na inona Izy, fa fanekeny hanao ny sitrapon’Andriamanitra. Koa mananatra ny namany ity jiolahy ity hatahotra an’Andriamanitra.

Ry havana malala rehetra ao amin’ny Tompo, ny toe-panahy voalohany amin’ny fanehoana ny fahatahorana an’Andriamanitra : fadio ny faniratsirana an’Andriamanitra. Aza miteniteny foana amin’izay tsy fantatra, indrindra indrindra amin’ny fomba fiasan’Andriamanitra izay mirakitra tsiambaratelo lalina mandrakariva, raha mahita olo-marina mijaly, raha mahita olo-marina toa voa mafy. Ary marina anie izany e : matetika ny olo-marina, ny tena mankatoa an’Andriamanitra dia miaritra hirifiry ; aoka ho tsapa, aoka ho tsaroana fa misy fomban’Andriamanitra lalina miafina ao ambadika ao. Ary izay moa no hazavain’i Petera ao amin’ny 1Petera 2 :12-17, fa Kristy aza efa nijaly hamonjy anareo, ka namela fianarana ho anareo mba hanarahinareo ny diany, Izay tsy nanota akory, ary tsy nisy fitaka teo am-bavany : raha notevatevaina Izy, dia tsy mba nanevateva. Naverin’i Petera nosoratana ny Isaia 53. Ankehitriny izao ry havana, dia Andriamanitra izay maneho ilay fahamarinany ao amin’i Jesoa Kristy, Andriamanitra te hahita antsika hanana ilay toe-panahin’ny fahatahorana an’Andriamanitra, satria ny olana matetika dia misy ny tsy dia matahotra loatra an’Andriamanitra, na dia amin’ny zavatra tsy fantany aza, amin’izay fomba fiasan’Andriamanitra sarotra hazavaina ; dia alaim-panahy haniratsira. Tamin’ny andro taloha raha natahoran’ny ntaolo mafy tokoa izany Zanahary ambonin’ny loha izany, « aza ny lohasaha mangina no jerena fa Andriamanitra ao an-tampin’ny loha », fa ankehitriby, tahaka ny tany tsy misy Andriamanitra intsony, ka ahasahiana miteniteny foana amin’ny zavatra samihafa izay tsy tokony aloaky ny vava akory aza. Ka mahatonga heloka ho an’ny fiainantsika tsirairay avy, eny hatramin’ny fiainan’ny firenena aza.

Ampianarin’ny tenin’Andriamanitra hatahotra an’Andriamanitra isika, ka hanome lanja, hampisy vidiny, ary indrindra indrindra tsy haniratsira an’Andriamanitra.

Zavatra faharoa, tsy Andriamanitra ihany fotsiny anefa no mety hotsiratsirain’ny olona, fa ny mpanompon’Andriamanitra. Ary misy izany. Ilay mpanompon’Andriamanitra nirahiny, nitokisany, izzy solontenany ety ambonin’ny tany. Misy ny maneso, misy ny mandatsa, misy ny manarabiraby raha misy voa mafy ireny mpanompon’Andriamanitra ireny, raha misy toa miaritra ny mafy, ary tojo izao loza rehetra izao. Tsy ny mampahery no ataon’ny sasany, fa ny mifanohitra amin,’izany.

Ry havana malala rehetra ao amin’ny Tompo, ry Fiangonana, toe-javatra fandinika sy fihevitra amin’ny fiandohan’ny taona toy izao, ny hitandrina amin’izay hotenenin’ny vava, satria ahazoana heloka eo anatrehan’Andriamanitra izany. Kanefa koa, izay tenenin’ny vava dia afaka hanehoana ny fahatahorana an’Andriamanitra ka handraisana valim-pitia lehibe amin’ilay Andriamanitra, toa izay mitranga eto : « Anio no hihaonanao Amiko any am-paradisa ».

Matahora an’Andriamanitra, ialao ny faniratsirana mivantana na ny mpanompon’Andriamanitra ; aoka hampiasa tsara ny feon’ny fieritreretana isika, indrindra isika Fiangonana, ka hahafantatra ny marina sy ny diso, ny mety sy ny tsy mety, ny rariny sy ny tsy rariny ka hitsara marina amin’izay rehetra miseho sy mitranga, indrindra indrindra amin’ny tontolon’ny asan’Andriamanitra izay tanterahina eo anivon’izao tontolo izao.

Ry havana malala ao amin’ny Tompo, matahora an’Andriamanitra ka ialao ny miteniteny foana. Ny tontolo iainantsika ankehitriny dia tontolo manahirana, satria tsy ny basy aman-tafondro avy any an-dafy ihany no mety hahafaty sy hanimba antsika, fa ilay fitenin’ny zatovo, mamelà ahy hiteny an’izany : ilay basin’ny vavantsika e. Ka mahatonga ny olona maratra fo. Firifiry moa ny olona miakatra tosi-drà ; firifiry moa no simba ny fahasalamany noho ny feo sy ny teny izay notenenina , tsy mitondra fampaherezana na fananarana, fa sanatria mitondra faisana, ka mahatonga fahavoazana ho an’ny hafa.

Raha te hanasitrana ny tany isika, raha te hitondra aina sy fahavelomana eo anivon’ny mpiara-belona amintsika, raha te hanome voninahitra an’Andriamanitra, dia andao atomboka amin’ny fampiasana ny vava sy ny fitenenana ka ahatsiaro fa ny antony naharian’Andriamanitra izany taova izany, dia anehoana fahatahorana Azy, kanefa koa, ahafahana mananatra ny mpiara-belona.

Fahamarinana 2 : NY OLONA MANANA NY TOE-PANAHIN’NY FAHATAHORANA AN’ANDRIAMANITRA DIA MANATONA AN’ANDRIAMANITRA

Ny tahotra an’Andriamanitra ry havana, tsy tahotra mampandositra sanatria, tahaka ny tahotra biby masiaka, fa tahotra mampanatona an’Andriamanitra.

Hoy ny tenin’ilay jiolahy anankiray : « Jesoa o, tsarovy aho rehefa avy amin’ny fanjakanao Ianao ». Ity teny hoe « tsarovy » ity dia manan-karena ara-kevitra tokoa. Azo ambara ao anatin’izany hoe «  ento manaraka anao aho raha ho any amin’ny fanjakanao Ianao ». Azo adika koa hoe « Antsoy hiaraka aminao aho, atao mba ho isan’ireo manaraka anao aho ». Ary azo takarina ry havana fa manana fotoana lava hivelomany ity jiolahy ity ka raha vao mifanerasera amin’i Jesoa Kristy, ilay teny hoe « Tsarovy aho » dia azo tenenina hoe « ataovy ho isan’ny mpianatrao aho ary ekeo ny hanarahako dia anao ry Jesoa Kristy o ». Toa olona efa nahay teolojia sahady ba nahalala sahady ny momba an’i Jesoa Kristy. Ny mpanao heviteny moa dia nihevitra fa na dia nanao asan’ny jiolahy aza ity namana ity, dia mety mba mandre ihany ny lazan’ity Jesoa Kristy ity. Koa eto ny fotoan-tsarotra eo amin’ny fiainany, ary eo anatrehany mivantana Jesoa Kristy, na dia samy eo amin’ny hazo fijaliana aza, dia ekeny ary inoany fa manana ilay fanjakana aoriny ity Jesoa Kristy ity. Ary izay moa no iraka lehiben’ny Tompo raha tonga tety an-tany, nambaran’i Jaona mpanao batisa izany, dia ny fanorenana ny fanjakan’Andriamanitra izay lavin’ireo sasany izay manohitra izany kanefa ivon’ny toritenin’i Jesoa Kristy ny fanorenana ny fanjakan’Andriamanitra. Koa ity jiolahy izay niova fo ity dia ny hanatona an’i Jesoa Kristy, ny hiara-monina amin’i Jesoa Kristy no zava-dehibe taminy ; ary izay ilay tahotra mampanatona fa tsy tahotra mampandositra teo. Tsy ataony ho anarana maneso izay voasoratra mivandravandra ho fanehoana an’i Jesoa Kristy ; raha mikisaka kely eo amin’ny and.38 mantsy isika dia hoe : « Ity no Mpanjakan’ny Jiosy » : tsy nataony  anarana maneso izany fa tena nianteherany sy nitokisany tokoa ka nahatonga azy niantoraka amin’i Jesoa Kristy : « Tsarovy aho » : maniry fatratra ny hanatona, ny hampifandraisina amin’i Jesoa Kristy ilay niova fo, satria fantany sy tsapany ary ekeny fa ilay Zanak’Andriamanitra dia tsy mba nanota, ary io no hanorina ny fanjakany. Ka ny fahatahorana Azy, ny fanehoana ny fahatahorana Azy dia ny fanekena ho isan’ny olona ao amin’ny fanjakany.

Ny fanjakan’Andriamanitra dia tsy fanjakana mbola ho avy ihany ; haintsika soa aman-tsara izany : fa fanjakana efa manomboka ary fanjakana efa tanteraka tamin’ny fahatongavan’i Jesoa Kristy. Fanjakana efa natombok’i Jesoa Kristy izany. Koa ho anao izay eo akaikin’i Jesoa Kristy, mandre ny tenin’i Jesoa Kristy, dia tsy ho amin’ny ho avy ihany izany. Izay ilay teolojia malaza hoe : «  déjà là et pas encore » : sady efa manomboka no mbola ho avy. Koa Jesoa Kristy ilay nankalazaina tamin’ny krismasy vao herinandro vitsivitsy izay, Ilay Imanoela, Andriamanitra ao amintsika, dia Andriamanitra efa nanorina ny fanjakany ary ianao koa, sitrany hiaina ao anatin’izany fanjakany izany. Ka ny fanatonana an’io Andriamanitra io, dia ny fanatonana Azy, ny fanekena ho eo ambany fifehezany, ary hankato ilay herin’ny fanjakan’Andriamanitra ka ho isany izay ho ao Aminy.

Izany fanjakan’Andriamanitra efa manomboka izany no tanteraka amin’ny fahafenoany, kanefa ny fanatrehan’Andriamanitra dia ilay « anio » an’Andriamanitra no azo hanombohana an’izany, na iza na iza, na aiza na aiza, ary na oviana na oviana, ka inona na inona toe-java samihafa atrehiko sy atrehinao.

Ry havana malaka ao amin’ny Tompo, miankina amiko sy aminao ny sisa. Tsy ilay jiolahy ihany ni hitenenan’ny Tompo hoe « anio », fa na ianao izay mpanompon’Andriamanitra aza, na ianao izay naniry hihaona amin’ny Tompo aza dia hanome lanja ny fikatsahana an’izany. Irio sy tadiavo ary katsaho fatratra ny hiditra amin’ny fanjakan’Andriamanitra. Ary izay moa no anatra nataon’i Jesoa Kristy : Matio 6:33 : « Fa katsaho aloha ny fanjakany sy ny fahamarinany, dia hanampy ho anareo izany rehetra izany ». Irio ny ho ao amin’ny fanjakan’Andriamanitra ; aoka ho vonona hiditra ao amin’ny fanjakan’Andriamanitra ianao. Meteza ry havana hanapa-kevitra anio ho tena ho an’Andriamanitra amin’ny alalan’ny sakramentan’ny batisa. Ary amin’izao fiandohan’ny taona izao, raha mbola tsy mpandray ny fanasan’ny Tompo ianao, meteza hianatra katekomena ho marika hita maso ny fidirana, ny fitsofoana ao amin’ny fanjakan’Andriamanitra. Rehefa vonona koa ka mankatoa, meteza hanompo Azy. Ho anao izay efa ao anatin’ny fanjakany, ny hoe « tsarovy aho rehefa avy amin’ny fanjakanao » dia tahaka ny maniry hanompo an’Andriamanitra misimisy kokoa. Ny fanontaniana azo apetraka ry havana amin’izao fiantombohan’ny taona izao, ho anao izay efa ao anatin’ny fanjakan’Andriamanitra dia hoe : Mbola mafana ve ? Mbola misy risi-po ve ao anatinao amin’izany fanompoana an’Andriamanitra izany ? Ary raha hobavy ny fifidianana, ny fanavaozana, amin’izao faramparan’ny mandat izao : mbola mirehitra tsara ve ilay hafanana tamin’ny fanokanana ho isan’ny mpitarika ao amin’ny sampana, ny Fiangonana, ny vaomiera samihafa ?

Irio ny hanitatra ny fanjakan’Andriamanitra ihany koa ho anao izay efa ao anatiny. Tsy ho kristiana tia tena sanatria. Ka hoe izay hamonjy ahy ihany no fantatro ; ka na ny vady aza dia hoe an an an, izay hamonjy ahy ihany no fantatro. Tsy izany no tena fivavahana marina. Ilay jiolahy eto ary dia mbola miala nenina amin’ny namany, nananatra ny namany. Ary moa va tsy mamelona ato amiko sy ao aminao ny asa fitoriana ny filazantsara izany, ahatonga hijery ny hafa ? Tsy ny tenanao izay resy lahatra sy manana eritreritra madio ihany, fa na dia izay heverina fa manao atsimo sy avaratra amin’izay heverinao aza, dia adidiko sy adidinao izany.

Ora sy minitra farany sisa no hananan’ity jiolahy ity kanefa nampiasaina nitoriana ny fiilazantsara amin’ny namany. Fa izaho sy ianao, nomen’Andriamanitra taona vaovao indray, ity 2019 ity, izay mariky ny fitokisan’Andriamanitra ka hanirahany antsika hanatanteraka ny asany. Manana, tsy minitra fotsiny fa mety ho andro, volana, taona maro, 70 taona na 80 taona : ora firy, volana firy no atokanao hanaovana ny asan’Andriamanitra ? Ary izany no vinan’ny FJKM, Vontosy Filazantsara ny Nosy Madagasikara : mandray anjara amin’izany ve ianao ? Araraoty ny fotoana.  Ankatoavy ny baikon’ny Tompo manao hoe : « Mandehana, ataovy mpianatra ny firenena rehetra, mitoria ny filazantsara amin’ny olona rehetra, ianareo no vavolombeloko, ahazo hery ianareo amin’ny hilatsahan’ny Fanahy Masina aminareo ary ho vavolombeloko eran’i Jodia sy Samaria hatramin’ny faran’ny tany ». Ka raha azo atao ary ny manao vy very ny aina amin’ny fitoriana filazantsara, mba hananatra sy hanoro hevitra ireo izay mbola lavitry ny vala na tsy ao amin’ny fanjakan’Andriamanitra.

Ho fandinihan-tena dia teboka telo no tiako hosaintsainina sy heverina, ho antsika manatrika izao fanompoam-pivavahana izao :

1. Ianao ve efa ao amin’ny fanjakan’Andriamanitra sa tsia ?
2. Ianao ve izao efa manatona an’Andriamanitra, mampanatona olona amin’ny fanjakan’Andriamanitra ? Firy no efa nampanatoninao an’i Kristy ?
3. Ianao ve izao efa vonona hankato ny fepetran’ny fanjakan’Andriamanitra ?

Raha fehezina izay rehetra voalaza izay, inona no azo ambara ? Mahatahotra Andriamanitra Tompo. Mitaky fahatahorana Azy izany. Ahoana ny anehoana ny fahatahorana Azy ? Lesona lehibe ankehitriny izay nomen’ity voaheloka kanefa niova fo, hevim-panahy lehibe 2 no nambara taminao teo :

1. Mialà amin’ny faniratsirana an’Andriamanitra : ity vava e ! Ampy izay. Fadio ny maniiratsira an’Andriamanitra, eny fa na ny mpanompon’Andriamanitra izay solontenany eto an-tany mitory ny amin’ny hazo fijalian’i Jesoa Kristy.
2. Fantaro ny asan’Andriamanitra ; tsy ampy intsony ny mino fotsiny amin’izao ; fa rehefa mahalala, mahafantatra ny sakany sy ny lavany, ny ahavony sy ny ahalaliny ny amin’i Jesoa Kristy, mba ho voatahiry ilay finoana, ka hanakaiky an’Andriamanitra, hankatoa an’Andriamanitra ary hanitatra ny ambaindahin’ny fanjakan’Andriamanitra

Izao perikopa omena antsika androany izao, mamoha indray ny antson’Andriamanitra ho an’ny mpanompon’Andriamanitra rehetra tsy misy havakavaka, hahatonga azy hitory ny filazantsara amin’ny fotoana rehetra.

Vaovao izao ny taona, ny firariantsoa ho anao dia tsy ho ny taona ihany no vaovao fa izaho sy ianao no ho vaovao satria tian’Andriamanitra hanana ny toe-panahin’ny fahatahorana an’Andriamanitra, ny fahatahorana an’Andriamanitra, ilay fahendrena voalohany indrindra ; ary izany no ampianarin’ny Tompo ny FJKM, hanana an’izany fahendrena voalohany izany, hahatanteraka ny fikasany sy ny iraka ampanaoviny amin’ity taona vaovao ity. Izany fahendrena fototra izany no vohizina sy ampianarina ary hananarina.

Ho Andriamanitra irery anie ny voninahitra, ho amintsika mandrakariva anie ny fahasoavany. Amena.

« Ary aza matahotra izay mamono ny tena, nefa tsy mahay mamono ny fanahy; fa aleo matahotra Izay mahay mahavery ny fanahy sy ny tena ao amin'ny helo ». Matio 10:28

Misaotra ny Tompo ny amin’ny fitiavany antsika satria amin’izao Alahady voalohany amin’ny taona izao dia sarihany ny saintsika ny amin’ny zavatra sarobidy indrindra eo imasony dia ny fanahintsika. RESAKA FANAHY. Izat no votoantin’izao hafatra izao : RESAKA FANAHY : FANAHINAO – FANAHIKO.

Fahamarinana 1 : ARY AZA MATAHOTRA IZAY MAMONO NY TENA
Mafy izany ry havana, tsy ao anatin’ny logique-tsika na ny fahendrentsika izany, hoe : « aza matahotra izay mamono ny tena ». Mazava izany, ny fahafatesan’ny tena, izany ilay sary : « aza matahotra izay mamono ny tena ». Ao amin’ny andavan’androm-piainantsika dia misy zavatra mampatahotra, mampihorohoro. Mampatahotra sy mampihorohoro satria mety hiteraka fahafatesan’ny tena. Eto moa ny fanenjehan’ny mpitondra fivavahana jiosy, manenjika an’ireto mpianatra ireto dia izay no hitenenan’i Jesoa hoe an an an, na hovonoin’ireo ho faty aza ianao, « aza matahotra izay mamono ny tena ».
Raha mandinika ny fiainantsika ry havana, dia mbola marina amintsika ny zavatra nitranga tamin’ny andron’i Jesoa : eo izay hoe mpitondra fivavahana te hanenjika anao, tena misy izany ; eo koa izay hoe mpitondra politika te hanenjika anao ; eo koa izay amin’ny andavan’androm-piainanao , mpamaky trano, dahalo, mpanakana eny an-dalambe. Dia hoy ny Tompo hoe : « aza matahotra izay mamono ny tena ». Inona no anton’izany ry havana ? Azavain’i Jesoa eo, ary efa voalaza na tamin’ny 5 minitra na tamin’ny louange : ny zavatra rehetra anie eo am-pelatanan’Andriamanitra e. Io tsintsina izay resahin’i Jesoa io, vorona tsy misy valeur-ny kanefa eo am-pelatanan’Andriamanitra. Asa moa izay fahamarinan’izany, fa hoy ny mpitoriteny anankiray hoe Andriamanitra manatrika ny fandevenan’ny tsintsina rehetra ety ambonin’ny tany. Fa sary ihany izany.
Nolazaina teo ny momba ny volon-dohantsika ry havana, ary mikaroka eo, dia izany no lazain’y sasany hoe aux alentours-ny 144.000 ny isan’ny volon-doha amin’ny olombelona anankiray, 144.000, à peu près izany. Fa na ny ranomasonao io aza, eo am-pelatanan’Andriamanitra. Jerentsika anie ny Salamo 56, ianao ao anaty ranomaso sy fampahoriana, dia henoy ny teny fampaherezana omen’ny Tompo anao, Salamo 56 :8 : «Manisa ny firenireneko Hianao; ataovy ao an-tavoahanginao ny ranomasoko». Io ranomaso mikoriana amin’ny tarehinao io, na inona na inona anton’ilay tomany ry havana, tsy verivery fotsiny io, fa angonin’Andriamanitra anaty tavoahangy dia eo imasony io ranomasonao io. Izany no atao hoe finoana. Azonao atao ny miteny hoe foano io loharano-na ranomaso io, fa rehefa tonga aloa ilay ranomaso dia hoe angoninao anaty tavoahanginao io ranomaso io.
Ilay evanjelista malaza be izay efa rentsika anarana ihany, John Wesley dia nijoro vavolombelona hoe tsy mbola nahatsiaro hoe nihorohoro na nangovitra na natahotra mihoatra ny 15 minitra tao amin’ny fiainako. Ary eo anatrehan’ny Tompo aho no mitantara an’izany. Dia ahoana ny tohin’ilay fijoroana vavolombelona ? Isaky ny tonga manafika ilay fanahiana, izay tena hoe zana-tsipika alefan’ny devoly, tonga ilay tahotra tsy hay tohaina, inona ny zavatra ataoko ? Mahatsiaro an’ilay seza fiandrianana ao an-danitra ao aho, araka ny Apokalypsy 4 :2, izay haintsina Isotry Fitiavana tsara ; mahatsiaro an’io aho hoy izy, ary mahatsiaro hoe mandraka androany dia mbola misy olona mipetraka eo, fa tsy hoe élection izao dia tsy misy olona mipetraka eo ; fa misy mipetraka eo, ary io Mpanjaka mipetraka eo ambony seza fiandrianana araka ny Apokalypsy 4 :2 io ry havana, mitazona ny zavatra rehetra eo am-pelatanany. Ary rehefa tonga hoy izy ilay tahotra, rehefa tonga ilay fanahiana hoy izy, ny zavatra ataoko, dia akipiko ny masoko dia mivavaka aho. Tsy dia tena misy tonom-bavaka manokana hoy izy, fa akipiko ny masoko dia misaina an’io seza fiandrianana io aho, dia misinda ny fanahiako.
Hoy ny Tompo aminao hoe : « aza matahotra, aza matahotra, aza matahotra izay mamono ny tena ». Io tsy resaka psychologie, tsy resaka développement personnel sy ny karazany, izao fatina fampianarana rehetra izao : tenin’Andriamanitra io. Fa ny olona manana an’izany finoana velona izany, ho an’ny olona manana finoana iainana izany, ny fahafatesana dia famindrana anao any amin’izay ahazoanao tombony, famindrana anao any amin’ny tsara lavitra. Filipiana 1:21-23 : « Fa Kristy no anton'ny ahavelomako, ary ny fahafatesana no hahazoako tombony.Kanefa raha ny ho velona amin'ny nofo no hahavokaran'ny asako, dia tsy hitako izay hofidiko;Fa sanganehana eo anelanelan'izy roroa aho, maniry hiala ka ho ao amin'i Kristy, satria tsara lavitra izany ». Izany ve ny finoanao, ianao izay hitenenana hoe « aza matahotra izay mamono ny tena » satria raha maty io tenanao io dia lasa any amin’i Kristy ianao ? Mino an’izany ve ianao ? Ary satria ianao raha maty araka ny tenin’i Jesoa dia lasa any amin’i Kristy, lasa any amin’ny tsara lavitra. « Aza matahotra izay mamono ny tena ».
Izay izany ny fahamarinana 1, hoe na inona na inona mitranga eo amin’ny fiainanao, na inona na inona fampahoriana, efa nandalo teo amin’ny seza fiandrianan’Andriamanitra izany. Tsy misy ny kisendrasendra, tsy misy ny chance, tsy misy ny malchance, tsy misy ny destin aveugle ; misy ny Mpanjakan’ny mpanjaka mipetraka eo ambony seza fiandrianana. Mino izany ve ianao ?

Fahamarinana 2 : FA ALEO MATAHOTRA IZAY MAHAY MAHAVERY NY FANAHY SY NY TENA AO AMIN’NY HELO
Mba tsy hisian’ny fisalasalana ry havana, hitanareo fa amin’ilay hoe : « Aleo matahotra Izay… » dia I fa tsy i. Iza ilay I majuscule ? Andriamanitra. Izy no mahavery ny fanahy sy ny tena any amin’ny helo.
Ahoana ary no ahazoako mandinin-tena ahafantarako hoe tsy mba izaho izany hoverezina any amin’ny helo izany, ary ny fiainako dia tena fahatahorana an’io Andriamanitra io ? Io ry havana fahamarinana tsy latsak’ilay fahamarinana 1. Sarotra izany hoe « aza matahotra izay mamono ny tena », fa faharoa, « aleo matahotra an’Andriamanitra ». Sarotra izany. Ary izany ny secte rehefa mijery antsika, tsy miteny hoe Fiangonana tsy manana fanahy ireo, fa plutôt isika Fiangonana tsy matahotra an’Andriamanitra ; fa ry zareo koa raha dinihina, tsy matahotra an’Andriamanitra. Andao hitombo amin’ny fahatahorana an’Andriamanitra ry havana. Eksodosy 20 ; ary ny fiainan’ny Zanak’Isiraely ato amin’ny Eksodosy sy ao in’ny Baiboly iray manontolo dia fiainako, fiainanao, fiainan’ny Fiangonana ry havana. Inona ny zavatra nitranga ka tena hoe nampatahotra ny Fiangonana izay teo ry havana ? Eksodosy 20:18-20 : « Ary ny olona rehetra nandre ny kotrokorana sy ny feon'ny anjomara ary nahita ny helatra sy ny tendrombohitra nivoa-tsetroka, ary nony nahita izany ny olona, dia toran-kovitra izy ka nijanona teny lavitra eny . Dia hoy izy tamin'i Mosesy: Aoka ihany ianao no hiteny aminay, dia hihaino izahay; fa aza Andriamanitra no miteny aminay, fandrao maty izahay. Dia hoy Mosesy tamin'ny olona: Aza matahotra; fa tonga Andriamanitra mba hizaha toetra anareo, ary mba ho eo anatrehan'ny tavanareo ny fahatahorana Azy, mba tsy hanotanareo ». Raha mijery an’io Eksodosy 20 io ianareo dia hitanareo fa vao avy nanome ny Didy 10 Andriamanitra. Ary maninona Izy no nanome an’io Didy 10 io ? Ho marik’ilay finiavany hanao fanekena amintsika. Jereo kely anie ao amin’ny Eksodosy 19:5 : « Koa ankehitriny, raha hihaino ny feoko tokoa ianareo ka hitandrina ny fanekeko, dia ho rakitra soa ho Ahy mihoatra noho ny firenena rehetra ianareo; fa Ahy ny tany rehetra ». Andriamanitra dia Andriamanitry ny fanekena ; tia manao fanekena Izy, maka initiative-ny fanekena Izy ; ary rehefa manao fanekena Izy, tsy hoe hanery, fa manao fanekena Izy amiko sy aminao « mba ho rakitra soa ho Ahy », « pour être un trésor précieux à mes yeux ». Izany io Andriamanitra io ry havana : te hanao fanekena Izy mba ho rakitra soa. Izany no tanjony aminao, ho sarobidy eo imasony, ho be voninahitra eo imasony, hokarakaraina, ho kolokoloina ; izany anie ilay contrat tiany atao aminao e. Dia io, marik’ilay contrat, manome an’ilay didy 10 Izy. Ary satria tsy niteny amintsika, tsy niteny tamin’ny Zanak’Isiraely izany, tsy miteny amintsika koa izany ankehitriny ry havana. Dia io ary ny and.18 hoe « Ary ny olona rehetra nandre ny kotrokorana sy ny feon'ny anjomara ary nahita ny helatra sy ny tendrombohitra nivoa-tsetroka, ary nony nahita izany ny olona, dia toran-kovitra ». Natahotra ny olona. Hoy Mosesy : hitanareo ny anton’io tselatra sy kotrokorana sy tendrombohitra mivoa-tsetroka io sy feon’anjomara, fantatrao ny anton’izany ? Mba hahatahoranao an’Andriamanitra, mba handraisanao an’Andriamanitra sérieux ary tena hoe zava-dehibe izany fanekena izany fa tsy teniteny vakiana fotsiny. Ary tsy hoe zavatra akipaka satria hoe manempotra , tsisy iainana ary maneritery. Izany ny antony hoe nanehoan’Andriamanitra ny tenany amin’ny fomba mahatahotra ry havana. Tena matahotra, ilay « peur » io. Dia io moa, niteny tamin’i Mosesy Izy, azon’ny vahoaka, azon’ny Fiangonana ihany ilay zavatra : an an an ka, aleo tsy Andriamanitra intsony no miteny aminay mivantana fa tsy zakanay, matahotra izahay, tsy zakanay ny fahamasinany ; fa aleo ihany ianao no miteny, aleo ihany ianao no manalalana anay amin’Andriamanitra. Dia io tokoa moa izany fa narahin’i Mosesy izany. Ary inona ny zavatra nitranga ry havana ? Jereo kely ny Baibolinareo ao amin’ny Eksodosy 32 ; izay rehefa tsy eo ny tahotra an’Andriamanitra, nalefy ilay tahotra an’Andriamanitra : nanomboka nanao ombilahikely izy, volamena, sampy volamena, Eksodosy 32:5-6 : « Ary raha hitan'i Arona izany, dia nanao alitara teo anoloany izy; ary dia niantso Arona ka nanao hoe: Andro firavoravoana ho an'i Jehovah rahampitso.Dia nifoha maraina koa ny olona ka nanatitra fanatitra dorana sy nitondra fanati-pihavanana; ary nipetraka hihinana sy hisotro ny olona, dia nitsangana hilalao ». « Ils se levèrent pour se divertir ». Sady manao sampy volamena izy,ombilahikely volamena no manao divertissement dia tsy ao intsony ilay tahotra an’Andriamanitra. Fa inona no maha-matimaty ny finoantsika e ? Inona no maha-tandrametaka ny finoantsika e ? Tsotra ny antony ry havana : tia lalao koa isika, tia divertissement koa isika Fiangonana ry havana, dia mialefy mialefy izany tahotra an’Andriamanitra izany. Ary ilay divertissement io dia mitondra any amin’ny kilalao maloto isan-karazany. Fa rehefa jerena ry havana ao amin’ny Baiboly ao, omeko anareo fotsiny ilay référence, ny tantaran’i Petera ao amin’ny Marka 12 : 66-72, apostoly 12 lahy, mpianatra 12 lahy nandà an’i Jesoa. Ary inona ilay anton’ny fandavan’i Petera an’i Jesoa ? Marka 14:37 : « Ary avy Izy ka nahita azy ireo matory, dia hoy Izy tamin'i Petera: Ry Simona, matory va ianao? Tsy nahazaka niari-tory na dia ora iray ihany aza va ianao? » Izay ry havana, io no fototr’ilay fandàvana an’i Jesoa nahazo an’i Petera, satria Petera tsy ampy vavaka. Petera tsy ampy vavaka ry havana o ! Izy tsy mba be lalao ohatrantsika, fa tsy ampy vavaka izy. Rehefa any an-trano, jereo io Marka 12 :66-72 io : tsy ampy vavaka izy dia hita eo hoe nanomboka nandà ; tsy ampy vavaka izy dia nanohy nandà, tsy ampy vavaka izy dia nandà tanteraka, ary tsy ampy vavaka izy dia tsy afa-nandà intsony. Izany no maha-zava-dehibe ilay mivavaka io ry havana o. Ary rehefa mijery ny fiainantsika izany, tsy ao ilay tahotra an’Andriamanitra, be lalao, tsy ampy vavaka : normal raha ohatran’izao ny fiainan’ny Fiangonana, normal, normal be. Tia antsika ny Tompo dia manome antsika izany lohateny, lohahevitra volamena izany, dia hoe : Matahora an’Andriamanitra : Mahatahotra Izy ka matahora Azy.
Faranana izao teny izao ry havana. Raha mandinika ny fiainantsika izao isika dia azo antoka fa hoe tao anatin’ny firariantsoa nifanaovana dia hoe « samy ho tratry ny ho avy indray ». Tsy maninona izany. Fa tsy sûr aho hoe araka ny Soratra Masina izany. Ary raha faniriana izany, ny Tompo no mahafantatra iza no hahatratra izany 01 Janvier 2020. Fa ny fanontaniana ry havana o, ny firariana sy ny antom-bavaka ho antsika ; andeha anie averina vakiana ny Eksodosy 20:20 : « Dia hoy Mosesy tamin'ny olona: Aza matahotra; fa tonga Andriamanitra mba hizaha toetra anareo, ary mba ho eo anatrehan'ny tavanareo ny fahatahorana Azy, mba tsy hanotanareo. ». Ataovy ao antin’ny taona manontolo, manomboka anio 06 Janvier, rapitso 07 Janvier, ataovy eo anatrehanao ny fahatahorana an’Andriamanitra.

Fahamarinana 3 : ATAOVY EO ANATREHANAO NY FAHATAHORANA AN’ANDRIAMANITRA
Raha mbola misy Bonne année taraiky any dia ataovy hoe : « Bonne année », fa ampio hoe : « Ataovy eo anatrehanao ny fahatahorana an’Andriamanitra ».
Inona no dikan’izany ry havana ? MITOMBOA AMIN’NY FAHATAHORANA AN’ANDRIAMANITRA. Bien sûr, mitomboa amin’ny fankatoavana ny teny, mitomboa amin’ny fiainam-bavaka : mazava be izany. Fa manombok’izao, ao anaton’ny zavatra mampihorohoro anao, dia tsarovy Izy ary mivavaha Aminy. Raha sendra hoe tafody alina ianao, noho ny antony arak’asa, any am-pianarana, avy namonjy fivoriana taty am-piangonana, dia hoe zone rouge ity ; rehefa hoe zone rouge ry havana dia tsy mandeha ; fa raha zone rouge ka tratra alina ianao noho ny asan’Andriamanitra dia teneno Izy hoe : zone rouge ity Jesoa an, fa taraiky alina be aho noho ny aminao sy ny asanao ; fa fantatro fa ny anjelinao dia mitoby manodidina izay matahotra Anao ; ary matahotra aho. Hiova ny finoanao, hiova ny fatahoranao an’Andriamanitra raha ao anatin’ny 365jours ianao, isaky ny misy zavatra mampatahotra, diaahatsiaro an’Andriamanitra hoe : soa fa eo ny anjelinao, mitoby manodidina ahy. Izany ve ny finoanao ?
Ary ho antsika aty amin’ny pays tropical aty, misaora an’Andriamanitra isaky ny mahare kotrokorana ; misaora an’Andriamanitra : toriteny velona rehefa mahita ireny helatra na tselatra. Manomboka izao, aza miteny intsony hoe oay izany orana, avy be izao ny orana, aleo hitsahatra aloa ny orana vao mivoaka ; tsarovy Andriamanitra ary mitomboa amin’ny fahatahorana an’Andriamanitra. Tsarovy ny anjeliny, tsarovy ny kotrokorana, dia izao : ity efa reflexion efa nataontsika efa taona vitsivitsy lasa izay : aoka ny fitafintsika ho fitafin’ny olona matahotra an’Andriamanitra. Tsy dia mananona anareo tanora aho akory, fa ankoatra izay efa lazaina : izaho milaza aminareo : aoka izay ity hle mankaty an-tranon’Andriamanitra ity ka manao an’itony hoe short basket sy fanaovana sport itony. Raha avy manao sport ianao any am-pianarana, miovà akanjo. Izany no mariky ny fahatahorana an’Andriamanitra. Izaho tsy miverina amin’izay hoe ahalavan’ny akanjo ; fa misy tenue ry havana, tsy idirana aty am-piangonana raha mbola hoe olona matahotra an’Andriamanitra. Ary tsy resaka moral izany, tsy resaka lamaody izany, tsy resaka goût izany, fa ny fitafinao, rehefa mandika an’io vavahadin’ny Fiangonana io, fitafin’ny olona matahotra an’Andriamanitra ve ?
Omaly izahay ry havana nandeha namangy manjo olona ; ramatoa 75 taona no maty ; ramatoa novonoin’olona, ary novonoina tamin’ny fomba feno habibiana. Alevina ratoandro izy. Ary alohan’ny tena nahataperan’ny ainy an, naolan’izay mpamaky trano izy. Maty tamin’ny Alakamisy izy, alevina androany. Dia eo ary isika izany : ahoana ary izany toriteny izany Pasitera ? Teo izany hoe miteny amintsika ny Tompo : « Aza matahotra izay mamono ny tena ». Izay ilay izy sa tsy izay ? Izay ilay izy. « Fa matahora Izay mahavery ny Fanahy sy ny tena ao amin’ny helo ». Zavatra roa ry havana : tsy misy maniry antsika ho faty amin’izany fomba feno habibiana izany ; fa io, izay no anjarany ary nandalo teo amin’ilay seza fiandrianana tany an-danitra anie izany ry havana o. Mino an’izany ve ianao ? Sa tsy mila an’izany Andriamanitra izany ianao ? Misy mpanompon’Andriamanitra izay niteny hoe rehefa tena feno tahotra an’Andriamanitra ianao, dia tsy matahotra na inona na inona intsony. Ary izay no itenenantsika hoe : ry havana o, anio 06, rapitso 07, rafak’ampitso 08, mitomboa amin’ny fahatahorana an’Andriamanitra. Ataovy exercice io ; manazara tena, manazara Fanahy amin’izany, araka ilay notenenina teo. Fa eto amin’izao tontolo izao no ahitana fahoriana, ary ny androntsika rehetra dia voasoratra, ny andro voatendry ho ahy sy ho anao, samy efa voasoratra ao amin’ny bokin’Andriamanitra fony mbola tsy nisy akory ary izy ireo. Fa izao : ny zavatra hiomanana dia ny fitomboana amin’ny fahatahorana an’Andriamanitra. Ary enga anie ry havana ka rehefa tojo an’izany fahafatesana izany isika, na inona na inona endriky ny fahafatesana, dia efa tena hoe vonona noho ny famindrampon’ny Tompo amin’ny teniny tahak’izao. Ary faharoa ry havana, ny Tompo dia milaza hoe « aleo matahotra Izay mahavery ny Fanahy sy ny tena ao amin’ny helo » ; fahamarinana hoe ny Fanahinao io, tsy mety maty io e ; tsy mety maty ny Fanahy ry havana o ; fa amin’ilay fotoana ahatongavan’ny fahafatesana iny, na izy mankany an-danitra, any am-paradisa misy an’i Jesoa, na izy mankany amin’ny helo, any amin’ny fahaverezana. Tsy hoe maty izy any, tsy hoe levona izy any, fa lasa any amin’ny fijaliana tsy manam-pahataperana.
Izay no hafatra ho antsika ry havana. Hoy ny Tompo amintsika hoe : Fantaro fa sorobidy loatra Amiko ary tokony ho sarobidy loatra aminao io Fanahinao io. Ary dia izao : aoka izany no hibaiko ny fiainanao, hoe « Ary aza matahotra izay mamono ny tena, nefa tsy mahay mamono ny fanahy; fa aleo matahotra Izay mahay mahavery ny fanahy sy ny tena ao amin'ny helo ».

Amena

Lioka 1 :49-50 ;55 : « Fa ny mahery efa nanao zava-dehibe tamiko ; ary masina ny anarany. Ary ny famindrampony dia amin’izay matahotra Azy hatramon’ny taranaka fara mandimby ».« Araka ny voalazany tamin’ny razantsika, tamin’i Abrahama sy ny taranany mandrakizay ».

Mifalia amin’ny fitiavan’ny Tompo : zavatra 3 no hotadidintsika anio. Mifaly isika :
- Fa nanao zavatra lehibe tamintsika ny Tompo ( and.49 )
- Satria mamindra fo hatramin’ny taranaka fara mandimby ny Tompo ( and. 50 )
- Satria mitana ny teny fikasany ny Tompo ( and. 55)

Fahamarinana 1 : MIFALIA FA NANAO ZAVATRA LEHIBE TAMINTSIKA NY TOMPO
Ny Soratra Masina novakiana teo (and.39-56) dia milaza ny fiderana nataon’i Maria sy Elizabeta, ary raha vakiantsika hatramin’ny and.80, voalohany dia manao fiderana an’Andriamanitra i Elizabeta (and.39-45). Ny fiderana nataony dia hoe tsy noeritreretinay mihitsy, izy mivady, sady tena nanompo an’Andriamanitra, ary tena mivavaka, fa izao, tsy nanan-janaka izy ; fa tao anatin’ny fahanterany, nasehon’Andriamanitra ny asa mahagaga : nomena zanaka izy ary Jaona no anarany. Midera an’Andriamanitra i Elizabeta. Faharoa, and. 46-56, dia fiderana nataon’i Maria. Ny zavatra nitranga indray dia izao : tsy nieritreritra mihitsy i Maria, ary izy mihitsy aza no mijoro vavolombelona hoe : izahay sy Josefa mbola tsy vita soratra, fa mahagaga fa nomena zazalahy, hiteraka zazalahy izahay ary ny anarany dia atao hoe Jesoa, Mpamonjy izao tontolo izao. Misy zavatra tsy takatry ny saina ataonao Andriamanitra eo amin’ny fiainanay : midera sy manome voninahitra aho noho ny amin’izay. Ary fahatelo, and. 57-80, i Zakaria indray no midera an’Andriamanitra, satria tena tsy nino Zakaria hoe hisy an’izany ; ary vokatry ny tsy finoany dia lasa moana izy. Rehefa teraka i Jaona dia hoe iza no atao anarany, dia hoe an an an, tsy misy an’izany anarana Jaona izany ao amin’ny fianakaviana, dia nalainy amin’izay ny tableau na fafana dia nosoratan’i Zakaria hoe Jaona no atao anarany. Ary nony avy eo, nisokatra ny vavany, afaka niteny izy.

Ry havana, misy zavatra lehibe ataon’Andriamanitra eo amin’ny fiainantsika. Inona no dikan’ilay hoe nanao zavatra lehibe teo amin’ny fiainantsika ny Tompo (and.49) ? Ny hevitr’io teny io dia izao : Andriamanitra manao zavatra lehibe eo amin’ny fiainanao. Ny dikan’ny hoe zavatra lehibe eo amin’ny fiainantsika dia izao : Andriamanitra mihitsy no mamolavola ny fiainantsika. Tahaka ny tanimanga eo anatrehan’ny mpanefy azy isika ; ary rehefa Andriamanitra no mamolavola ny fiainanao, dia ho amin’izay tena tsara indrindra sy mendrika indrindra ary sarobidy sy lehibe indrindra no anaovan’Andriamanitra anao. Izany hoe tena vita, misy refy ara-dalana, misy refy voakajy ara-dalana, izany no nanaovan’Andriamanitra anao. Ny olona mety mieritreritra hoe mety tsy ho izany : tsia.

Rehefa ny Tompo no mamolavola antsika ry havana, noforonina araka ny endrik’Andriamanitra isika, dia zavatra tena tsara indrindra ary manana antom-pisiana, izany no nanaovan’Andriamanitra anao. Misy antom-pisiana nanaovan’Andriamanitra anao ; tsy hoe atao ianao dia atao fotsiny. Ary tsy vitan’ny hoe antom-pisiana io ry havana, fa ny zavatra asehon’ny Tompo dia hoe tena ataon’Andriamanitra misy fahariana vaovao indray ny fiainanao. Ianao mahatsapa ny fahariana ataon’ny Tompo eo amin’ny fiainanao, fa ianao ihany koa amin’ny iraka ampanaovin’i Jesoa anao dia mahatsapa ny fahariana ampanaovin’Andriamanitra anao ny olona.

Misy tantara iray ity mampiseho hoe rehefa Andriamanitra no mamorona anao dia tena vita ara-dalana sahady ny antom-pisianao ary misy zava-baovao anirahan’ny Tompo anao : manao zava-dehibe eo amin’ny fiainanao Andriamanitra. Fotoana fety mantsy izao ry havana dia mamerina an’izay tantara izay aho : ny zanak’izy mivady 6, ary ny anaran’ilay faha-enina natao hoe Fara. Dia tena mivavaka ohatrantsika izao ry zareo, dia rehefa andeha mivavaka izy mivady dia tena ireny izy 6 mianadahy fa tena manao tohatra kely. Dia hoy ny mpiara-mivavaka : aoka izay, aza miteraka intsony ianareo fa rehefa mipetraka ianaoreo ao am-piangonana dia fenonareo ny dabilio iray, angaha anareo irery io dabilio io. Dia hoy izy mivady : aoka izay fa tsy hiteraka intsony isika. Ny anaran’ilay faha-enina, Fara ; fa tampotampoka teo, nisy zandriny i Fara, ka lasa 7 ry zareo. Dia hoy indray ny olona : aoka izay, aza miteraka intsony ianareo fa izao izao ianareo rehefa mipetraka ao am-piangonana, efa mihemotra ao aoriana ny anankiray. Dia hoy indray izy mivady : aoka izay fa tsy hiteraka intsony isika. Ny niafarany indray, tampotampoka teo, mbola nisy zandriny indray ny zandrin’i Fara. Lasa 8 ry zareo. Ary rehefa andro fety tahak’izao, mivory ny fianakaviana dia hoe : o rankizy, raha ny programan’i Dada sy Neny dia nijanona teo amin’i Fara ; ianareo mianadahy ireo tsy tao anaty programa mihitsy, mantsy ireo zandriny 2 farany. Dia hoy izy mianadahy : Dada sy neny an, misaotra an’i Jesoa izahay fa tena Jesoa no nahary anay araka ny endriny ; fa misaotra an’i Dada sy neny koa niteraka anay, fa raha tsy niteraka anay Dada sy Neny, tsy ampy Pasteur anankiroa ny Fjkm. Dia izao tsika miresaka izao, Pasteur izy mianadahy.

Ry havana, ny zavatra lehibe eo amin’ny fiainanao dia izao : tena noforonin’Andriamanitra ianao araka araka ny endriny, ary tena misy antony. Izany no namoronan’Andriamanitra anao eto amin’izao tontolo izao ; ary tsy vitan’izany, fa ny zavatra lehibe ataon’Andriamanitra eo amin’ny fiainantsika dia izao : hay misy fotoana ianao tena raisin’Andriamanitra an-tanana ary batainy apetrany amin’ny toerana anankiray hanehoan’Andriamanitra ny zavatra lehibe. Mandrakariva mantsy ry havana isika rehefa metimety izay ny misy antsika, tsy mety hietsika intsony isika ary ny vavaka ataonao ary dia : « Jesoa an, aza avela hietsika eto intsony izahay fa mety aminay eto ». Tsia ry havana, misy fotoana ianao tena raisina an-tanana tahaka ny zazakely dia trotrona ary esorin’Andriamanitra izay mety heverina hoe efa mety aminao aza, ary misy fotoana isika tena mitomany, manganohano satria tsy fantatsika akory izay mbola hitondran’ny Tompo antsika kanefa tsy maintsy esorina amin’izany isika. Ny tanjon’Andriamanitra dia izao : tarihin’Andriamanitra amin’ny asa lehibe, asa mahagaga ianao ry havana, ary izay no tenin’i Jesoa tamin’i Natanaela, hoe mbola tsy niteny akory aho dia hitako teo ambany aviavy ianao dia hoy Jesoa taminy : izany ve no lazainao ? Mbola hahita zavatra lehibe noho izany ianao. Izany ny fitiavan’ny Tompo ry havana ; ary ny zavatra lehibe ataon’Andriamanitra eo amin’ny fiainantsika, ny fampiarana an’izany dia ireto zavatra anankiroa ireto :
- Mahita fitia tamin’Andriamanitra isika (and.30). Ny dikan’ilay hoe fitia io dia mitovy amin’ilay fiarahabana nataon’ny anjely an’i Maria hoe Arahaba ry ilay nohasoavina. Ilay fitia io dia milaza hoe fahasoavan’Andriamanitra. Izany no hitehirizan’Andriamanitra anao : matoa ianao tahaka izao, tena sitrapon’Andriamanitra fa tsy sitrapon’olombelona, ary tsy sitraponao akory aza, fa tena sitrapon’Andriamanitra ao amin’i Jesoa Kristy ny fiainanao. Ary ny fahasoavana eto dia izao : hay Andriamanitra naneho ny voninahiny sy ny fahefany araka ny teny hoe zavatra lehibe tamiko, fa ny Mahery. Ilay Mahery io ry havana dia milaza hoe dinamita. Izay no dikan’io amin’ny teny fototra, na ny teny grika izany. Ary mifanakaiky aminy hoe ny zavatra lehibe, ny dikany dia izao : tena misy zavatra tsy eritrererinao ho vitan’Andriamanitra, fa Andriamanitra amin’ny alalan’i Jesoa Kristy ilay nandresy ny fahafatesana no mitondra anao mandrakariva ho amin’ny famonjena ary amin’ny fahasoavana.

- Ary tsy vitan’izany ry havana, fa ilay zavatra lehibe ataon’ Andriamanitra eo amin’ny fiainantsika dia izao : mitarika antsika ny Fanahy Masina (and. 35). Ny petrak’olana na problème ry havana dia hoy Maria : « ahoana kay no ahatongavan’izany ? tena tsy haiko izany ». Ary na eo amin’ny fiainanao aza, dia hoe tsy vita intsony izany, tsy misy mahay an’izany. Fa ny dikany dia hoe ny Fanahy Masina mahay zavatra rehetra, ny Fanahy Masina dia manerana ny toerana rehetra, ary ny Fanahy Masina dia manam-pahefana amin’ny zavatra rehetra. Ny zavatra rehetra hain’Andriamanitra ; Andriamanitra mahagaga Izy, izany no hitarihin’ny Tompo anao isan’andro isan’andro. Ry havana malala ao amin’ny Tompo, inona no sitrapon’Andriamanotra ho antsika amin’izany ? Ny sitrapon’Andriamanitra ho antsika dia izao : Aoka ho feno Fanahy Masina sy vavaka ianao. Ny mampiavaka ny filazantsara araka ny Lioka dia manao zav-dehibe ny fiainam-bavaka sy ny fandehanana araka ny Fanahy Masina. Aoka ho fenon’ny Fanahy Masina ianao isaky ny maraina, isan’andro, hoe : « Fanahy Masina o, tariho aho », fa andrirahona sy andriafo no hitarihin’ny Fanahy Masina anao. Mety misy zavatra efa voaomanao tsara, fa misy zavatra kinasin’Andriamanitra ho anao anehoan’Andriamanitra ny heriny eo amin’ny fiainanao Andriamanitra.
Ry havana malala ao amin’ny Tompo, rehefa nanontaniana ireto olona maromaro, sy ny katekomena : « inona kay ny zavatra lehibe nataon’Andriamanitra teo amin’ny fiainanao ? ». Dia hoy ny katekomena anankiray : « narary aho dia nositraniny » ; hoy ny anankiray : « tsy nahita asa aho dia nomeny asa » ; hoy ny anankiray : « niatrika ny fahavalo aho, tena antsy mihitsy no nanambanan’ny fahavalo ahy, fa dia nahagaga fa narovan’Andriamanitra aho ». Ary ny anao kosa mba ahoana mantsy an’ilay tovovavy anankiray ? « Ny ahy ny zavatra lehibe nataon’Andriamanitra ahy teo amin’ny fiainako dia izao : navelan’i Jesoa ny heloko, voavela heloka aho, Jesoa no namela ny heloko.
Ry havana malala ao amin’ny Tompo, izany no hevitry ny teny hoe fahasoavana : voavela heloka aho, mamela helokao ny Tompo.
Ry havana malala ao amin’ny Tompo, ao anatin’izao famaranana ny taona izao dia miandry ny kabarin’ny filoham-panjakana ny maneran-tany. Ny an’ny mpiasam-panjakana, rehefa mikabary ny filoham-panjakana dia fisondrotan-karama no andrasany ; ny olona any am-ponja, famotsoran-keloka no andrasany. Ry havana, ny zavatra sarobidy ho anao amin’izao faran’ny taona izao, na inona na inona mety heverinao hoe fisondrotan-karama , ka na azonao aza izao rehetra izao kanefa very ny ainao, hitondra inona aminao moa ? Fa ny tena harena sarobidy, ny zavatra lehibe tokony tsarovanao anio raha miala eto ianao dia izao : voavela ny helokao, nahita fitia tamin’Andriamanitra ianao. Ary izany no fifaliana, araka ny tenin’ny Soratra Masina hoe misy fifaliana lehibe tahak’izany ny amin’ny mpanota iray izay mibebaka any an-danitra. Ny anjaranao anio ry havana dia ny mibebaka, « tsy hamerina intsony aho Jesoa an, ny amin’ny fahotana izay nataoko. Ary mangataka aminao aho Jesoa, esory amiko izany fahotana izany ». Raha ianao anie no mitantara an’izany amin’i Dada sy Neny e, ry tanora na ry zanaka : « Dada sy Neny an, tsy amerina an’izao fahotana izao intsony aho » : faly Dada sy Neny. Ary Dada sy Neny koa rehefa mifampiresaka, hoe «Dada an, izaho tsy amerina an’izao intsony » amin’i Neny na hoe Neny tsy amerina izao intsony amin’i Dada, dia miteraka fifaliana izany. Ny anjaranao dia ny mibebaka. Satria nahoana ? Nanao zavatra lehibe teo amin’ny fiainanao Andriamanitra. Ary tsy izay ihany, fa amin’izao andro sisa izao, maneke hotarihin’ny Fanahy Masina ianao fa ny fitarihan’ny Fanahy Masina anao ry havana no ahatsapanao tokoa fa sarobidy eo anatrehan’Andriamanitra ianao amin’ny fiantsoany anao.

Fahamarinana 2 : MIFALIA FA MAMINDRA FO HATRAMIN’NY TARANAKA FARA MANDIMBY NY TOMPO
Ny dikan’ny famindram-po dia izao : tena miahy antsika ny Tompo, tena mikarakara anao Jesoa, mikarakara anao Andriamanitra. Dada sy Neny mikarakara ihany, zoky sy zandry mety mikarakara anao, ny mpampiasa anao mety mikarakara anao, fa tsy ampy izany. Fa ny tena mikarakara anao dia Jesoa Kristy ; ary na ny zavatra hatramin’ny antsimpiriany indrindra aza, izany no karakarain’Andriamanitra eo amin’ny fiainanao. Isika mantsy ry havana, jereo anie ny zavatra maneran-tany e, fa na inona na inona fahaizan’ny olombelona, misy fetrany ihany ary misy zavatra tsy voafehinao mihitsy. Fa Andriamanitra mahagaga, Andriamanitra tena miahy antsika, tena mamindra fo amintsika, izany no mikarakara anao isan’andro isan’andro. Ary Izy, mbola tsy ary ianao dia efa nokarakarainy ; tonga eto ianao mbola karakarainy ; mandra-pahantitrao, mandra-pahafotsy volo ary mandrakizay anao, efa karakarain’ny Tompo mandrakizay. Ary ny hevitry ny hoe mamindra fo dia izao : tena miombona amintsika ny Tompo, miara malahelo aminao Izy, miara mitomany aminao Izy, miara mifaly aminao Izy ; izay ny fitiavan’ny Tompo antsika isan’andro ry havana. Izany no fiombonana ary Jesoa ihany no manana an’izany toetra izany ; Izy no mahalala ny momba anao. Fa hitanareo, amin’ny malagasy dia hoe fifalian’ny sasany fahorian’ny sasany – ary fahorian’ny sasany fifalian’ny sasany ; fa ao amin’i Kristy irery ihany ianao no mahatsapa hoe hay Jesoa Kristy miaraka amiko. Ary io ry havana, raha mijery ny hevitra fototra isika dia tsaroantsika, vao nankalaza ny Noely isika : io ilay antsointsika hoe Imanoela, Amintsika Andriamanitra. Mialohan’ny nahafatesan’i Jesoa, Imanoela amintsika Andriamanitra. Rehefa nitsangana tamin’ny maty i Jesoa dia ny zavatra noteneniny tamin’ny mpianatra : momba anareo mandrakariva Aho. Ny dikany dia hoe miaraka aminareo Aho. Misy foto-teny iraisana ao dia hoe miaraka amintsika ny Tompo.
Ao anatin’izao fety izao ry havana, mety ny fiainanao manontolo dia hoy ianao : « irery aho, miady irery aho, tsy misy namana aho, tsy mba misy miantso akory rehefa tonga ny krismasy, na message aza tsy alefan’ny olona akory, tsy nahazo aho ». Tsia ry havana, ny tsaroanao anio dia izao : miaraka aminao ny Tompo ; ary rehefa miaraka aminao ny Tompo dia izao : tena tia anao Andriamanitra, tia anao Jesoa na inona na inona fiheveranao ny tenanao : tia anao ny Tompo. Ary izay ry havana, tsy ianao ihany fa hatramin’ny taranaka mifandimby omen’Andriamanitra anao. Ny dikan’ny hoe taranaka eto ry havana dia izao : ny anankiray dia ny zanaka nomen’Andriamanitra anao, ary ianao izay miaina ankehitriny izao, ary ny fianakaviana manontolo, ary ny fiafarany aza, hatrany amin’ny firenena. Izany no omen’Andriamanitra anao ry havako. Mafy anie ry havana e, tena mafy izany hoe ianao mivavaka : ohatra hoe Dada sy Neny ianal tonga eto, ny zanakao lahy na ny zanakao vavy tsy mivavaka ; na ny zavatra hitranga indray dia izao : ny zanaka lahy sy ny zanaka vavy mivavaka fa Dada sy Neny tsy mivavaka. Ary rehefa manontany hoe : « Dada an, maninona Dada no tsy mivavaka ? », « an an an, rehefa ato an-trano fotsiny aho dia mivavaka e, angaha ianareo mahita izay ataoko ato an-trano ». Mavesatra izany ry havana, ary misy fotoana ary tena hoe mijanona eo aminao ny fiainam-bavaka ; tahaka an’ilay hoe olona mamorona orinasa dia eo amin’ny taranaka fahatelo, mijanona eo amin’izay fa rehefa avy eo tsy mitohy intsony ilay izy. Fa ny fanamby ho antsika ary ny tena fifaliana no antsika ry havana, ary izay ny Alahadin’ny fiantsoana, hatramin’ny taranaka fara mandimby omen’ny Tompo anao dia manaiky fa Jesoa no Tompo sy Mpamonjy ny fiainany. Ary izany no fanantenana ho antsika, izany no harena lehibe indrindra ho antsika ry havako.

Ry havana malala ao amin’ny Tompo, ny taranaka omen’ny Tompo anao eto dia izao : hay efa misy antony mazava mihitsy nanomezan’Andriamanitra ny taranakao ho anao. Misy antony mazava. Hitantsika teo fa ny Dada sy Nenin’i Fara tsy nahalala hoe naninona izy mianadahy ireto no misy ; fa ny taranaka omen’ny Tompo anao dia tena azavain’Andriamanitra hoe ireto ny iraka lehibe ampanaovin’ny Tompo anao eto amin’izap tontolo izao ; ary tsy vitan’izany, fa hay ihany koaa dia efa misy tanjona omen’ny Tompo azy ireo tsirairay avy ; ary tsy vitan’ny hoe tanjona fa efa misy toerana sy vokatra tsara omen’ny Tompo ny taranakao ry havako : aza matahotra ny amin’ny ho avin’ny taranakao, aza matahotra ny ho avinao ry tanora o, aza matahotra ny fitondran’Andriamanitra anao e, fa tsarovy fa izao : rehefa matahotra an’Andriamanitra isika, ny dikan’ny hoe matahotra eto dia hoe tena mivavaka amin’Andriamanitra isika, manolo tena ho an’Andriamanitra, ary tsy vitan’izany aza fa ny hevitr’izany dia hoe tena tia an’Andriamanitra, izany no antom-pisianao : izay sehatra misy anao ry havako, ny antom-pisianao dia Jesoa Kristy irery ihany. Paoly Apostoly manana ny maha-izy azy an, omaly isika namaky ny bokin’ny Filipiana : raha resaka tetiarana, manana aho. Tetiarana izany : firazanana : ananako izany. Eo anatrehan’ny lalàna, tsy mana -tsiny aho ary raha resaka diplaoma, fantatro ary haiko tsara ny zavata rehetra. Fa hoy izy : ataoko fatiantoka izany noho ny fahalalana tsara an’i Kristy. Ary hoy izy : Kristy no anton’ny ahavelomako ary ny fahafatesana no ahazoako tombony. Ny hevitr’izany ry havana, araka ny tenin’i Maria, eo amin’ny and.38. Ny ahafantarana fa tena matahotra ny Tompo ianao ry havana dia izao : voalohany dia izao : tena manolo tena ho an’i Jeso ianao « Anao aho Jesoa manombok’izao ». Ary ny dikan’ny hoe manolo-tena ianao ry havana, rehefa tena manolo tena ianao dia tena fantatrao amin’izay ny hoe eto ny mari-drefy misy ahy. Ao anatin’izao famaranana ny taona izao dia hoy ny mpitantana orinasa hoe andao isika hanao tomban’ezaka : taiza isika teo aloa ary aiza isika izao ary ho aiza isika rapitso ? Di samy manao araka ny fahalalana izay itarihin’ny Tompo azy eo. Fa ianao koa ry havana, ahatonga anao tsy ho diso ny mari-drefy izay andrefesanao ny fiainanao, dia ny ahafantaranao fa tena marina ny fiainanao dia izao : manolo tena ho an’i Jesoa ianao. Ary tsy vitan’izany, fa rehefa tena manolo tena ho an’i Jesoa ianao dia tena mahatsiaro hoe maivana ny entanao, tena maivana. Rehefa nanolo tena ho an’i Jesoa i Maria na Josefa na Zakaria na Elizabeta, dia ny tsaroany diao izao : tena maivana ny fiainany satria misy fanontaniana saro-baliana tsy voavalinao mihitsy eo amin’ny fiainana fa ny fanoloran-tena ho an’i Jesoa, hanananao valin-teny haingana sady mahafa-po ny fiainanao. Jesoa irery ihany no valin-teny tsara indrindra ary mahafa-po eo amin’ny fiainantsika.

Tantara kely anankiray izay fantatrareo : Ronald Reagan, filoham-pirenena amerikana ; 18 taona izy dia ataontsika mifanandrify amin’ny amin’ny Talata izao ny tantara, 01 Janoary 2019. Ny dadatoan’i Ronald Reagan mpanao kiraro, dia hoy ny dadatoany : « Ronald Reagan, inona ny kiraro omena anao amin’ny 01 Janoary ho avy izao amin’ny taom-baovao ? Inona ny kiraro tianao : maranitra ny lohany sa carré carré ny lohany ?» Dia hoy Ronald Reagan hoe aoka aloa izaho hieritreritra dadatoa an. Tonga indray ny Alatsinainy 31 Desambra, inona ihany ilay kiraro tianao ho amin’ny taom-baovao, entinao ? Dia hoy izy hoe aoka aloa aho hieritreritra ihany dadatoa aloa an. Safidy roa no omeko anao : na kiraro maranitra ny lohany, na carré carré. Dia tonga ny 01 Janoary, iny amin’izay izy nitondra an’ilay kiraro. Omeko anao amin’izay ny kiraronao anaka. Faly ery Ronald Reagan, inona re izany kiraro izany ! Navoakan’ny dadatoany ilay kiraro : ny ankavia maranitra ny lohany, ny ankavanana carré carré ny lohany. Dia nihomehy ohatranareo izany i Ronald Reagan dia hoy ny dadatoany : rehefa tsy manapa-kevitra ianao anaka, ny olona no manapa-kevitra amin’ny fiainanao. Ary rehefa tsy manapa-kevitra ianao, dia izao tontolo izao no mibaiko ny fiainanao. Ny fanapahan-kevitra tsara indrindra dia Jesoa Kristy, ary tsy hanenina ianao rehefa manapa-kevitra fa Jesoa no Tompo sy Mpamonjy anao ; ary tsy vitan’izany ry havana, fa ny olona izay tena mahatsapa hoe matahotra ny Tompo, manolo tena izy fa manetry tena. Ilay teny hoe ankizivavin’ny Tompo ry havana dia teny anankiray marary antsika ny mandre azy. Ary tsy zakanao mihitsy ary tsy tianao averimberina dia ilay teny hoe « andevo ». Ny dikan’io ry havana dia izao : ny olona izay tena matahotra ny Tompo dia tena mahatsapa mandrakariva hoe tena mietry ary manetry tena mandrakariva. Na inona na inona fanandratan’ny olona anao, na inona na inona fahombiazanao, manetre tena, omeo voninahitra Andriamanitra Ray, zanaka sy Fanahy Masina, fa izany no fifaliana ho anao ; ary misaora an’i Jesoa amin’izay fitondrany anao, amin’ny fitondrany ny fianakavianao, ny fiainanao iray manontolo : isaory an’Andriamanitra izany. Ho avy ny famaranana ny taona, na inona na inona fandaharam-potoananao, soraty avokoa ny anaram-pianakaviana ary ataovy zava-dehibe ny fivoriam-pianakaviana hivavaka ary hanapa-kevitra hanompo an’Andriamanitra Ray, zanaka ary Fanahy Masina, tahaka ny tenin’i Josoa manao hoe Raha izaho sy ny ankohonako, dia hanompo an’i Jehovah izahay. Ataovy zava-dehibe ry havana o, amin’izao famaranana ny taona izao, mitondra ny fianakaviana : raha Dada sy Neny ianao no eto, ataovy ho zava-dehibe ny famoriana ny taranaka. Ny tanjona dia izao : hanolo tena ho an’i Jesoa ny ankohonana. Raha zoky ianao no eto, ataovy ho zava-dehibe ny fiantsoana ny zandry hanolo tena ho an’i Jesoa fa izany no harena sarobidy indrindra ho azy ireo.

Fahamarinana 3 : MIFALIA FA MITANA NY TENY FIKASANY NY TOMPO
Inona ny hevitr’izany teny eo in’ny and.55 izany ? Ny tenin’Andriamanitra izay lazaina eto dia izal : izany tenin’Andriamanitra izany dia marina eo amin’ny fiainantsika
Ny eto amin’izao tontolo izao dia miovaova ny marina ; ary rehefa miady hevitra amin’ny olona ianao dia hoy ny olona hoe marina aminao izany fa tsy marina aminay. Fa ahatonga anao ry havana, tena ahatsapa ny fahamarinana dia izao : ny tenin’Andriamanitra irery ihany. Fa Jesoa Kristy ilay lalana sy fahamarinana ary fiainana. Ary tsy izany ihany ry havana, fa io fahamarinana lazainy io dia izao : Andriamanitra mihitsy no manambara ny marina eo amin’ny fiainanao. Izany hoe iharany isika. Fa misy fotoana isika na dia te hanao zavatra tsara aza, voafetra ihany. Ary tsy manana tanjam-panahy na finiavana ; fa noho ny asan’ny Fanahy Masina, amin’ny fitiavan’Andriamanitra antsika, dia Izy mihitsy no manambara izany eo amin’ny fiainantsika. Ary tsy izany ihany, fa ilay fikasan’Andriamanitra dia izao : mba hahatonga ny fiainanao ho azo antoka, hahatsapanao ny tombom-pahasoavana omen’Andriamanitra anao. Tsy maty antoka ianao rehefa niaraka amin’i Jesoa teto amin’izao tontolo izao raha namakivaky ny taona 2018 ; ary tena tsaroanao fa tena nilain’Andriamanitra ianao, tena nilain’i Jesoa ianao. Misy fotoana mantsy isika ry havana rehefa miresaka amin’ny olona, rehefa vita ohatran’izao ny asa, dia hoy isika indraindray milaza hoe inona moa izay izahay e ? Izahay angaha mba ilaina akory ! Tsia ry havana, tsy izany intsony ny ho valin-teninao manomboka izao. Hay tena nilain’i Jesoa ianao, ary zava-dehibe eo imason’ny Tompo ianao. Satria nahoana ? Misy tanjona feno fandrosoana hatrany hitarihan’ny Tompo anao ; ary ny dikan’izany dia izao : Izy Andriamanitra efa nanao ny fanekeny tamin’i Davida sy Abrahama,zanaky ny fanekena, ambara eo amin’ny fiainanao fa Izy no manome antoka anao, antoka izay ahatsapanao ny famonjena. Ary tena ahatsapanao ihany koa izany tena fitondranao Andriamanitra, fa ho avy Ianao, ho avy Ianao. Ary ny dikan’ny hoe ho avy dia izao : efa manomana antsika sahady ny Tompo ; fa ho avy Jesoa, manomana antsika ny Tompo mba hiova toetra isika ary hibebaka isika, ary indrindra indrindra hananantsika koa izany famonjena mandrakizay mandrakizay izany. Hoy ny and.79 : « Hamirapiratra amin’izay mipetraka ao amin’ny maizina sy ao amin’ny aloky ny fahafatesana, hanitsy ny diantsika ho amin’ny làlam-piadanana ». Ry havana malala ao amin’ny Tompo, inona no dikan’izany teny izany ? Ny dikan’izany dia izao : ny fitarihan’i Jesoa antsika ry havana dia fitarihan’i Jesoa ho amin’ny fiadanana. Ny dikan’ny hoe fiadanana dia ho amin’ny firindrana : tena arindran’ny Tompo ny fiainanao manontolo, ary tsy vitan’izany fa ho amin’ny filaminana. Ary ny dikan’ny hoe filaminana dia hoe tena tsara ny fifandraisanao amin’Andriamanitra, amin’ny alalan’i Jesoa Kristy ilay niantso sy nifidy ary nanolorany tena ka azonao antoka ny famonjena.
Hoy ny teny fanevantsika ry havana manao hoe : « Ho avy faingana Aho ; tano mafy izay anananao mba tsy hisy haka ny satroboninahitrao ». Inona no dikan’izany ? Fehiny dia izao : ny efa nomen’ny Tompo anao ry havana, tazomy tsara izany. Aza atakalo fa sarobidy ny famonjena nomen’i Jesoa ho anao. Ary izany no nahatonga ireo mpaminany maro ao amin’ny Soratra Masina, rehefa tambatambazan’ny olona maro izy, dia izao no lazainy hoe ento ho anao ny anao ho an’olon-kafa. Ary izay no mahatonga ny hiran’ireo kristiana ray aman-drenintsika hoe : Ampy ahy Jesoa hatrety, ampy ahy Jesoa hatrary. Tazomy mafy ry havana. Ary ny hevitr’io hoe tazomy mafy io dia tahaky ny manam-pahefana ry havana na mpitandro filaminana izay misalotra olona anankiray. Dia tahak’izany koa ny atao hoe fisamboranao, fihazonanao mafy ny famonjena ao amin’i Jesoa Kristy. Ny famonjena ao amin’i Jesoa Kristy, izany no miteraka famonjena sy fahasoavana. Ary ny fahasoavana dia satrohin’Andriamanktra ny satroboninahitra ianao. Mifarana ny taona ry havana : aza mijery izay hoe inona ny fahalemenao, fa mety voafetra ihany ianao amin’ny famaritanao izany ; fa manomboka izao, jereo Jesoa Kristy ilay niantso sy nifidy anao ary manomboka izao, tazomy mafy ny finoana efa ao anatinao ; ary ny dikan’izany dia izao : hoy ny Soratra Masina : « Ho avy faingana Aho ; tano mafy izay anananao mba tsy hisy haka ny satroboninahitrao ».

Ho an’Andriamanitra ny voninahitra, ho amintsika kosa ny fahasoavany.

Amena.