Archives de la catégorie: Toriteny

Toriteny alahady maraina na fanompoam-pivavahana hafa

"Kanefa manan-teny aminao Aho, satria efa niala tamin’ ny fitiavanao voalohany hianao. Koa tsarovy izay nitoeranao fony tsy mbola lavo, dia mibebaha, ka manaova ny asa voalohany; fa raha tsy izany, dia ho avy aminao Aho ka hamindra ny fanaovan-jironao hiala amin’ ny fitoerany, raha tsy mibebaka hianao". Apokalipsy 2:4-5

1 Petera 3 :18 : « Fa Kristy koa aza efa nijaly indray mandeha noho ny ota, ny Marina hamonjy ny tsy marina, mba hitondra antsika ho amin’ Andriamanitra, ka novonoina tamin’ ny nofo, fa novelomina tamin’ ny fanahy ».

Ny Fahamarinana 1 ry havana, izay omen’ny Tompo antsika Fiangonana amin’izao maraina izao, dia hoe : MIFALIA AMIN’NY FAHORIANAO. Tsy hoe : ekeo ny fahorianao ; tsy hoe : misaora amin’ny fahorianao. Fa ampiana hoe : MIFALIA AMIN’NY FAHORIANAO. Rehefa mety fahoriana dia hifalio.

Izay no Fahamarinana 1 : MIFALIA AMIN’NY FAHORIANAO. Izany no ataon’ny olona te hiorina ao amin’ny Tompo ry havana ô : mifaly amin’ny fahoriana. Filipiana 1 :29. Mahavariana ity texte ity rehefa imasoana manokana tahak’izao ry havana : « Fa hianareo efa nomena noho ny an’ i Kristy, tsy ny hino Azy ihany, fa ny hiharam-pahoriana koa noho ny aminy ». Fahazarana eto moa, ilay mampahatsiahy an’ilay teny frantsay amin’ny version Segond, hoe : « Car il vous a été fait la grâce, non seulement de croire en Christ, mais encore de souffrir pour Lui ». Inona moa no lazain’i Paoly ry havana ? Manamafy ny zavatra lazain’i Petera : matoa izaho mino an, matoa ianao mino : tsy hoe hendry kokoa noho ny hafa ianao, tsy hoe matanja-tsaina kokoa noho ny hafa ianao, na mana-tsaina kokoa noho ny hafa, dia hoe : hino aho ; an an an ; fahasoavana nomena anao izany, grâce-n’Andriamanitra izany. Dia hoy Paoly ao amin’ny Filipiana 1 :29 hoe ny fahasoavana nomena anao : tsy hino an’i Jesoa ihany, fa ny hiharam-pahoriana noho ny Aminy. Izany ny Fahamarinana ampahatsiahivina antsika. Inona moa no dikan’izany ? Maninona no ampahatsiahivina ao amin’ny fiandohan’ny perikopa hoe : Kristy koa aza efa nijaly ? Ianao mijaly ry havana, dia tena hoe tombokase izany fa tena manana finoana marina. Ianao mijaly ry havana, dia manana antoka ianao, n’inon’inona fijalianao, n’inon’inona fahorianao, fa manara-dia an’i Kristy ianao. Izay lalàna nizoran’i Kristy tety an-tany dia izoranao rehefa mijaly ianao, rehefa ao anaty fahoriana ianao. Ary mieritrereta ihany ry havana ô, raha milamina be ny fiainanao, raha lavi-pahoriana ny fiainanao. Mandinia tena ny amin’ny finoanao. Nahoana no atao hoe : mifaly aho amin’ny fahoriana ? Satria faly aho fa tena kristiana izany e. Faly aho fa tena manara-dia an’i Kristy izany e, noho io fahoriana atrangany eo amin’ny fiainako io ry havana ô. Ka tsy hoe manaiky fotsiny aho ; tsy hoe misaotra fotsiny aho ; fa mifaly : faly aho Jesosy fa tena mpianatrao, tena disciple-nao, faly aho Jesosy fa tena zandrikelinao an.

Nisy Pasitera izay nandeha retraite tany Etats-Unis tany, dia izy io noho ny nandraisany ny antson’ny Tompo ho Pasitera, dia nanao fianarana Comptabilité. Dia rehefa ren’ny tao am-piangonana fa andeha retraite Pasitera nefa mbola salama, mavitrika Pasitera, dia notenenina olona vitsivitsy tompo-na orinasa, hoe : maninona raha manao comptable ao aminay ianao, fa mila olona mahatoky, mila olona manao ny marina izahay ? Dia nanaiky ilay Pasitera. Inona ny zavatra nitranga anefa ? Inona ny zavatra nitranga ? Hay ilay olona niantso azy, ilay tompon’ilay orinasa, ilay associé amin’ilay orinasa tena olona tena ratsy fanahy, manao izay tsy fahamarinana rehetra izao. Ka rehefa tonga ny enquête-ny polisy, ilay Pasitera no tratra farany teo, ilay Pasitera no nigadra ; fa ilay tompon’ilay orinasa tsy voaroiroy noho ny hafetseny. Dia nigadra ilay Pasitera. Nijoro vavolombelona ilay Pasitera, ary ny niara-nigadra taminy nahita an’izany : tsy mbola nahita olona faly ohatran’izany taty am-pigadrana. Satria naninona ? Nifaly izy tamin’ilay fahoriana, faly izy tamin’ilay fahoriana. Dia tany am-pigadrana : tsy be koretaka teo izy na naninona, fa hoe : nataony toerana itoriana filazantsara ilay prison iray manontolo. Ary faly izy fa hoe : « izany kay ny sitrapon’ny Tompo amiko », amin’izany fisotroany ronono izany : tsy hanao comptabilité-na entreprise fa mbola hoe hitory filazantsara hatramin’ny fara-fofon’ainy mba ho fampidirana olona any an-danitra ry havana ô.

Izay ny Fahamarinana 1 : MIFALIA, MIFALIA AMIN’NY FAHORIANA N’INON’INONA FAHORIANA ; FA MARIKA IZANY FA MANAHAKA AN’I KRISTY IANAO.

Jerentsika anie ny Asan’ny Apostoly 8 e, hamaranana an’izay Fahamarinana 1 izay. Asan’ny Apostoly 8 :1 : « Ary tamin’ izany andro izany dia nisy fanenjehana mafy tamin’ ny fiangonana tany Jerosalema; ka dia niely teny amin’ ny tany Jodia sy Samaria izy rehetra, afa-tsy ny Apostoly ihany ». Maninona no tsiahivina io texte io ry havana ? Petera izay manafatra antsika, hoe : MIFALIA AMIN’NY FAHORIANA : tsy manao catéchisme izy an, izy nosamborina an, dia nogadraina an, notsaraina an ; tena niainany izany fanenjehana izany. Fa jereo tsara ny vokatr’ilay fanenjehana tao Jerosalema : nandositra ilay tena kristiana, nandositra fanenjehana. Fa iny fandosiran’ny kristiana iny an, nahatonga ny filazantsara niely niala tao Jerosalema, fa nanerana an’i Jodia, nanerana an’i Samaria. Izany hoe nahatanteraka ilay programa fitoriana ny filazantsara. Ry havana ô, MIFALIA AMIN’NY FAHORIANA. Ary tsarovy mandrakariva fa tsy ny mpampahory anao no tompon’ny teny farany, fa Kristy izay milaza aminao, hoe : MIFALIA AMIN’NY FAHORIANA.

Izay no Fahamarinana 1 ry havana.

Ny Fahamarinana 2 dia izao : IALAO IZAY MAMPIGADRA

Andao averintsika vakiana ny and.18 sy 19 : « Fa Kristy koa aza efa nijaly indray mandeha noho ny ota, ny Marina hamonjy ny tsy marina, mba hitondra antsika ho amin’ Andriamanitra, ka novonoina tamin’ ny nofo, fa novelomina tamin’ ny fanahy, (Kristy izany io hoe novonoina tamin’ny nofo io, fa novelomina tamin’ny Fanahy)  izay nandehanany sy nitoriany teny tamin’ ireo fanahy tao an-trano-maizina ». Misy Fanahy izany eto amin’ity perikopantsika ity, izay ao an-trano-maizina. Dia hoy isika amin’ilay Fahamarinana 2 hoe : IALAO IZAY METY MAHATONGA ANAO ANY AN-TRANOMAIZINA – IALAO IZAY MAMPIGADRA ANAO.

Ilay figadrana resahana aloha dia mazava ho azy, raha maka ny fiainantsika andavan’andro, hoe : ialao izay mahatonga anao ho any Antanimora, na ho any Tsiafahy ; quoi que : eto Mada, izaho tsy mpitsara fa mpamaky gazety : indraindray hafahafa ihany ny fitsarana. Fa ialao, ialao.   

Fa eto an, tranomaizina hafa ity resahana eto ity. Ary io no tena trano-maizina ialana ry havana, io no tena tranomaizina ialana. Aiza ity tranomaizina ity ? Ity trano-maizina ity dia toerana antsoin’ny Baiboly hoe : fiainan-tsy hita. Rehefa maty ny olona dia midina any amin’ny fiainan-tsy hita. Dia mizara 3 io fiainan-tsy hita io araka ny Baiboly:

• Ao izany an, ilay olo-marina izay maty talohan’ny nahatongavan’i Kristy. Io ilay paradisa resahan’i Jesoa. Asa raha tsaroanareo, ilay tenin’i Jesoa tamin’ilay jiolahy nibebaka tamin’ny minitra farany teo anilany teo amin’ny hazo fijaliana, nitenenany hoe : « anio no hihaonanao Amiko any paradisa ». Tsy ilay Paradisa any an-danitra io ; fa paradisa ato amin’ny fiainan-tsy hita.
• Dia misy hantsana ; izay ny partie faharoa.
• Dia ny helo. Io ilay trano-maizina misy an’ireto fanahy ireto.

Izany hoe :

• Ato izany ireo olom-bavonjy talohan’i Kristy noho ny finoany an.
• Ilay hantsana mampisaraka, izay tsy azo iampitàna
• Dia ity ilay trano-maizina misy an’ireto olona izay itorian’i Kristy teny ireto.

Izay ilay izy an : « novonoina tamin’ny nofo Izy, fa novelomina tamin’ny fanahy, izay nandehanany sy nitoriany teny tamin’ ireo fanahy tao an-trano-maizina ». Inona moa izany no lazaina, dia mba hazava tsara ? Rehefa miteny isika amin’ny fanekem-pinoana isaky ny Alahady hoe : « nidina tany amin’ny fiainan-tsy hita » ; io izy io ry havana : « nidina tany amin’ny fiainan-tsy hita ». Iza no nidina tany amin’ny fiainan-tsy hita ? Jesoa. Fa maninona Petera no miteny hoe : « novelomina tamin’ny fanahy » ? Ilay fotoana nidinan’i Jesoa tany amin’ny fiainan-tsy hita, dia ilay fotoana nitoerany tao am-pasana. Ny tenany tamin’ny andro fahatelo no nitsangana tamin’ny maty ; fa Izy ilay hoe novelomina tamin’ny fanahy io, hoe ry havana: ny fanahin’i Jesoa no nandeha nidina tany amin’ny fiainan-tsy hita nitory tamin’ireto olona tao an-trano-maizina ireto. Izay ilay fandehany izany : ny faanhin’i Jesoa, fa tsy ny vatany, no nitory tamin’ireto olona ireto ; ny vatan’ireto olona ireto koa mbola tany am-pasana nitory tamin’ny fanahiny. Inona moa izany no notoriany tamin’ireto olona ireto ? Rehefa mamaky hevi-teny ianareo ry havana, dia hoe : ity verset 18 sy 19 ity no versets sarotra indrindra ao amin’ny Baiboly. Be dia be ny zavatra tsy takatra, fa izay takatra aloha dia ambara. Izay ilay méthode. Dia hoe : « izay nandehanany sy nitoriany teny tamin’ ireo fanahy tao an-trano-maizina ». Iza ireo fanahy ireo ? « Dia izay tsy nanaiky fahiny, fony niandry ny fahari-pon’ Andriamanitra tamin’ ny andron’ i Noa ». Ireo izany ilay fanahy, na ilay olona moa izany tamin’ny fahavelony, izay nitorian’Andriamanitra teny tamin’ny alalan’i Noa. Ary tsy nitoriana indray mandeha ; fa Andriamanitra manana fahari-po : mitory Izy androany 12, mitory izy rahampitso 13, mitory izy rahampitso 14, mitory Izy rahampitso 15. Fa tsy noraharahiany izany. Tsy noraharahiany ny fahari-pon’Andriamanitra. Ny olona tsy miraharaha ny fahari-pon’Andriamanitra ry havana : ny hiafarany : any an-trano-maizina. Izay no mahatonga antsika hiteny hoe : IALAO IZAY MAMPIGADRA. Ianao manao tsinontsinona ny fahari-pon’Andriamanitra io : higadra no hiafaranao.

120 ans no nanamboarana ny sambofiara. Izay 120 taona izay no faharetan’izany hoe fahara-pon’Andriamanitra tamin’ny andron’i Noa izany ry havana. Ary inoana fa io Noa izay manomboka mandrafitra an’ilay sambofiara io, i Noa izay hoe manapaika maritoa, mamantsika an’ilay sambofiara io, sns… tsy hoe mandrafitra planche fotsiny izy ho an’ilay sambofiara ; fa isaky ny mandrafitra planche izy ka mahita olona maniratsira, maneso, manevateva ; isaky ny mamantsika izy, azo antoka fa izay hoe famantsihana rehetra, izay fametrahana planche rehetra dia elanelanina teny fitaomana ho amin’ny fibebahana an’ireo maniratsira azy ireo. Satria ny fanahin’ny Tompo tao am-pon’i Noé dia tena hoe : tsy tiany ho any an-trano-maizina ireo mpaniratsira ireo. Raiso au sérieux amin’izay ry havana ny tenin’Andriamanitra an. Raiso au sérieux ny tenin’Andriamanitra. Ary matoa ianao mbola velon’aina androany 12 Septembre :antony tokana, antony tsotra : mahari-po aminao Andriamanitra. Ary isaky ny mifoha maraina ianao, aza mifoha amin’ny fahazarana e, aza mifoha tahaka ny hoe mandeha ho azy izany ; fa derao Andriamanitra hoe : waouh !velon’aina aho satria mahari-po amiko ianao.

Ary Jesoa hoe mitory teny any io, tsy fantatra marina izay votoantin’ilay toriteny ; fa misy fahamarinana ihany ilay fitenenana hoe : tonga tany Izy niteny amin’ireo : « hitanareo, hitanareo » ; toy ny miteny amin’ireo fanahy ao an-trano-maizina ireo hoe : « azonareo tsara ve izany ilay adalanareo, ny ditranareo e ? ». Ary indrindra indrindra, Jesoa nidina tany ry havana, ka mametraka an’izany eo ambany masontsika, hoe : « eee, Izaho ange miteny aminareo : ialao izay mampigadra e ». Izany ny teniny amintsika amin’izao maraina izao : IALAO IZAY MAMPIGADRA ANY AMIN’NY FAHAVEREZANA MANDRAKIZAY ry havana ô. Aoka ianao ho naman’i Noa 8 mianaka : olom-bitsy nandeha tamin’ny fahamarinana.         

Nisy mpanompon’Andriamanitra anankiray izay, faran’izay mahatoky, fa teneniko izay zavatra noteneniny ; fa tsy hitako ilay source fa izy mahatoky dia inoana hoe mahatoky ny zavatra teneniny : ry Noa 8 mianaka nandeha tamin’ny fahamarinana, tsy nanivahiva ny fahari-pon’Andriamanitra. Firy ny isan’ny olona izay hoe ringana tamin’io tety ambonin’ny tany ? 8.000.000 hoy ilay mpandinika. Ianao ry havana ô, aoka hinamana amin’ireo 8, ilay an-kavitsiana. Aza miombona amin’ny fanaon’izao tontolo izao, hoe ilay 8.000.000 eto amin’izao tontolo izao manao an’izao ; eny e, Pasitera, efa reko, efa reko ; an an an : jereo ihany izay olom-bitsy ary meteza ianao ho namany. Maka ohatra aho izao e : rehefa mba miteny ianao hoe : « tsy efa mba ampy ve izay ny kolikoly e » ; « ka io Pasitera tsy avotra intsony an » : anya m-pigadrana ny hiafaranao an. Mety tsy miditra any Antanimora, any Tsiafahy ianao an ; fa any amin’ity trano-maizina ity no hiafaranao ry havana.

Izay ny Fahamarinana 2, hoe : IALAO IZAY MAMPIDITRA ANY AN-TRANOMAIZINA.

Rehefa tonga ny fara-fofon’aintsika, izay isika vao tsy hanota intsony. Fa ny angatahana amintsika isan’andro dia miezaka hanana fieritreretana tsara araka ny tenin’i Petera eto : voadio amin’izao mahaloto azy, araka ny efa nolazaina tamin’ny 5mn teo ; voadio amin’izany. Voadion’ilay rà nalatsaka teto. Izany no lazain’i Petera ry havana ô. Dia voaloto indray rahampitso, dia manadio, manadio, manadio ny eritreritro aho mba tsy hanana conscience manameloka ahy : « ianao koa mba mitory teny ohatran’io nefa jereo ity ataonao ». Izany. Rehefa tsy manao izany ianao ry havana : any an-trano-maizina no hiafaranao.

Ny Fahamarinana 3 farany eo amin’ny and.22 : « Izay eo amin’ ny tanana ankavanan’ Andriamanitra; fa efa lasa ho any an-danitra Izy ka efa nampanekena Azy ny anjely sy ny fahefana ary ny hery ». TSAROVY MANDRAKARIVA FA JESOA ANKEHITRINY DIA EO AN-TANAN’ANKAVANAN’ANDRIAMANITRA.

Misaotra ny Tompo moa ny amin’izay hoe fifampiarahabantsika hoe : « Nitsangana tamin’ny maty Kristy ». Dia mamaly hoe : « Eny, nitsangana tokoa Izy ». Fampatsiahivana hoe izany ny fototra e. Izany ny fototra. Be dia be ny kristiana manompo Andriamanitra maty. Na manompo Jesoa tsy nitsangana tamin’ny maty, dia izay no karazana hoe fampatsiahivana antsika ry havana. Fa izao : ny zavatra tenenina antsika androany dia hoe: aza alàna ao an-tsainao fa saino mandrakariva ry havana ô, fa Jesoa ankehitriny dia eo an-tanan’ankavanan’Andriamanitra. « Efa lasa ho any an-danitra Izy ka efa nampanekena Azy ny anjely sy ny fahefana ary ny hery ».

Ny dikan’ilay hoe eo an-tanan’ankavanan’Andriamanitra an, raha hanao séminaire un week-end aza isika tsy ho lany. Fa fahamarinana vitsivitsy : eo an-kavanan’Andriamanitra : nampanekena Azy ny anjely sy ny fahefana ary ny hery. Izay rehetra manana fahefana, any an-danitra na ety an-tany, dia eo ambany fahefan’i Jesoa ry havana. Eo ambany fahefan’i Jesoa. Io tompon’ny orinasa mampiasa anao io, ingahy Rajoelina, ingahy Ravalomanana, sy ny hafa izay tsy fantatra : eo ambany fahefan’i Jesoa izany. Izany no ambaran’ny Soratra Masina. Izy nakarin’Andriamanitra any an-danitra.

Hebreo 1 :13 ange jerentsika e : « Fa anjely iza no mba nilazany hoe: "Mipetraha eo an-tanako ankavanana, Ambara-panaoko ny fahavalonao ho fitoeran-tongotrao"? ». Raisina ho fahavalo moa izay rehetra mampahory anao, satria isika atao hoe : « mifalia amin’ny fahoriana ». Io fahavalo hitanao maso io, eritrereto amin’ny finoana hoe : efa ataon’Andriamanitra fitoeran-tongotr’i Jesoa io ry havana ô. Mampahory anao izy, possible ; fa efa ataon’Andriamanitra fitoeran-tongotra. Dia hoy Izy : « vitanao ny hiaritra fahoriana, vitanao ny hisaotra an’Andriamanitra noho ny fahoriana, vitanao ny hifaly amin’ny fahoriana ».

Romana 8 :34 : « Iza no manameloka? Kristy Jesosy no efa maty, eny, sady nitsangana tamin’ ny maty koa ka mitoetra eo amin’ ny tanana ankavanan’ Andriamanitra ary mifona ho antsika ». Ary mifona ho antsika.

Ary farany, Asan’ny Apostoly 7. Ity izany an, Stefana toraham-bato ho faty. Dia efa akaiky mihitsy ilay ora, ilay minitra ialany aina. Dia hitany i Jesoa mitsangana any an-danitra ; Asan’ny Apostoly 7 :56 : « dia nanao hoe: Indro, hitako ny lanitra misokatra ary ny Zanak’ olona mitsangana eo ankavanan’ Andriamanitra ». Angaha tsy mipetraka indray Izy e ? Eo Izy : mitsangana.

Inona moa, rehefa miteny isika ry havana hoe : saino mandrakariva fa Jesoa amin’izao fotoana izao eo an-kavanan’Andriamanitra ?

1. Manana ny fahefana rehetra.
2. Manangona ny fahavalonao eo ambany tongony.
3. Mifona ho anao ankehitriny.

Izany no mbola maha-velon’aina ahy :mifona ho ahy Izy. Ary rehefa tonga ny fotoana ialako ety ; raha izany ny fiainako, dia mitsangana Izy handray ny fanahiko ; mitsangana Izy handray ny fanahiko, fa tsy matimaty foana aho ry havana ô. Mba irio izany hoe manakaiky ny fotoana ialanao aina, n’inon’inona circonstance, dia mahatsiaro an’ity tantaran’i Stefana ity ianao, hoe : « waouh, fantatro fa efa mitsangana Jesoa Kristy zokiko ao an-danitra ao handray ny fanahiko ».

Izay ny hafatra ho antsika ry havana androany, izay te hampiorina ny finoantsika :

1. Mifalia amin’ny fahoriana
2. Ialao izay mampigadra
3. Ary tsarovy mandrakariva fa efa mipetraka eo an-kavanan’Andriamanitra Jesoa

Ho an’Andriamanitra irery anie ny voninahitra. Amena.                     

Asan’ny Apostoly 10 ry havana, Asan’ny Apostoly 10. Ho singanintsika ny and.44. Asan’ny Apostoly 10 :44 : « Raha mbola nilaza izany teny izany Petera, dia nilatsaka tamin’ izay rehetra nandre ny teny ny Fanahy Masina ».

Ny nandre ny teny eto, ka nilatsahan’ny Fanahy Masina dia lehilahy antsoina hoe : Kornelio, kapiteny romana ; jentilisa izany. Fa efa nanomboka nitoriana ny tenin’Andriamanitra izy an, nitorian’ny jiosy an, dia efa nanomboka nanatona. Dia, mihaino tsara ny toritenin’i Petera izy, mihaino tsara izy ; dia eo am-pitoriana teny eo Petera, mbola tsy tapitra ny toritenin’i Petera, dia milatsaka ny Fanahy Masina amin’i Kornelio sy ny ankohonany. Hita eo hoe : milatsaka ny Fanahy Masina amin’i Kornelio sy ny ankohonany. Efa nilatsaka, raha ity texte ity izany, tamin’i Kornelio sy ny ankohonany ny Fanahy Masina. Ilay fanontaniana ry havana malala dia izao : EFA NILATSAKA TAO AMINAO VE NY FANAHY MASINA ? Tsy manontany anao ny Tompo, hoe : inona moa ny andraikitrao ato am-piangonana ato : Pasitera ve ianao, mpiandry ve ianao, diakona ve ianao, mpitendry orgue ve ianao, mpamoron-kira ve ianao, fihoan-tsampana ve ianao? Manontany anao ny Tompo hoe : EFA NILATSAKA TAO AMINAO VE NY FANAHY MASINA ry havana ô?

Ny Fahamarinana 1 dia izao, ho an’ny olona manontany tena hoe : efa nilatsaka tamiko ve ny Fanahy Masina ; ny Fahamarinana 1 dia izao, ny fampieritreretana voalohany dia izao, hoe : FANTATRAO VE NY FANAHY MASINA ALOHA E ?

Ankoatran’ny hoe : Andriamanitra telo Izay iray, dia hoe : ny Fanahy Masina no « personne » fahatelo amin’izany trinité izany. Fantatrao ve ny Fanahy Masina ry havana ? Izay ny Fahamarinana 1, izay ny fampieritreretana voalohany.

Andao ange jerentsika any amin’ny Testament Taloha e : ny fiasan’ny Fanahy Masina :

• 1 Tantara 21 :26. Nanorina alitara Davida ry havana :« Ary Davida nanorina alitara teo ho an’ i Jehovah ka nanatitra fanatitra odorana sy fanati-pihavanana; dia niantso an’ i Jehovah izy ka novaliany tamin’ ny afo avy tany an-danitra, izay latsaka teo amin’ ny alitara fandoroana ny fanatitra odorana ». Io : Fanahy Masina milatsaka avy any an-danitra ry havana ô.      
• 2 Tantara 7 :1 :« Ary rehefa vita izany vavak’ i Solomona izany, dia nisy afo latsaka avy tany an-danitra ka nandevona ny fanatitra odorana sy ny fanatitra hafa alatsa-drà, ka feno ny voninahitr’ i Jehovah ny trano ».
• Texte farany jerentsika, ao amin’ny 1 Mpanjaka, alohakelin’ny Tantara : 1 Mpanjaka : tantaran’i Elia mpaminany tao ry havana, raha nifanandrina tamin’ny mpaminanin’i Bala ; 1 Mpanjaka 18 :38 :« Dia latsaka ny afon’ i Jehovah ka nandevona ny fanatitra odorana ».  Io afo milatsaka avy any an-danitra io ry havana, io : afon’ny Fanahy Masina io. Ary io Fanahy Masina io no milatsaka ato amin’ny Asan’ny Apostoly 10 tamin’i Kornelio sy ny ankohonany. Ary io afo io nilatsaka tamin’ny fanatitra nataon’i Davida sy Solomona, tamin’i Elia. Ary io afo io no mbola niseho tamin’ny Pentekosta ry havana, Asan’ny Apostoly 2 :2 : « Ary nisy feo tonga tampoka avy tany an-danitra, toy ny rivotra mahery mifofofofo, ka nanenika ilay trano niangonany. Ary nisy lela maro mitarehin’ afo niseho taminy, izay nizarazara; ary nipetraka tamin’ izy rehetra isan-olona izany ».

Rehefa miteny isika hoe : Fantatrao ve ny Fanahy Masina ? Fantatrao ve ny Fanahy Masina ? Izany no asan’ny Fanahy Masina rehefa midina avy any an-danitra Izy. Hitan’izay rehetra rehetra manatrika eo izany : « Raha mbola nilaza izany teny izany Petera, dia nilatsaka tamin’ izay rehetra nandre ny teny ny Fanahy Masina ». Kornelio sy ny ankohonany izany.

Ry havana malala ao amin’ny Tompo ô, amin’izao alahady maraina 05 Septembre izao : tian’Andriamanitra halatsaka ao aminao sy ny ankohonanao ny Fanahy Masina, raha mazoto amin’izany ianao. Fa raha tsy mazoto amin’izany ianao, raha tsy fantatrao akory ny Fanahy Masina : diso hevitra ianao : tsy misy Fanahy Masina hilatsaka ao aminao ry havana ô.

Ny problemantsika Fiangonana, ataoko hoe isika Fiangonana ; tsy hoe isika Isotry Fitiavana ; isika Fiangonana zokiny, ao koa ny Fiangonana zandriny, ao koa ny secte : tena maro ry havana ô, no tsy mbola nifanena tamin’ilay Andriamanitra velona, tahaka an’i Mosesy tao Horeba, nahita an’ilay afo tao anaty roimemy ry havana ô. Izay ilay ifanenana amin’Andriamanitra velona. Ka rehefa tsy mifanena amin’Andriamanitra velona ianao : fantatrao intellectuellement, fantatrao ao an-tsainao Andriamanitra e. Fa fahalalana an-kandrina izany, fahalalana ao an-tsaina izany, fahalalana intellectuel izany. Manao Sefala ianao, manao Setela ianao : mitombo amin’ny fahalalana intellectuel ianao ; tsy any amin’ny Sefala na any amin’ny Setela no hantenainao hoe hahita an’Andriamanitra velona ; manovo fahalalana ianao any ry havana. Tsy misy maharatsy an’izany, fa ny base-ny dia hoe : efa nifanena tamin’ilay Andriamanitra velona ve ianao ?      

Fa ho an’ny maro, izany Andriamanitra izany, dia hoe « concept », voambolana ianarana any anaty boky ry havana ô. Ary izany Andriamanitra « concept » izany : tsy mandatsaka ny Fanahy Masina izany. Fa ilay Andriamanitra velona izay fantatry ry Mosesy, fantatry ry Davida, fantatr’i Solomona, fantatr’i Petera, raha nitoriteny izy, no te handatsaka ny Fanahy Masina amintsika Fiangonana amin’izao maraina izao. Ary io Fanahy Masina io ry havana, rehefa milatsaka ao amintsika, dia mitondra fanasitranana. Mitondra fanasitranan’ny fanahy, mitondra fanasitranan’ny saina, mitondra fanasitranana ny nofontsika ry havana ô. Ny olona manao chimiothérapie izany : sady lafo be izany chimiothérapie izany an, misy olona tsy mahazaka ny chimiothérapie, misy effets secondaires izany chimiothérapie izany an : maro ny mpanompon’Andriamanitra nijoro vavolombelona, ary nijoro vavolombelona teo imason’ny dokotera, fa nositranin’ny Fanahy Masina izay nalatsaky ny Tompo tao aminy ry havana ô. Ny Fanahy Masina io rehefa milatsaka ao amin’ny fiainan’ny olona ry havana, rehefa milatsaka ao amin’ny fiainan’ny olona ny Fanahy Masina, dia mandoro izay rehetra faka mamatotra azy ; mamatotra azy amin’ny zava-mahadomelina, ary mandoro ao aminy izay rehetra hoe faniriana mitondra azy, mampiroana azy amin’izany zavatra mahadomelina izany ry havana ô. Io Fanahy Masina io manadio ny masony mba ho tena hoe madio fijery izy, manadio ny fisainana, manaisotra izay mety hoe eritreritra janga rehetra ry havana ô. Rehefa milatsaka ny Fanahy Masina, rehefa milatsaka ny Fanahy Masina, dia tena hoe tahaka ny afo mandoro izay avonavona, izay fiheveran-tena ho zavatra, izay fanamarinan-tena. Izany ny asan’ny Fanahy Masina : mandoro, mandoro, mandoro io tsy fahaizantsika mifamela, tsy fahaizantsika mamela io ry havana ô.

Tahaka ny nandatsahan’Andriamanitra ny Fanahy Masina, tahaka ny nandatsahan’Andriamanitra ny Fanahy Masina tamin’i Davida, tamin’i Solomona, tamin’i Elia, tamin’ny andron’ny Pentekosta : mbola tiany handatsahana ny Fanahy Masina amin’izao maraina izao, raha fantatrao hoe iza ny Fanahy Masina ary fantatrao mazava ary tsotra tahak’izany ny fiasany ry havana ô.

Ny Fahamarinana 2 dia izao : andeha ange averintsika vakiana ilay Asan’ny Apostoly 10 :44 : «« Raha mbola nilaza izany teny izany Petera, dia nilatsaka tamin’ izay rehetra nandre ny teny ny Fanahy Masina ». Tsisy resaka teo hoe nanao an’izao izy na nanao an’izao an. Tsisy resaka teo hoe natao batisa izy dia nilatsaka ny Fanahy Masina an. Tsia ry havana ô. Nandre ny toritenin’i Petera i Kornelio sy ny ankohonany dia nilatsaka ny Fanahy Masina. Izay ilay Fahamarinana 2 : TANDREMO MIHOATRA NOHO NY TAMIN’IZAY LASA IZAY NY TORITENY RENAO.

Nilatsaka tamin’i Kornelio sy ny ankohonany ny Fanahy Masina ry havana ô. Jereo ange ao amin’ny 10 :2 ao e, momba an’i Kornelio izay nandatsahan’Andriamanitra ny Fanahy Masina e : « ary mpivavaka tsara sady natahotra an’ Andriamanitra izy mbamin’ ny ankohonany rehetra ka nanao fiantrana be tamin’ ny olona sady nivavaka tamin’ Andriamanitra mandrakariva ». Raha ataontsika hoe fitaratra io Asan’ny Apostoly 10 :2 : manao ahoana ianao mijery an’izany fitaratra izany ? Kornelio, hoe : mpivavaka tsara, natahotra an’Andriamanitra izy mbamin’ny ankohonany rehetra, nanao fiantrana be tamin’ny olona sady nivavaka tamin’Andriamanitra mandrakariva. Ary rehefa tonga Petera, mamangy azy ao an-tokantranony ry havana ô, dia tena hoe raisiny sérieux ilay toriteny ataon’i Petera. Izay ity, izay ity. Ny laklen’ny andatsahan’Andriamanitra ny Fanahy Masina aminao dia ny fihainoanao tsara ny tenin’Andriamanitra ry havana ô. Marina fa eo ilay toe-po hoe mivavaka tsara, mivavaka mandrakariva, matahotra an’Andriamanitra ; fa izany ve isika mianakavy ireto : matahotra an’Andriamanitra ve isika mianakavy ireto ? Mihaona amin’ilay Andriamanitra Masina indrindra ve isika rehefa mankaty, sa ohatrany mankaty amin’ny club na association ry havana? Fa izany olona mpivavaka marina, lazain’ny Soratra Masina hoe : mpivavaka marina, manao fiantrana, mivavaka mandrakariva : izy sy ny ankohonany no nihaino ny tenin’Andriamanitra dia nandatsahan’Andriamanitra ny Fanahy Masina ry havana ô.

Tsy ny diplaomanao no handatsahan’Andriamanitra ny Fanahy Masina aminao, tsy ny volanao, tsy voavidin’ny vola aman-karena io Fanahy Masina io ; fa ny toe-po mahatonga anao hihaino tsara ilay tenin’Andriamanitra. Fa raha tonga aty am-piangonana ianao ; ato moa jerena tsy dia misy an’izany intsony ; hoe tonga aty am-piangonana ianao dia rehefa tonga ny toriteny dia andeha hivoaka ianao : tsisy Fanahy Masina hilatsaka aminao e ! Fa rehefa tonga ny toriteny ka ilaozanao mamadika boky, mamadibadika Baiboly : tsisy Fanahy Masina hilatsaka eo ry havana ô. Tsotra be ohatran’izany ange io e ! raha mandritra ny toriteny : lasa ny sainao, lasa am-borona eo ianao dia mieritreritra ny fiainanao ianao, mieritreritra ny zavatra ho vantaninao any an-trano rehefa avy eo ianao : tsisy Fanahy Masina e, hilatsaka aminao eo ry havana. Tsisy Fanahy Masina hilatsaka aminao eo !

Fa izany ny Fahamarinana 2 : TANDREMO BEBE KOKOA NOHO NY TAMIN’NY LASA NY TORITENY RENAO DIA HANDATSAKA NY FANAHY MASINA ANDRIAMANITRA.

Andao ange jerentsika ilay tantaran’i Elia teo ao amin’ny 1 Mpanjaka 18 ; izy ilay nifanandrina tamin’ny mpaminanin’i Bala sy ny mpaminanin’ny Aseraha ry havana. Atoron’Andriamanitra antsika bebe kokoa izany hoe fomban’ny olona miandry, manantena izany hoe filatsahan’ny Fanahy Masina izany. Eo amin’ny 1 Mpanjaka 18 :30 : «Ary hoy Elia tamin’ ny olona rehetra: Manatona ahy. Dia nanatona azy ny olona rehetra. Ary Elia namboatra ny alitaran’ i Jehovah izay efa rava ». Jereo tsara an : « Ary Elia namboatra ny alitaran’ i Jehovah izay efa rava ». Dia and.37-38 : «Mihainoa ahy, mihainoa ahy, Jehovah ô, mba hahafantaran’ ireto olona ireto fa Hianao Jehovah no Andriamanitra, ary Hianao no mampiverina ny fony indray. Dia latsaka ny afon’ i Jehovah ». Atoro antsika izany hoe olona manantena ny filatsahan’ny Fanahy Masina izany.

Ry havana ô, io izany ilay hitantsika teo, hoe : rava, misy alitara rava teo, amin’ny teny frantsay, misy alitara en mauvais état, tsy fantatra hoe maninona, ravan’ny inona, na en mauvais état naninona. Fa dia namboarin’i Elia aloha ilay izy namboarin’i Elia io. Dia nivavaka Elia. Izany ny olona vonton’ny filazantsara, tena vonton’ny filazantsara. Ny filazantsara mamonto azy iny an, mitarika azy ho amin’ny vavaka, ho amin’ny fiainam-bavaka. Efa hitantsika izany tao amin’i Kornelio. Ahoana moa ry havana ny fampiarana an’izany ? Io hoe alitara rava amboarain’i Elia alohan’ny hivavahany amin’Andriamanitra : alitaran’ny fiainako io, alitaran’ny fiainanao io, alitaran’ny tokantranonao ion alitaran’ny ankohonanao io rava io amin’izao maraina izao, alitaran’ny asa aman-draharahanao io, alitaran’ny fanompoanao ao amin’ny fitandremana io ry havana ô ; izany misy faharavana izany. Ka raha manantena ianao hoe hilatsahan’ny Fanahy Masina : ampiasao aloha izay tratry ny herinao sy ny fahendrenao rehetra, hoe : « hay, ity tokony ahitsy ohatran’izao, dia ahitsiko ohatran’izao », « izaho no andraikitro satry ny vy tsy mikitrana irery : amboariko ny tokantranoko, amboariko ny ankohonako ». Izay no nataon’i Elia ry havana ; dia nivavaka amin’izay i Elia : « mihainoa ahy, Jehovah ô ; mihainoa ahy Jesoa ». Izany ilay izy ry havana, izany. Dia nilatsaka avy any an-danitra ny afo. Fa io afo io, io ange no nampiasain’i Jesoa fony fahavelony, nanao fahagagana e. Io afo io, io Fanahy Masina io, nahatonga azy hampahiratra ny jamba ; ny Fanahy Masina no nahatonga Azy hampalady ny marenina ; ny Fanahy Masina no nananganany an’i Lazarosy tamin’ny maty. Ary Andriamanitra mbola nampiasa ny Fanahy Masina ry havana, nanangana an’i Jesoa tamin’ny maty. Andriamanitra nampiasa ny Fanahy Masina hampiakatra Azy tena hoe pile eo an-kavanan’Andriamanitra. Izany io Fanahy Masina tian’Andriamanitra halatsaka aminao amin’izao maraina izao ry havana ô. Tsy kilalao ity finoana ity. Tsy fombafombam-pivavahana ity. Tsy fahalalana foto-dalàna ity, ka hoe : oay, izao no foto-dalàna sy ny fitsipika any amin’ny synaodam-paritany. Tsy izany ny finoana ry havana ô. Olona mpino nanolo-tena ho an’Andriamanitra ary miandrandra isan’andro isan’andro izany filatsahan’ny Fanahy Masina aminy izany ; miasa amin-kery, miasa amin’ny fahefana.

Ry havana ô, raha nihaino tsara ny teny ianao hatreto, ilay teny vao notoriana teo : efa manokatra lalana hidinan’ny Fanahy Masina ao aminao izay nitandrina tsara an’izany teny izany, amin’izao maraina izao. Ilay teny notoriana teo :efa manokatra lalana ao aminao ry havana ô. Fantatrao ve izany ? Irianao ve izany ?

Jesoa vao nanomboka nitory teny any amin’ny Matio 5 dia niteny hoe : « Sambatra ny noana sy mangetaheta ny fahamarinana; fa izy no hovokisana ». Mangetaheta an’izany fahafenoan’ny Fanahy Masina izany ve ianao ry Fiangonana ô ? Fa hovokisany ianao.

Jesoa dia niteny hoe : « Mangataha, dia homena hianareo; mitadiava, dia hahita hianareo; dondony, dia hovohana hianareo ». Mangataha ny filatsahan’ny Fanahy Masina e, dia hilatsaka aminao ny Fanahy Masina ry havana ô. Fantatrao Izy, dia angataho ary e : « izaho koa mba maniry izany herin’ny Fanahy Masina izany », « izaho mihitsy ilay hoe : mitoera eto ianareo fa hahazo hery ianareo amin’ny hilatsahan’ny Fanahy Masina ; haiko tsianjery ry Jesoa an, haiko izany fa ao amin’ny Asan’ny Apostoly 1 :8, fa tsy nihaina an’izany herin’ny Fanahy Masina izany aho, satria jamais nilatsaka tao amiko ny Fanahy Masina ».

Jeremia, any amin’ny Testamenta taloha dia efa nampanantena, Jeremia 33 :3, mora tadidy, hoe : « Antsoy Aho, dia hovaliako hianao ka hampisehoako zavatra lehibe sy saro-pantarina izay tsy fantatrao ». Ny filatsahan’ny Fanahy Masina izany ry havana malala ô. Ny filatsahan’ny Fanahy Masina izany. Izany no tian’Andriamanitra atao ho anao eto, amin’izao maraina izao, mba ho marina ara-bakiteny ilay hoe : tsy tahaka izay nidiranao tato no ivoahanao avy eto, ka tena hoe hilatsahan’ny Fanahy Masina ianao ry havana ô.

Andao isika hivavaka, hiaraka hivavaka isika hangataka ny Fanahy Masina ry havana ô : « Tompo malala ô, midera Anao izahay, mankalaza Anao noho ny fahasoavanao aminay Fiangonana e. Navotanao izahay, nafindranao avy tao ambany vahohon’i Satana izahay ho ao amin’ny fanjakanao. Ary tsy ampy anao izany, fa tianao hivelona amin-kery sy amin’ny fahefana izahay, noho ny asan’ny Fanahy Masina. Mifona, mifona, mifona ny amin’ny tsy nahafantaranay an’izany. Mifona, mifona ny amin’ny tsy niraharahianay an’izany Mpamonjy ô. Mifona, ny amin’izay hoe : nihainonkenoinay fotsiny ny teninao, ny toriteninao ; tsy nomenay lanja, tsy tena Ilay Andriamanitra velona, Ilay Andriamanitra Masina indrindra, Ilay Andriamanitra be voninahitra ; ary rehefa mihaino ny teninao izahay, mihaino ny toriteninao izahay, dia henoinay tsara, fa avy hatrany dia asesiky ny devoly ao izay eritreritray manokana manalefaka, manohitra an’izany toriteny izany. Mifona amin’izany izahay Mpamonjy ô. Mifona amin’izany izahay e. Ankehitriny izahay dia faly misaotra Anao, fa hay ve ny fihainoana ny teny e, ny fandraisana an’izany teny izany sérieux e, mahatonga Anao e, handatsaka ny Fanahy Masina ao amin’ny tsirairay e. Amindrao fo izahay Tompo malala ô, fa manomboka izao, mba omeo anay ny handray au sérieux ny toriteny. Ovay ny toe-ponay, mba omeo anay, tahaka an’i Kornelio, mbola tsy nilatsahan’ny Fanahy Masina akory aza izy, dia efa kilasianao hoe mpivavaka marina, mpivavaka mandrakariva. Lazain’i Petera amin’ny toriteny fa hoe matahotra fatratra an’Andriamanitra ; voleo ao am-ponay Isotry Fitiavana izany hoe fahatahorana anao izany Andriamanitra ô. Dia Ianao kosa hanatanteraka ny teny fampanantenanao, handrotsaka be dia be isan’andro isan’andro ny Fanahinao Masina ao aminay. Fanahy Masina ô, milatsaha ao aminay, milatsaha ao amin’ny fiainan’ny tsirairay ; milatsaha ao amin’ny fanahin’ny tsirairay ; milatsaha ao amin’ny tokantranon’ny tsirairay, aoreno izay rava ao amin’ny tokantrano tsirairay ; sitrano izay maratra sy marary ao amin’ny ankohonan’ny tsirairay. Fanahy Masina ô, milatsaha ao amin’ny fisainanay, milatsaha ao amin’ny vision-nay rehetra, milatsaha ao amin’ny programanay rehetra, milatsaha amin’ny volanay Mpamonjy ô. Izany no angatahinay Aminao : milatsaha amin’ny fanompoanay, mba tena hoe : ho fanompoana hankalazana anao, fa tsy ankalazana ny voninahitray, satria tena hoe fanompoana iasan’ny Fanahy Masina amin’ny fahefany sy amin’ny heriny. Fanahy Masina ô, araka ny hiranay teo : Ianao no irahina ho mpiantoka ny famonjena ana : tanteraho izany Fanahy Masina ô. Izao vavaka izao dia ataonay amin’ny anaran’i Jesoa. Amen ».                               

Hebreo 10 :22 : « Dia aoka isika hanatona amin’ ny fo marina sy amin’ ny fahatokiana be avy amin’ ny finoana, manana fo voadio ho afaka amin’ ny fieritreretana ratsy sy tena voasasa tamin’ ny rano madio ».

AOKA ISIKA HANATONA. Hanatona ny inona ry havana ? HANATONA NY FITOERANA MASINA INDRINDRA. Izay mantsy ny ery amin’ny and.19. izay tsy novakiana intsony, hoe : AOKA ISIKA FIANGONANA HANATONA NY FITOERANA MASINA INDRINDRA. Isika rehetra ry havana no afarana amin’izany.

Ity Epistily ho an’ny Hebreo ity an, dia araka izany anarana izany, hoe : nosoratana ho an’ireo Hebreo firazanana, Hebreo finoana, jiosy niova fo. Dia toroina izy, ampahafantarina izy araka ilay titre hoe : amporisihana izy mba tsy hihamalaina, mba tsy hihemotra. Ary ny teny atao amin’ireto Hebreo ireto ry havana, dia teny, mazava ho azy fa atao amintsika mpino kristiana. Tenenina isika amin’izao maraina izao, hoe : AOKA ISIKA MIANAKAVY  IRETO HANATONA NY FITOERANA MASINA INDRINDRA. Fa rehefa tsy hanatona ny fitoerana masina indrindra ianao, dia tsy maintsy hihemotra ho any amin’ny fiahanahana, any amin’ny incrédulité. Tsy maintsy ho tratry ny fahakamoana ara-panahy ianao rehefa tsy hanatona ry havana ô, tsy maintsy ho tratry ny fahalainana ara-panahy ianao ; ary ny vokatr’izany dia hoe fialàna tsotra izao amin’ilay Andriamanitra velona.

Mazava, mazava ny hafatra ho antsika, hoe : AOKA ISIKA HANATONA NY FITOERANA MASINA INDRINDRA. Aza mijanona eo amin’ny kianjan’ny tempoly. Aza mijanona eo amin’ny kianjan’ny tempoly. Ho antsika izay nanao Sekoly Alahady dia fantatsika fa misy fizarana tahaka izao ao amin’ny antsoina hoe tempoly : vao miditra ao amin’ny tempoly ianao an, dia misy ny antsoina hoe « kianjan’ny jentilisa ». Dia ny jentilisa : ao amin’io kianja io ihany no afaka mitoetra izany. Dia misy indray antsoina hoe « kianjan’ny isiraelita », dia araka izany anarana izany an : ny isiraelita ihany no afaka mankao. Dia misy indray antsoina hoe « kianjan’ny mpisorona » : eo izany ireo mpisorona ireo manao asan’ny fisoronana. Rehefa tonga izaho mpino, tonga izaho isiraelita mitondra biby atao fanatitra, dia entiko eo amin’ny kianjan’ny mpisorona. Dia mandroso ihany an, dia misy ny hoe « fitoerana masina ». Ka rehefa miteny amintsika ny Tompo amin’izao maraina izao hoe : manatonà, midira ao amin’ny fitoerana masina indrindra, aza mijanona any amin’ny kianjan’ny jentilisa e, aza mijanona any amin’ny kianjan’ny isiraelita e. Ary ianao ary, mety ilay hoe efa manana fanompoana ao amin’ny fitoerana masina, manao asan’ny diakona, manao asa any amin’ny sampana sy ny karazany, manao asan’ny mpiandry. Ianao izany ao amin’ny fitoerana masina. Fa aza mijanona amin’izany hoy ny Soratra Masina. Manatonà ao amin’ny fitoerana masina indrindra. Fa rehefa tsy manatona ao ianao ry havana : mety manompo ianao ao amin’ny fitoerana masina, fa tsy manana fiombonana amin'Andriamanitra satria Andriamanitra ao amin’ilay fitoerana masina indrindra. Ao amin’ny fitoerana masina ianao manompo, fa tsy manana fifandraisana velona amin’ilay Andriamanitra velona ry havana ô. Rehefa miteny ny Soratra masina amin’izao maraina izao, hoe : manatonà ao amin’ny fitoerana masina indrindra, satria ao no misy an’Andriamanitra, dia hoe : izany antso izany no ataony satria hoe tiany isika Fiangonana hanana fiainana tsara lavitra noho izay nananantsika hatreto. Tiany isika hanana fiainana tsara lavitra noho izay nananantsika hatreto. Inona izany hoe fiainana tsara lavitra noho izay nananantsika hatreto izay ? Dia dikan’izany, tsy hoe : hanome anao asa tsara kokoa Izy ; ny dikan’izany, tsy hoe : hanome anao fisondrotan-karama Izy ; ny dikan’izany, tsy hoe : hanasitrana avy hatrany ny tokantranonao na ny ankohonanao Izy. Dia dikan’izany dia hoe : miantso anao ny Tompo amin’izao hoe : manatonà ao amin’izay misy Azy, dia ny fitoerana masina indrindra. Fa rehefa tsy hanao an’izany ianao : automatique ny fihemoranao ara-panahy sy ny fangatsiahana ara-panahy.

Izay izany ilay hafatra ho antsika, hoe : AOKA ISIKA HANATONA NY FITOERANA MASINA INDRINDRA.

Dia inona ary no anafarana ny olona izay mandray an’izany hafatra izany ?

Ny Fahamarinana 1 ry havana dia izao : MINOA IANAO RY HAVANA O, FA ADIDINAO NY MITOETRA AMIN’IZANY FITOERANA MASINA INDRINDRA IZANY. MINOA IANAO FA ADIDINAO NY HANATONA, NY HIDITRA AMIN’IZANY FITOERANA MASINA INDRINDRA IZANY.

Efa natsidika teo, hoe : ny miditra ao amin’ny fitoerana masina indrindra izany dia hoe : mitoetra, mivelona eo anatrehan’ilay Andriamanitra velona isan’andro isan’andro, marain-tsy hariva ry havana. Raiso ho adidy izany. Ary fantaro fa possible izany. Possible izany. Raha tsy izany an, tsy niteny ny Soratra Masina hoe : manatonà. Ary ilay Fanahy Masina ry havana : nandrara ny isiraelita tao amin’ny testamenta taloha, nandrara azy tsy hiditra ao amin’izany fitoerana masina indrindra izany, afa-tsy ny mpisoronabe indray mandeha isa-taona ; ny Fanahy Masina izay nandrara tao amin’ny testamenta taloha ; ny Fanahy Masina no miteny aminao amin’izao maraina izao, hoe : manatonà ka midira ao amin’ny fitoerana masina indrindra.

Raha tsy azonao ry havana, fa nosokafan’i Jesoa Kristy ho anao, tamin’ny fandatsahany ny ràny teto amin’ny hazo fijaliana, izany fitoerana masina indrindra izany ; raha tsy azonao izany, dia tsy azonao ny Epistily ho an’ny Hebreo. Raha tsy azonao fa ilay rà nalatsaka teto amin’ny hazo fijaliana no nanatriatra an’ilay efitra lamba nampisaraka ny efitra masina amin’ny efitra masina indrindra : tsy azonao ny ao amin’ny Baiboly e, tsy azonao ny atao hoe Baiboly, tsy azonao ny votoatin’ny Baiboly ry havana. Fa isika e, dia tokony handray ho adidintsika tsirairay, izany hoe fidirana, fanatonana ao amin’ny fitoerana masina indrindra izany.

Dia misy mety hiteny hoe : « sûr ve Pasitera fa izaho izany ? izaho amin’izao toetrako izao izany ? Ry havana ô, ry havana ô : aza mijery ny fahalemenao, aza mijery izay tsy fahatanterahanao ; ny antso no henoy. Ampangino ny feo hafa izay mampahatsiahy anao izay fahatsontsanao, aza mijery izay infidélité-nao ; fa henoy ilay antso ary raiso ho adidy ny hoe : hanatona aho manomboka anio, hantona ny fitoerana masina indrindra. Ary Andriamanitra banjinina, Jesoa Kristy no saino. Ary rehefa izany, dia ny Fanahy Masina hanampy anao hanapa-kevitra hoe : « eny ary Tompo ô, raisiko ho adidy amin’izao maraina izao ny hanatona ao amin’ny fitoerana masina indrindra, ao amin’izay misy ny fanatrehanao, Andriamanitra ô ».

Izay ny dingana voalohany : RAISO HO ADIDY NY MANATONA NY FITOERANA MASINA INDRINDRA. RAISO HO ADIDY.

Ny Fahamarinana 2 ry havana dia izao : AFOIZO HO AN’I JESOA NY FIAINANAO – AFOIZO HO AN’I JESOA IZAY REHETRA MOMBA ANAO.

Afoizo ho an’i Jesoa. Ialana tsiny hatrany moa ilay vary amin’anana ; fa tiana hazava ilay teny : mianara mi-s’abandonner amin’i Jesoa ry havana – mianara mi s’abandonner amin’i Jesoa, dia Izy hampiditra anao ao amin’ny fitoerana masina indrindra.

Ilay hoe : afoizo ho azy ny fiainanao, afoizo ho azy ny momba anao, afoizo ho azy izay fikasanao, dia hoe : maneke Azy amin’ny zavatra rehetra ry havana ô. Maneke Azy amin’ny zavatra rehetra. Tsy manaiky Azy ambongadiny fotsiny, fa manaiky Azy hatramin’ny zavatra madinika indrindra. Ilay mahatonga ny sasany handinika anao, hoe : « ianao ity koa tsy ampahafirin’izay mivavaka an. Ianao ity koa tena tery saina ». Izany ny olona mi-s’abandonner amin’i Jesoa ry havana ô, ka manantena an’i Jesoa hampiditra azy ao amin’ilay fitoerana masina indrindra.

Hitanao, ilay hoe : mi-s’abandonner, mampahatsiaro an’ireny olona tena mifankatia be ireny. Eo amin’ilay mpifamofo moa no ahitana azy ; ilay mpifamofo, ilay mifampilaza hoe : « tiako ianao, ary izay rehetra anaovanao ahy e : ekeko. Izay rehetra anaovanao ahy : ekeko ». Asa moa raha mbola misy mpivady eto mifampilaza an’izany hoe : « chéri an, izay anaovanao ahy », na miteny anakam-pony any amin’i Pasitera hoe : « taloha izany Pasitera an ». Izay. Fa izay, izay ilay hoe mahafoy ny fiainanao ho an’i Jesoa, mi-s’abandonner Aminy. Fa izao : rehefa hoe manolo-tena tahak’izany ho an’i Jesoa ianao ; izay ilay mi-s’ébandonner an ; dia hoe : tsy mahita rirany ao amin’ny fiainanao intsony ilay « izaho », ilay fizahozahoana. Tsy mizahozaho intsony ny nofonao. Rehefa tsy mi-s’abandonner amin’i Jesosy ianao an, ny fizahozahoana ry havana ô, ilay nofo no manjaka ao aminao. Rehefa mi s’abandonner amin’i Jesosy ianao ry havana, dia hoe : tsy mahita rirany intsony ilay « izaho », ary tsy mahita rirany intsony ilay fanahin’izao tontolo izao, tsy mahita rirany ao aminao intsony ilay fomban’izao tontolo izao. Ary raha nisy aza fomba nahazatra anao, ary fomba tsy hitanao izay naharatsy azy hatreto : rehefa mi-s’abandonner amin’i Jesoa ianao ry havana ô, dia tonga saina, dia ianao ihany no mampiala ny tenanao amin’izany fomba nahazatra anao izany. Izay ilay tombon’ilay olona hoe : mahafoy an’izay rehetra momba azy ho an’i Jesoa ry havana ô. Izany ny asan’i Jesoa ao aminy. Ary tsy vitan’izany ry havana ô, tsy vitan’izany hoe foanany ilay fizahozahoana, fa hoe : Jesoa io, izay nanoloranao ny manontolonao, no mbola hoe mampidina ato am-ponao ny fitiavana ny teniny, ny fitiavana ny Soratra Masina. Ary izay ianao vao hoe hankamamy an’izany famakiana Baiboly izany e ; fa tsy vakiana tahaka ny adidy, tsy vakiana tahaka ny corvée, tsy vakiana amin’ny fomba intellectuel fotsiny. Fa satria ianao nanolotra ny momba ny tenanao ho an’i Jesoa ry havana : ampidininy ao am-ponao ny fitiavana ny Soratra Masina. Ary fanampin’izany : omeny anao ny finiavana sy ny hery hanatanterahana izany teny vakianao. Satria naninona ? Nanolotra ny momba ny tenanao sy ny mombanao rehetra an’i Jesoa ianao ry havana ô. Ary dia rehefa izay, rehefa izay, manaiky Izy : tsy izaho no afaka hiditra ao, na hampiditra tena ; izaho manatona fotsiny ; fa Izy, rehefa izay, no hampiditra ahy ao amin’ny fitoerana masina indrindra izay misy ny fanatrehan’Andriamanitra.

Inona no Fahamarinana farany anafarana antsika ry havana ? Rehefa tonga amin’izao dingana fahatelo izao ianao ry havana, izay vao tonga amin’ny hoe « fiainana ny finoana », izay vao tonga amin’ilay stade hoe « fiainana ny finoana ».

Hoy ny mpanompon’Andriamanitra iray izay tamin’ny teny frantsay : rehefa tonga amin’izao stade izao ianao : « c’est le début de la vraie vie chrétienne ». Mbola tsy finoana ry havana ilay olona mahatsiaro fa hoe adidiny ny manatona. Mbola hoe fanekena fotsiny izany. Mbola tsy tena finoana ry havana ilay hoe : manolo-tena, ilay mi-s’abandonner ; fa eto amin’ity dingana fahatelo ity, eto ilay hoe : « le début de la vraie vie chrétienne ». Fa inona no mitranga eto amin’ity dingana fahatelo ity ? Inona no mitranga eto amin’ity dingana fahatelo ity ry havana ? Ny mitranga : dia izay nitranga tamin’ny mpianatr’i Jesoa tamin’ny Pentekosta ry havana ô. Jesoa tety ambonin’ny tany an, nanomboka asa tsara tao amin’ireo mpianany ireo : noteneniny izy hoe « manatona ianareo », notenenina izy hoe « afoizo ho Ahy ny zavatra rehetra ». Ok. Nanomboka asa tsara Jesoa ry havana ; fa Izy niakatra any an-danitra : naniraka ny Fanahy Masina ho an’ireto mpianatra ireto, izay vao tanteraka ny finoan’ireto mpianatra ireto. Izay vao tanteraka ny finoan’ireto mpianatra ireto : une fois que hoe Jesoa naniraka ny Fanahy Masina avy any an-danitra ry havana ô. Ary mahafinaritra ny fitenin’ny mpitoriteny, hoe : Jesoa maniraka ny Fanahy Masina avy any an-danitra ho an’ireto mpianatra ireto an, toy ny manisy tombokase ny finoan’ireto mpianatra ireto.

Inona no dikan’izany hoe : nanisy tombokase ny finoan’ireto mpianatra ireto ? Nanjary expérience vécue ny finoan’ireto mpianatra ireto. Tsy hoe : finoana-émotion, tsy hoe finoana- intellectuel : izao, izao no ao amin’ny Baiboly ao ; fa nanjary expérience vécue ny finoan’ireto mpianatra ireto noho ilay tombokase nasian’ny Fanahy Masina ry havana ô. Ary izay no irariana ho antsika tonga amin’izay dingana fahatelo izay amin’izao maraina izao : manao ho zava-dehibe izany hoe asan’ny Fanahy Masina ao amin’ny fontsika, ao amin’ny fanahintsika, ao amin’ny finoantsika, mba hanamarina tokoa isika, hoe : olom-boavonjy, olona novidiana tamin’ny rà, ary olona nampidirina tao amin’ny fitoerana masina indrindra ka eo amin’ny fanatrehan’Andriamanitra marain-tsy hariva.

Possible ry havana misy olona ato, matoa tonga izao teny izao : niditra teto izy an nanana ilay notenenina teo, ilay finoana-émotion ; possible izy niditra teto nanana ilay finoana-intellectuel ; possible izy niditra teto : olona mbola mpitoetra any amin’ny kianjan’ny jentilisa ; misy olona angamaba ato hoe mpitoetra any amin’ny kianjan’ny isiraelita ; misy olona angamba niditra teto, hoe manompo amin’ny fitoerana masina : te hamangy ny fonao ny Tompo e, ary te hanova ny finoanao, te hanova ny fiainanao ny Tompo ary miteny aminao Izy, noho ny fitiavany anao sy ny tsy fahafoizany anao : AOKA  IANAO HANATONA, DIA AMPIDIRIKO AO AMIN’NY FITOERANA MASINA INDRINDRA, AO AMIN’IZAY MISY AHY, KA HIFANATRI-TAVA AMIN’NY FINOANA ISIKA AMIN’NY ANDRO FIVAHINIANAO ETY AN-TANY ; ARY AMIN’NY SEGONDRA IZAY HIALANAO ETY DIA HIFANATRI-TAVA MANDRAKIZAY ANY AMIN’NY MANDRAKIZAY ISIKA.

Ho an’Andriamanitra irery anie ny voninahitra, ary ho amintsika Fiangonana ny fahasoavana. Amen.