À propos de: Mpanoratra

Misaotra an’Andriamanitra isika ny amin’ny perikopa izay omeny antsika, satria mampieritreritra antsika ny amin’ny fifandraisantsika amin’ny Tompo e. Mampieritreritra antsika ny amin’ny fifandraisantsika amin’ny Tompo ny perikopa androany. Ilay fanontaniana apetraky ny perikopa androany dia hoe, farak’izay tsotra : IANAO IO VE RY HAVANA RAHALAHIN’I JESOA ? IANAO IO VE ANABAVIN’I JESOA ? IANAO IO VE RENIN’I JESOA ? Izany ny fanontaniana tsotra, izany ny fanontaniana mahitsy asain’ny Tompo valian’ny tsirairay. Fa izay rahalahiny, izay anabaviny, izay reniny, izay ihany ry havana o, izay ihany no handova ny lanitra. Izay ihany, ary tian’ny Tompo isika handova ny lanitra ; izany no mbola anomezany antsika izany teny izany. Araka ilay nolazaina teo, ilay toriteny dia ho an’ny olona izay olona te handova ny lanitra e, te ho any an-danitra e, satria misy lalana tokony hizorana eo. Ary satria misy lalana tokony hizorana eo, dia misy karazana panneaux de signalisation. Raha ohatra izao isika ho any Tamatave, dia rehefa hidina an’i Mandraka iny dia hoe mila mitandrina sady sady miolakolaka ilay lalana, no midina be ilay lalana , dia mila mitandrina be, misy panneaux mampandre hoe mandritra ny firy kilometatra ohatran’izao. Tsy tadidiko intsony na aiza na aiza ilay izy fa ery an’anona ery misy tetezana anankiroa, tsy tokony ho diso tetezana ianao , misy sens interdit hoe ity tetezana ity tsy azo aleha. Ohatran’izany ny amin’ny fiainana ara-panahy. Fa rehefa mankany Tamatave isika na mankany an-kafa, ekentsika tsara ny panneux de signalisation ; fa rehefa hoe amin’ny lalana mankany an-danitra ihany isika no hoe : izay indray ilay tery saina, izay indray ilay masiaka, izay indray ilay ohatran’izao. Tian’ny Tompo ho any an-danitra ianao ry havana, tian’ny Tompo ho any an-danitra. Izany ny anton’ny teny isan’Alahady, isan’Alahady, isan’andro, isan’andro. Ary ny Fanahy Masina, amin’izao andro ivelomantsika izao, no nomeny hitari-dalana antsika. Jesoa ry havana raha niala tety an-tany, nanao veloma ny mpianatra dia niteny hoe : mahasoa anareo ny fialako, fa raha tsy hiala Aho, hoy Izy, tsy ho avy ny Mpananatra, fa rehefa tonga any an-danitra Aho, dia hirahiko ny Mpananatra hitari-dalana anareo. Porofo fa tonga any an-danitra Jesoa, dia nirahiny ny Mpananatra hitari-dalana antsika ety an-tany ry havana o, ary miandry antsika any amin’izany lanitra izany Jesoa. Tadidio izany e, izany no votoantin’ny finoantsika kristiana : lehilahy, vehivavy, rahalahy, anabavin’i Jesoa, renin’i Jesoa, izay hoe mikendry ny lanitra, ary tian’i Jesoa handova ny lanitra.

Andeha ary jerentsika ny Marka 3 :20-21 : «Ary niditra tao an-trano Izy, dia niangona indray ny vahoaka, ka dia tsy nahazo nihinan-kanina akory Izy. Ary ny havany, raha nandre, dia nivoaka hihazona Azy; fa hoy ireo: Efa very saina Izy ». Mitsambikina eny amin’ny and.31-35 isika : « Ary avy ny reniny mbamin'ny rahalahiny ka nijanona teo ala-trano, dia naniraka tao aminy hiantso Azy. Ary ny vahoaka nipetraka manodidina Azy ka nanao taminy hoe: Indreo, ato ala-trano ny reninao sy ny rahalahinao mitady Anao. Ary Izy namaly azy ka nanao hoe: Iza no reniko sy rahalahiko? Ary nony nijery izay nipetraka manodidina Azy Izy, dia hoy Izy: Indreo ny reniko sy ny rahalahiko!Fa na iza na iza no manao ny sitrapon'Andriamanitra, dia izy no rahalahiko sy anabaviko ary reniko ». Ry havana malala o, manontany anao ny Tompo amin’izao maraina izao, hoe : RAHALAHY, ANABAVY, RENIN’I JESO VE IANAO ? Fa te hanana fifandraisana akaiky, te hanana fifandraisana manokana aminao Izy, mihoatra noho izay tamin’ny lasa izay.

Andao ary jerentsika ny toetran’izany hoe rahalahy sy anabavin’i Jesoa izany. Raha jerena ny and.21, Jesoa dia nataon’ny havany hoe very saina, satria manao vy very ny ainy. Izay no toetran’ny rahalahin’i Jesoa : ataon’izao tontolo izao hoe very saina satria manao vy very ny ainy. Ahoana ny toetran’izany rahalahin’i Jesoa izany ? Ataon’izao tontolo izao hoe : very saina, satria maninona ? Manao vy very ny ainy.

Faharoa, eo amin’ny and.31 : « Ary avy ny reniny mbamin’ ny rahalahiny ka nijanona teo ala-trano, dia naniraka tao aminy hiantso Azy ». Ireto havan’i Jesoa ireto izany an, nijanona tary ala-trano. Jesoa ato anatiny ohatran’io, mifandinika, mampianatra, fa ny havany nijanona any ala-trano. Ny rahalahy, ny tena rahalahin’i Jesoa ry havana, sy ny tena havany an, tsy mijanona anya la-trano. Ny rahalahiny, ny tena rahalahiny, ny tena anabaviny, dia tsy mijanona any ala-trano tahaka an’ireto reniny sy havany ara-nofo ireto.

Ary fahatelo farany, and.35 : « Fa na iza na iza no manao ny sitrapon’ Andriamanitra, dia izy no rahalahiko sy anabaviko ary reniko ». Ny rahalahin’i Jesoa, ny anabavin’i Jesoa, ny renin’i Jesoa, dia izay manao ny sitrapon’Andriamanitra.

Izay izany ireo fahamarinana telo ho vohasana fohy ry havana, ho an’ny olona te ho any an-danitra : voalohany indrindra : ataon’ny olona very sain aizy satria manao vy very ny ainy ho an’i Jesoa ; tsy manao tahaka ny rahalahin’i Jesoa ara-nofo izy, mijanona any ala-trano ; ary fahatelo, hoe manao ny sitrapon’Andriamanitra.

Andeha ary jerentsika ilay fahamarinana 1 hoe fa maninona ireto havany ireto no niteny momba an’i Jesoa hoe : efa very saina ? Raha jerena ry havana io andro io, na ny alina nialoha an’ity tantara ity, dia hoe avy niari-tory tamin’ny vavaka i Jesoa. Sady niari-tory Izy an, no nifady hanina. Reraka Izy, tena reraka Izy. Dia maraina ny andro, mikenokenona Izy ny amin’ny fanokanana azy 12 lahy, asa be izany. Dia Izy avy nanokana azy 12 lahy, mitokana amin’ny trano dia narahin’ny olona be dia be, fia hoy ny and. 21 hoe nisy vahoaka niangona teo ka dia tsy nahazo nihinan-kanina akory Izy. Hoy ilay and.21 hoe : « Ary ny havany, raha nandre, dia nivoaka hihazona Azy; fa hoy ireo: Efa very saina Izy ». Ohatran’ny miteny izany ilay reniny, izay angamba ilay fon-dreny, hoe tena tsy fantatr’ity Jesoa ity mihitsy izay haha-reraka Azy, na izay hahafaty Azy. Izay ilay izy, izay ilay anona eto. Ny alina manontolo efa niari-tory. Fa izao ry havana o : tsy nanaiky Jesoa fa hoe tsy maintsy nikarakara an’ireo olona nila famonjena Izy, tsy maintsy nitory ny filazantsaran’ny fanjakan’Andriamanitra Izy. Ianao ve ry havana, vonona hanao vy very ny ainao koa, tahaka ny zandrikelin’i Jesoa ? Sa ianao manaraka, sa ianao mino, fa mino amin’ny fisalasalana, sa ianao manaraka, fa manaraka ohatran’i Petera, manaraka eny amin’ny lavidavitra ? Sa ianao mahafoy, fa mahafoy ambin’ambin-javatra, ambin’ambim-bola ? Izay ry havana ilay fanontaniana. Misy fomba fiteny ry havana mampieritreritra rehefa mijery ny fihetsik’isika eto amin’izao tontolo izao : rehefa mijery olona tia, tia mpanakanto na artiste, dia lazaina hoe : i anona iny tena hoe « fan » Madonna, na « fan » tsy fantatro. « Fan » : fa fantatrareo ve ny fanalavana ny « fan » ? Ny fanalavana ny « fan » dia hoe « fanatique » : tarika iray ihany ireo. Ary mahagaga, rehefa hoe fan’i Madonna, tsy lazaina mihitsy hoe fanatique ; fa rehefa tia an’i Jesoa, tahaka ny hoe manolo-tena ho an’i Jesoa, manao vy very aina, dia hoe : aza fanatique ohatran’izany pasitera an, aza fanatique ohatran’izany. Misy olona ve ato mieritreritra hoe : « fanatique ery Pasiteran’Isotry fitiavana io an ! ». Fanatique an’i Jesoa aho ry havana.

Tsy aritro ny hiteny an’ity résultat-na enquête tany Etats-Unis ity ry havana : nisy étude hono nataon-dry zareo amerikana, zareo moa tia manao an’itony enquête itony ; nanao enquête izy, ny échantillon 20.000 fans de football, 20.000isa. Nahavarianna ry havana ny vokatr’ilay enquête : 51% an’ireo fans 20.000 ireo, izany hoe any amin’ny 10.000 mahery any izany, dia hoe vonona ny hifady hanina izy mandritra ny herinandro an, raha izany no mampandresy ny ekipany amin’ny coupe du monde. Olona tsy mifady hanina mandrakizay izany hoe vonona hifady hanina ; izany ilay izy, izay ilay fan, fanatique e. Dia amin’ireo 20.000 ireo an, ny célibataire nanontaniana, 40% an’ireo célibataire niteny hoe mandritra ny herintaona aho, vonona aho ny tsy hanana sipa, na sipa lahy na sipa vavy, raha izany no hampandresy ny ekipa-na football-ny fireneny. Inona moa no idiran’ny sipa amin’izany e ? Izay ilay izy. Fa izay ilay finiavana, izay ilay fitiavana hoe hampandresy ry havana o. Dia hoe 7% an’ireo 20.000 ireo dia hoe vonona hitsahatra amin’ny asany dia hiova asa avy eo, raha hoe izay no azony anampiana ilay equipe de football-y fireneny. Ianao anie mieritreritra hoe hanajanona ny asa hanampiana an’ i Jesoa e, sao dia hoe very saina izany ; fa izany ry havana ny olona, rehefa tena tia, rehefa tena tia. Ary ny tena mampieritreritra, 4% amin’ireo 20.000 enquêté-ka ireo, hoe vonona hanome taova, hanome organe, raha izany no hoe hampandresy ny equipe de football-ny. Ry havana o, izany no olona tena very saina, izany no olona tena very saina. Fa aiza ho aiza amin’izany ny fitiavako sy ny fitiavanao an’i Jesoa e ? Ny fitiavako sy ny fitiavanao ny asan’Andriamanitra e ?

Ity eo amin’ny and.21 : « Ary ny havany, raha nandre, dia nivoaka hihazona Azy » : mety mieritreritra isika hoe fitiavana an’i Jesoa izany, mba fitsimbinana Azy : tsia ry havana o. Rehefa miteny ny Soratra Masina hoe tonga nivoaka ireo havany, hihazona Azy, ny verbe grika hoe : « pour l’arrêter » : olona ho samborina, olona ho gadraina, ho entina any am-ponja. Asa na inona na inona ny antony, fa tsy fantany ny amin’i Jesoa dia hoe andao sakanana e, andao sakanana. Sao dia ianao ry havan o, sao dia ianao ilay tsy tia an’i Jesoa, tsy te hanolo tena tanteraka ho an’i Jesoa dia hoe manakana ny hafa ihany koa hanatona an’i Jesoa.

Mahavaky fo indraindray ry havana, rehefa mandinika an’ireny tanora ireny ; misy olona tonga moa mitantara ny fahoriany, Ary maninona hoy aho ianao no tsy miditra katekomena ? Dia hoy izy : ka izaho, ilay olona hiasako, mpiasa an-trano ilay izy, ilay olona hiasako, hoy izy, tsy maintsy mahavita raharaha hono aho ny Alahady maraina, izay vao mahazo manao katekomena, dia efa atoandro be ilay izy, ka na ny Fiangonana aza tsy tratrako. « Fa ry zareo manao inona ? » « An an an, ry zareo ao an-trano ao ihany, dia avy eo izy mandeha pique-nique rehefa atoandro ». Ianao no te handeha pique-nique, maninona ny olona no tsy avelanao hanao katekomena ry havana o ? Sao dia ianao no very saina, fa tsy ilay mpanampy kelinao no ataonao hoe very saina ? Izay ilay izy ry havana o. Ary manao ahoana ny fahafoizanao, ny fahafoizanao vola ? Fantatro loatra fa misy olona menatra miangona, menatra miangona, satria : « Pasitera an, sady tsy manana frais aho ; ary na manana frais aza, tsy misy vola atao rakitra akory », dia menatra. Fa tsy izany daholo ny cas antsika ry havana, tsy izany daholo ny cas antsika. Fa raha tenenin’ny Tompo ianao, hitan’ny Tompo anie io vola ataonao rakitra io e ; raha miteny aminao ve ny Tompo, miteny aminao ny Fanahy Masina hoe : doublé-o io manomboka anio ; ary ho anareo izay afaka mi-doublé, ary misy ato : hiteny ve ianao hoe : « very sain ave Pasitera ty e ka hatramin’ny poketranay dia efa arahiny, sy ny paosinay e? ». Ry havana o, mitoriteny aho amin’ny olona tian’ny Tompo handova ny lanitra e, izay ilay izy, mitoriteny aho amin’ny olona te handova ny lanitra ; ary tsy zakan’izao tontolo izao izany hoe olona manao vy very ny ainy ho an’i Jesoa, ho an’ny asan’i Jesoa.

Izay izany ny fahamarinana voalohany, hoe : ny zandry kelin’i Jesoa, ny tena rahalahiny, ny tena anabaviny, dia hoe manao vy very ny ainy ho Azy, ka rehefa mijery azy ny ankohonany, rehefa mijery azy ny fianakaviany, dia ohatrany hoe adala, very saina.

Ny fahamarinana faharoa ry havana dia izao, ery amin’ny and.31 ery : « Ary avy ny reniny  mbamin’ ny rahalahiny (reniny ara-nofo io izany, Maria izany, ny rahalahiny ara-nofo io izany, satria Maria niteraka taorian’i Jesoa) ka nijanona teo ala-trano, dia naniraka tao aminy hiantso Azy. Ilay rahalahin’i Jesoa ara-nofo an, nijanona tany an-trano. Ry havana o, sao dia mba ianao izany mpijanona any ala-trano izany ? Mahavariana ilay toe-tsain’i Maria sy ny rahalahin’i Jesoa eto : miantso an’i Jesoa izy, maniraka olona izy miantso an’i Jesoa ; ohatrany hoe Jesoa izany mampianatra eto, dia maniraka diakona any Izy hoe, ao ala-trano ao, ny reninao sy ny rahalahinao. Maniraka olona izy hiantso an’i Jesoa ; fa satria izy jamba ny amin’ny maha-Jesoa an’i Jesoa ry havana, dia tsy mamaly ny antson’i Jesoa : midira ianareo aty, fa Jesoa no asaina mivoaka any ala-trano. Ity Maria ity nefa, ho anareo izay manana Baiboly, jereo anie ny Lioka 1 e : olona mba nisehoan’ny anjely ihany ange ity Maria ity e, ary nanambarany momba an’i Jesoa ry havana. Andeha anie hiarahantsika mamaky ny Lioka 1 :30-32 : « Ary hoy ilay anjely taminy: Aza matahotra, ry Maria, fa efa nahita fitia tamin’ Andriamanitra hianao. Ary, indro, hitoe-jaza hianao ka hiteraka zazalahy, ary ny anarany dia hataonao hoe Jesosy. Izy ho lehibe ka hatao hoe Zanaky ny Avo Indrindra; ary Jehovah Andriamanitra hanome Azy ny seza fiandrianan’ i Davida rainy ». Mba mahita fahagagana ohatran’izany ihany i Maria ry havana o, momba an’i Jesoa, nefa tsy mino Azy izy. Ary ireto rahalahiny ara-nofo ireto koa, tsy nino an’i Jesoa ; any amin’ny Jaona 7 :35 milaza an’izany mazava : ireo rahalahiny dia tsy nino Azy nefa mba nahare an’izany fahagagana izany ihany.

Fa misaotra an’Andriamanitra ry havana, ny amin’ny fahasoavany, fa rehefa jerena ny tantaran’i Maria, rehefa jerena ny tantaran’i Maria, dia izy ilay teo am-pototry ny hazo fijaliana, raha nohombohona teo amin’ny hazo fijaliana Jesoa ry havana ; ary taorian’izay, nony maty Jesoa, dia izy mb anaisan’ny niaraka tamin’ireo mpianatra 120 nandeha niara-nivavaka taminy tao amin’ilay efitra avo ry havana o : nivavaka tamin’i Jesoa i Maria, niova tamin’ilay tsy finoany izy ry havana o. Ary anisan’ny rahalahin’i Jesoa ry havana, anisan’ny rahalahin’i Jesoa i Jakoba, izay mba lazaina fa tsy nino Azy koa tamin’ny fahavelon’i Jesoa ; fa taty aoriana izy, lasa lohan’ny Fiangonana, mpitondra ny Fiangonana tao Jerosalema. Ary Jaboka no nanoratra an’ilay hoe Epistily ho an’i Jakoba, izay ao amin’ny Baiboly ry havana o. Ry havana o, sao dia ianao io kristiana any ala-trano io ? Ny mahavariana ahy ry havana, rehefa le mandeha mitoriteny any ivelany ireny, dia amin’ilay fotoanan’ny toriteny, ilay diakona dia ao an-tokotany ao, tena marina ara-bakiteny ilay hoe : ao ala-trano. Dia gaga ny olona rehefa mivavaka ato Isotry Fitiavana : fa maninona hoy izy ny diakona no hanokanana toerana manokana ohatran’izao ? Tsotra hoy aho ny antony tompoko : satria ilay diakona, eo izy vao mba mandre tenin’Andriamanitra, eo izy vao mba miangona, amin’ilay volana maha- service azy, dia eo izy no mba mandre tenin’Andriamanitra. Fa raha mijanona any ala-trano izy, tsisy toriteny vanona ; raha mijanona any ala-trano izy, tsisy fampieritreretana, nefa olona hiara-hitaiza ny Fiangonana amin’ny Mpitandrina. Jesoa eto mampianatra ry havana, ny havany any ala-trano : sao dia ianao ry havana no malaina amin’ireny hoe cellule de prière, étude biblique any amin’ny Fiangonana misy anao ireny ? Miresaka aminareo vahiny satria fantatro fa be vahiny. Fa rehefa vita ny toriteny, rehefa vita ny cellule de prière, rehefa vita ny EB dia miditra ianao, miditra avy any ala-trano. Mety tahaka an’i Maria ianao, mahalala zavatra mahagaga ao amin’ny Baiboly ry havana o, mety tahaka an-dry Jakoba ianao, tena akaiky an’i Jesoa ara-nofo, fa lavitra Azy ara-panahy, satria any ala-trano ianao. Tahaka ny nanovan’ny fahasoavan’Andriamanitra an’i Maria sy ireo rahalahin’i Jesoa ry havana o, izany no ahatongavanao eto amin’izao maraina izao, fa te hanova anao Jesoa, te hanova anao Izy : tsy tiany hitoetra any ala-trano intsony ianao, tsy tiany hitoetra any ala-trano intsony ianao, fa tiany ianao ho mpiditra ao am-piangonana, ho mpihaino Azy, mpipetraka eo an-tongony ry havana.

Ny fahamarinana fahatelo farany an, eo amin’ny and.34 sy 35 : « Ary nony nijery izay nipetraka manodidina Azy Izy, dia hoy Izy: Indreo ny reniko sy ny rahalahiko! Fa na iza na iza no manao ny sitrapon’ Andriamanitra, dia izy no rahalahiko sy anabaviko ary reniko ». Ny rahalahin’i Jesoa, ny anabavin’i Jesoa : mpanao ny sitrapon’Andriamanitra ry havana o. Alaivo sary ny an-tsaina ny hahatairan’ilay olona nirahin’i Jesoa : izy izany mba ohatrany hoe seriserina sy faly ery hiakatra ety amin’ny pilopitra, hiteny amin’i Jesoa : « ao ala-trano ao ny reninao sy ny rahalahinao mitady Anao ». Mamaly azy Jesoa, mamaly azy tampoka Jesoa : « fa iza no rahalahiko ? Iza no anabaviko ? Iza no reniko ? ». Mety ho gina ihany ilay namana teo an. En plus, hoe Jesoa jiosy ; tena hoe ho an’ny rehetra izany reny sy ankohonana izany, tena hoe sarobidy, fa ho an’ny jiosy izany reny izany tena tokony hajaina fatratra ry havana o ; an an an, reniko ara-nofo ireo, rahalahiko ara-nofo ireo, fa ny tena reniko, ny tena rahalahiko, ny tena anabaviko, dia izay manao ny sitrpon’ny Raiko any an-danitra. Ny olona tena akaiky Ahy indrindra, ny olona tena akaiky Ahy indrindra dia ny olona manao ny sitrapon’ny Raiko any an-danitra. Akaiky Ahy izy ety an-tany, akaiky Ahy izy any an-danitra, satria araka ilay teny efa haintsika tsara hoe : « Tsy izay rehetra manao amiko hoe: Tompoko, Tompoko, no hiditra amin’ ny fanjakan’ ny lanitra, fa izay manao ny sitrapon’ ny Raiko Izay any an-danitra ». Toriteny atao ho an’ny olona te handova ny lanitra izao toriteny izao ry havana o. Ary rehefa mijery Jesoa, ireo hoy Izy, ny rahalahiko sy anabaviko ary reniko : manao ny sitrapon’Andriamanitra. Ireo, ireo, satria ireo no nahafoy ny zavatra rehetra hanarahina Ahy, nahafoy ny zavatra rehetra hanarahana Ahy. Ianao ve efa mba nahatsiaro nahafoy ry havana ? Ankoatra an’ilay fanomezana rakitra mahazatra, efa nahatsiaro nahafoy, nanome fanomezana ianao ka manana endrika sacrifice ho anao iny fanomezana ho an’i Jesoa iny? Izany ny olona hiasan’ny Fanahy Masina ry havana o, izany ny zandry kelin’i Jesoa. Ary iny zavatra hikifiranao iny nefa tsy foinao satria sacrifice, tsy iny anie no hampiditra anao any an-danitra e, tsy iny anie no hampiditra anao any an-danitra e. Izay ilay izy ry havana ; fa ny olona manao ny sitrapon’Andriamanitra, ny rahalahin’i Jesoa, zandrikelin’i Jesoa : faran’izay tsotra : manokatra Baiboly izy, dia izay zavatra vakiany ao an, ka tenenin’i Jesoa, dia ataony. Manokatra Baiboly izy : izay lalana anirahan’i Jesoa azy dia hizorany. Fa tsy be fanontaniana izy hoe : « ka zao ka, ka zao ka, ka zao ka… tsy mety amiko izany ka ». Tsy fomban’ny olona te handova ny lanitra izany ry Fiangonana malala o. Mianara, mianara mamaky Baiboly ry havana, bebe kokoa noho ny tamin’izay lasa izay, hahitanao ao ny projet personnel de vie ho anao. Fa ianao ry havana tsy ahita an’izany sitrapon’Andriamanitra izany ianao raha tsy manokatra Baiboly ; tsy hanambara an’izany Izy. Fa manana programa-na fahasambarana ho anao Andriamanitra ry havana, fa izao : sokafy ny Baiboly dia ankatoavy io Baiboly io. Niresaka an’i Jakoba isika teo, ilay rahalahin’i Jesoa, ilay tsy nino Azy : jereo anie ny zavatra soratany e : Jakoba 1 :22-25 : « Fa aoka ho mpankatò ny teny hianareo, fa aza mpihaino fotsiny ihany ka mamitaka ny tenanareo. Fa raha misy mpihaino ny teny, nefa tsy mpankatò, dia toy ny olona mizaha ny tarehiny eo amin’ ny fitaratra izy; fa mijery ny tenany izy, dia lasa, ary miaraka amin’ izay dia hadinony ny tarehiny. Fa izay mandinika ny lalàna tanteraka, dia ny lalàn’ ny fahafahana, ka maharitra amin’ izany, raha tsy mpihaino manadino, fa mpanao ny asa, dia ho sambatra amin’ ny asany izany olona izany ». Tsy fahateren-tsaina anie ry havana o, tsy fanakanana anao hiaina anie izany hoe : ankatoavy ny tenin’Andriamanitra e. Izany ny laklen’ny fahasambarana hoy Jakoba rahalahin’i Jesoa rehefa nino Azy izy ka nanoratra an’ity Epistily ho an’i Jakoba ity. Sokafy ny Baiboly, diniho ny Baiboly, karohy ao ny sitrapon’Andriamanitra ho anao.

Nahafinaritra ny tenin’ilay rangahy antsoina hoe Livingston, evanjelista nalaza tamin’ny faha-19 taona, anglisy izy io, ary ny saha tena nanirahan’ny Tompo azy an, tany Afrika, any amin’ilay tena hoe faritra maizina, hanjakan’ny aizina ara-panahy indrindra. Dia hoy Livingston rehefa notenenin’ny mpiray tanindrazana taminy, anglisy hoe : fa inona no ataonao aty ? Dia hoy Livingston ry havana: azonao ve, aleoko hoy izy, aty amin’ny fin fond de l’Afrique aty satria izay no sitrapon’Andriamanitra ho ahy, toy izay hoe roi d’Angleterre, nefa tsy sitrapon’Andriamanitra ho ahy izany hoe ho roi d’Angleterre izany. Izany ny olona mitady ny programan’Andriamanitra, programa mahasambatra azy ry havana o. Dia miteny aminao ny Tompo anio : karohy, karohy ao amin’ny Baiboly manomboka izao e, ny programan’Andriamanitra ho anao, ary miomana hankato an’izany programan’Andriamanitra ho anao izany. Ary Izy koa tsy hanambara aminao ilay programa raha fantany hoe manana fo sy toe-po tsy hankatoa akory ianao ry havana o. Fa miandry anao any an-danitra ny Tompo, ary manome anao ny Fanahy Masina Izy hitarika anao amin’ny marina rehetra. Misy an’ilay mpihira izay izao, nalaza be izy izay, efa 75 taona, ilay Julio Iglesias ; nalaza be izy io, dia naditra vehivavy be izy io. Dia nisy lehilahy izy efa nitory azy am-polo taonany maro hoe izaho hoy izy zanak’i Julio Iglesias, fa hoe tsy afaka ni-prouvé izy. Dia tamin’ny farany teo izy an, niverina notsaraina, satria naninona ? Afaka ni-prouvé izy hoe ny ADN-ny, ny ADN-ilay zanaka nitory io izany, mitovy amin’ny ADN zanak’i Julio Iglesias hafa ; hoe tena zanak’i Julio Iglesias izy izany. Ry havana, io Fanahy Masina io no toy ny mametraka ato amiko ato ny ADN-Jesoa Kristy, ary avelao Izy hiasa hampitombo anao isan’andro isan’andro amin’ny fankatoavana, hampitombo anao isan’andro isan’andro amin’ny fanahafana an’i Jesoa Kristy, ho fahasambaranao ety an-tany e, ary ho fahasambaranao mandrakizay amin’ilay segondra hialanao eto amin’ity tany ity.

Ho aminao ny fahasoavan’ny Tompo. Amena               

« Tompo o, ankehitriny ny mpanomponao dia alefanao amin'ny fiadanana araka ny teninao ». Lioka 2 :29

Misaotra ny Tompo isika ry havana, fa amin’izao Alahady voalohany handidian’ny Tompo antsika FJKM izao hoe : Meteza fenoin’ny Fanahy Masina, dia ity tantaran’i Simeona, lehilahy tena feno ny Fanahy Masina no omena ho ohatra ho antsika.

Rehefa miteny ny and.25 hoe : « Ary, indro, nisy lehilahy atao hoe Simeona », tsy tena marina ilay dikanteny protestanta ; ny nandikana an’io dia hoe : « nisy olona atao hoe Simeona ». Tsy hoe lehilahy ny any amin’ny teny grika fa hoe anthropos, hoe olombelona. Izany hoe, Simeona eto dia izaho sy ianao, izaho lehilahy, ianao vehivavy koa izany. Ho antsika mianakavy ity hafatra ity fa tsy hoe ho an’ny lehilahy ihany. Simeona eto dia fitaratra ry havana o. Rehefa handre isika ny zavatra rehetra lazaina momba an’i Simeona, ary tsy misy afa-tsy ohatra tsara, dia afaka manontany tena isika mianakavy hoe : ary izaho kosa, izaho kosa, mba manao ahoana ? Izay ilay izy ry havana o.

Fanamarihina voalohany mialohan’ny hidirana amin’ny tena votoatin-kafatra : « Tompo o, ankehitriny ny mpanomponao dia alefanao amin'ny fiadanana » : Ilay mpanompo ry havana, natahotra ny misionera nandika ny Baiboly protestanta ; fa raha ny teny grika adika ara-bakiteny : « Tompo o, ankehitriny ny andevonao dia alefanao amin'ny fiadanana ». Ity Lioka 2 :29 ity izany ry havana dia azo lazaina hoe tenin’ny andevo. Ilay toriteny androany, dia hoe : TENIN’NY ANDEVO. Ry Fiangonana o, ry Fiangonana o : MIANARA IANAO TENIN’NY ANDEVO, MIANARA IANAO FITENIN’NY ANDEVO, DIA NY ANDEVON’I JESOA, TAHAKA AN’I SIMEONA ry havana o. Raha te handova ny lanitra ianao, izay ilay ohatra omen’i Simeona hoe : mianara e, mianara fitenin’ny andevo. Fa ny andevo no miteny hoe : « Tompo o, ankehitriny izaho mpanomponao, izaho andevonao, dia alefanao amin'ny fiadananao ». Ry havana o, tsy rehefa maty ilay olona, tsy rehefa mitsitra eto ilay olona vao hivavabavaka ianao hoe : «  mandria am-piadanana ». Izaho ianao, raha te ho any an-danitra ianao, hiditra amin’izany fiadanan’Andriamanitra izany, no mianatra izany fitenin’ny andevo izany. Ary Simeona afaka nanao fitenin’andevo satria manana toe-panahin’ny andevo, manana toe-pon’ny andevo, ary dia afaka miteny hoe : « ankehitriny ny mpanomponao dia alefanao ». Izany no ahafantarana hoe lehilahy feno ny Fanahy Masina. Mety ho azonao anie io e, hoe hay ve izany no dikan’io hoe resaka andevo io hoe : « ankehitriny ny mpanomponao dia alefanao amin'ny fiadanana » e. Fa jamais ianao hiaina an’izany toe-po sy toe-panahin’ny andevo handova ny lanitra izany raha tsy fenoina ny Fanahy Masina ry havana o.

Izay no hafatra ho antsika : METEZA HO FENOIN’NY FANAHY MASINA ARY ASEHOY IZANY AMIN’NY FAHAIZANAO MITENY FITENIN’NY ANDEVO. RESAKA FITENIN’ANDEVO.

Inona ary ny toetra voalohany asongadin’ny Fanahy Masina amin’ity Simeona ity ry havana ? And. 25 : « Ary, indro, nisy lehilahy atao hoe Simeona tao Jerosalema; ary marina sady mpivavaka tsara izany lehilahy izany ka niandry ny fampiononana ny Isiraely; ary ny Fanahy Masina dia tao aminy ». Lehilahy feno ny Fanahy Masina i Simeona ka lazaina hoe marina, mpivavaka tsara, ary niandry ny fampiononana ny Isiraely, izany hoe niandry an’i Jesoa Kristy. Lehilahy marina : ilay marina eto ry havana dia tsy dia azo voasana satria tsy azo ivalamparana ny fotoana, fa ilay hoe marina ry havana dia faran’izay tsotra : lehilahy tsy mba manao zavatra hafahafa. Lehilahy mahatoky, ka tsy mba manao zavatra hafahafa. Izany i Simeona ary asan’ny Fanahy Masina ao aminy izany. Dia eo isika mandinin-tena : izaho ve eo amin’ny ankohonako, eo amin’ny fiaraha-monina, izaho ve ao amin’ny fitondrana firenena ry havana o, ary izany no ilain’ity firenena ity, izany koa no ilain’ny Fiangonana, lehilahy marina, olona marina, olona mahatoky, tsy manao zavatra hafahafa ? Dia tohizan’ny Soratra Masina ilay filazana momba an’i Simeona hoe mpivavaka tsara. Ilay hoe mpivavaka tsara, tsy ilay olona ohatran’ny sasany hoe fatra-panaraka fombam-pivavahana, non. Fa ilay mpivavaka tsara dia olona tena hoe fatra-pitandrina tsara tsy ho diso eo anatrehan’Andriamanitra. Izany ny olona feno ny Fanahy Masina, ohatran’i Simeona ry havana o. Ary izany ny olona handova ny lanitra. Izay anie ny resaka eto e :  olona manana fitenin’andevo, feno ny Fanahy Masina ka handova ny lanitra. Ary dia hoe, amin’izay atao, hatramin’ny zavatra madinika indrindra, mba tsy ho diso eo anatrehan’Andriamanitra. Marina, tsy manao zavatra hafahafa ; mpivavaka tsara ; mikendry ny tsy hahadiso eo anatrehan’Andriamanitra ; ary farany : miandry ny fampiononana ny Isiraely. Miandry ny fampiononana : ny fampiononana, dia araka izany teny izany dia hoe olona mila ampaherezina, mila ampihononina fa anaty fahoriana. Ny fiainantsika ety ambonin’ny tany dia fiainana tsy ilaozam-pahoriana ry havana o. Ary adalan’izay olona hoe te handeha irery, tsy mila mpampionona, dia Jesoa Kristy izany. Fa maninona no tsindrin’ny Soratra Masina ry havana ity toetran’i Simeona hoe niandry, naharitra niandry, nahavatra niandry ny fampiononana ny Isiraely ? Raha eto amin’ny tantaran’i Simeona eto di efa hoe nambaran’ny mpaminany ombieny ombieny fa ho avy ny Mesia, ho avy Kristy, ho avy ilay fampiononana ny Isiraely, eo Simeona, mandinika ny tantaran’Isiraely izy, 400 taona Andriamanitra nangina, nahakivy an-draolombelona. Nahakivy : aiza ity Andriamanitra ity e ? Aiza izay fanatanterahana ny teny fampanantenana nomeny e ? Fa Simeona ry havana o, naharitra niandry.

Nahafinaritra ilay fanamarihana nataon’ny mpandinika hoe Jesoa io tsy nipoitra poitra fotsiny tamin’izao, fa fanatanterahana faminaniana momba Azy io fahatongavan’i Jesoa io ry havana. Dia hoy ilay mpandinika hoe izany bouddah izany, 500 taona à peu près talohan’i Jesoa Kristy, nipoitra teny izy, raha izay no fitenenana. Izany mahomet izany, raha hoe ny fitenenana 500 taona taorian’i Jesoa Kristy, nipoitra teny izany ; fa Jesoa Kristy nialohavan’ny faminaniana tsy latsaky ny 300 isa fa tsy hoe nipoipoitra teny tahaka an’i bouddah na mahomet ry havana o. Ary dia hoe Simeona nahavatra niandry, nahavatra niandry. Ary rehefa hitany Jesoa tao amin’ny tempoly dia noraisiny.

Izay ry havana ny fahamarinana voalohany, ho an’ny olona hoe feno ny Fanahy Masina : tarihin’ny Fanahy Masina izy ho amin’ny toe-po, toe-panahy marina, mivavaka tsara, ary hoe miandrandra an’i Jesoa amin’ny lafim-piainany rehetra, miandrandra famonjena, miandrandra fampiononana.

Misy olona ato mila an’izany fampiononana izany, niala tany an-trano problema, hiverina any an-trano problema. Ho anao no hitenenan’ny Tompo hoe : Izaho eto hampionona, Izaho eto hampahery.

Ny fahamarinana faharoa momba an’i Simeona ry havana dia izao : and.26 : « Ary efa nambaran'ny Fanahy Masina taminy fa tsy hahita fahafatesana izy mandra-pahitany ny Kristin'ny Tompo ». Tao amin’i Simeona, nitoetra tao aminy. Adino, fa  araka ilay perikopa teo, io Fanahy Masina tao amin’i Simeona io anie ry havana, lazain’i Paoly mazava tsara any amin’ny 1 Korintiana 6 : 19 hoe : « Ahoana ary? Moa tsy fantatrareo fa ny tenanareo dia tempolin'ny Fanahy Masina, Izay ao anatinareo sady efa azonareo tamin'Andriamanitra? ka tsy tompon'ny tenanareo ianareo ». Izaho sy ianao, tempolin’ny Fanahy Masina ry havana o. Fa misy olona tsy mahafantatra an’izany. Misy olona tsy mahafantatra hoe araka ny fampianarana tao amin’ny batisa dia hoe efa nasiana tombokase tamin’ny Fanahy Masina : mameno anao izany Fanahy Masina izany, mitarika anao ho amin’izany toetra marina sy ny karazany nolazaina teo izany. Mirakitra hery io ; ary rehefa tsy manana an’izany hery izany ianao tsy hahatanteraka ny sitrapon’Andriamanitra, na ohatran’iny aza ry havana o. Nahafinaritra ny tenin’ny mpitoriteny anankiray izay milaza ny herin’ny Fanahy Masina, mino aho fa maro amintsika mba tsy ilazana hoe isika rehetra mahafantatra ny tantaran’i Astérix sy Obélix. Obélix mitomany rehefa handeha hiady ry zareo : « za koa mba anona » ; «  an an an, ianao efa latsaka tao, efa mahery ianao », izay ilay izy. Fa ny herin’i Obélix iny, tsy misy dikany eo akaikin’ny herin’ny Fanahy Masina, ary ao aminao, ao amintsika ry havana o, izany herin’ny Fanahy Masina izany mba handehanantsika amin’ny fahamarinana, mba ho mpivavaka tsara, ary dia hoe manantena hanana hery haharetana amin’ny fampiononana.

Ny fahamarinana faharoa, and.26 : ny Fanahy Masina ao amintsika io, ankoatra ilay hoe mampahery, ny zavatra lazaina eto dia hoe miteny Izy ary manambara ny sitrapon’Andriamanitra. Ary tsy manambara ny sitrapon’Andriamanitra amin’ny ankapobeany, rehefa miteny hoe ny Fanahy Masina miteny, ny Fanahy Masina manambara : manambara ilay sitrapon’Andriamanitra feno fitiavana sy feno fahasoavana amiko manokana ary aminao. Izany ny ohatr’i Simeona eto ry havana o. Ambarany amin’i Simeona ny programan’Andriamanitra manokana ho an’i Simeona. Firy amintsika mpino, firy amintsika kristiana no afaka milaza hoe izao zavatra ataoko izao dia vokatry ny tari-dalana sy ny fanambarana nomen’Andriamanitra ahy, nomen’i Jesoa ahy tamin’ny alalan’ny Fanahy Masina ? Firy amintsika ry havana ? Firy amintsika ? Andao anie jerentsika ny Salamo 25 :14 : « Ny fisainan'i Jehovah asehony amin'izay matahotra Azy ». Rehefa matahotra Azy ianao, rehefa mitady Azy ohatran’i Simeona ianao ry havana, ambarany aminao ny fisainany. Mahafinaritra ilay dikanteny frantsay Segond amin’io, hoe : « la pensée secrète de l’Eternel est pour  ceux qui le craignent ». Fa maninona ry havana no mihazakazaka mijery gazety isika isan’andro ? Liana te hahalala vaovao, bien sûr. Fa inona ilay article hoe imasoan’ny olona indrindra ? Rehefa eo amin’ny titre an’ilay gazety misy hoe ny zava-miafina ao ambadik’izao, ny secret an’io zavatra io. Iny isika liana ahafantatra secret ry havana. « La pensée secrète de l’Eternel est pour  ceux qui le craignent ». Te hiteny aminao anie ny Fanahy Masina isan’andro e, ianao izay efa nasiana tombokase tamin’ny Fanahy Masina e. Fa tsy raharahanao Izy e, ary dia tsy henoinao ny feony. Fa jereo ny nihainoan’i Simeona ny feony ary nanambaran’Andriamanitra tamin’i Simeona programa manokana dia hoe : ianao indray dia tsy hahita fahafatesana raha tsy mahita an’i Kristy. Jereo kely ilay kilalaon-teny eo : ianao indray dia tsy ahita fahafatesana, izay no voalohany, ianao Simeona tsy ahita fahafatesana raha tsy efa mahita an’i Kristy ianao. Ny firariana ho antsika rehefa mba hoe tonga ny fotoana hahafatesantsika, dia ho marina amintsika tsirairay izany : io mpanompon’Andriamanitra maty io indray, maty izy, nahita fahafatesana izy, fa izaho vavolombelona fa efa nahita an’i Kristy io talohan’ny nahafatesany, ary Kristy no vantaniny any an-danitra. Izany ny fanambarana, izany ny fanambarana ry havana, nambaran’Andriamanitra tamin’ny alalan’ny Fanahy Masina tamin’i Simeona, hoe satria noho ny toe-po sy ny toe-panahinao, dia izao : ampahitako anao Kristy alohan’ny hahafatesanao. Ry Fiangonana o, ataovy vaindohan-draharaha izany hoe hahita an’i Kristy alohan’ny hahafatesanao izany. Tsy miantoka na inona na inona ny maha-diakona, tsy miantoka na inona na inona ny akanjo maha-Pasitera, maha-mpandray, maha-izao sy izao sy izao. Ataovy izay hahitana an’i Kristy ry havana o. Ary tezao ny zanakao e, aza tezaina amin’ny fombam-pivavahana Fjkm, katolika, sy ny karazany : tezao izy hahita an’i Kristy, dia rehefa misaraka ety, azo antoka, any mihaona. Ary ianao io, amin’ny andro ivahiniananao eto amin’ity tany ity, manana message ho anao, manana message ho anao isan’andro isan’andro ny Fanahy Masina ry havana o.

Ny fahamarinana hitantsika teo izany, hoe ny Fanahy Masina mameno, and.25 ; and.26, hoe : ny Fanahy Masina miteny, ny Fanahy Masina manambara. Jerentsika farany ny and.27-29 ry havana. « Ary nentin'ny Fanahy Masina niditra teo an-kianjan'ny tempoly izy; ary rehefa nampidirin'ny ray aman-dreniny Jesoa zaza mba hanaovany araka ny fomban'ny lalàna ny amin'ny zaza, dia nitrotro Azy izy ka nidera an'Andriamanitra nanao hoe: Tompo o, ankehitriny ny mpanomponao dia alefanao amin'ny fiadanana Araka ny teninao ». Andriamanitra ry havana tsy tahaka ny olombelona ka handainga ; fa izay zavatra teneniny dia efainy, ny zavatra ambarany dia tanterahiny. Ary jereo tsara : raisiny an-tanana ilay fiainan’ny mpanompo hitenenany mba hahazoana manatanteraka ilay teny fikasana. And.27 : nentin’ny Fanahy Masina niditra tao amin’ny tempoly i Simeona satria Maria sy Josefa nitondra an’i Jesosy tao ; dia iny koa ny Fanahy Masina niteny tamin’i Simeona : andao ianao, amin’izao ora izao, amin’izao minitra izao, ho any amin’ny tempoly hahazahoan’ny Tompo manatanteraka ny teny fikasana nomeny anao hoe : ianao indray dia tsy hahita fahafatesana raha tsy mahita an’i Kristy. Izay ilay fitondran’Andriamanitra mahagaga, ary mahantra mihitsy isika kristiana izay hoe mivelona, mino, manompo tsy miaraka amin’ny fomban’ny Fanahy Masina ry havana o, nefa efa mba ao anatinao ihany ange e, araka ny tenin’ny Apostoly Paoly teo e, ny  Fanahy Masina e, manatanteraka ny programany Andriamanitra, dia tarihiny any amin’ny toerana hanatanterahiny an’izany Simeona ry havana o. Ary dia voalaza teo : ny Fanahy Masina rehefa mitarika anao, dia mitarika ho any am-piangonana. Ny Fanahy Masina no nitarika anao ato am-piangonana androany ry havana o, ny Fanahy Masina. Ary ny Fanahy Masina koa no mbola te hitarika anao aty am-piangonana amin’ny heriny anio, amin’ny tapa-bolana, amin’ny roa tokom-bolana. Ary milaza aminareo aho, eo anatrehan’ny Tompo, ianareo izay tsy mpiditra am-piangonana, fa izay toerana alehanareo, na aiza na aiza ka tsy aty am-piangonana rehefa Alahady maraina, tsy fitarihin’ny Fanahy Masina izany, tsy ny Fanahy Masina no mitondra anareo any amin’izany toerana izany ; ary mieritrereta ry havana o, fa tsy morale izany, na hoe faneriterena anao izany, fa teny atao amin’ny olona mianatra ny fitenin’ny andevo hoe: « Fanahy Masina o, tariho aho fa izaho rehefa tarihinao dia tiako hotarihinao any an-danitra » ry havana o. Meteza, meteza, meteza ho tarihin’ny Fanahy Masina.

Ary Simeona ry havana, feno ny Fanahy Masina, hitenenan’ny Fanahy Masina, tantanan’ny Fanahy Masina, dia lehilahy, olon’ny vavaka.  Olon’ny vavaka. Vavaky ny andevo, tenin’ny andevo ity Lioka 2 :29 ity. Mianara ny vavaky ny andevo, ary mianara vavaka tsotra izao fotsiny ry havana. Mampieritreritra, misy Université tany Etats-Unis tany, dia nanao expérience, lazaina, fa scientifique moa ilay izy. Hoy izy hoe : any amin-dry zareo Amerikana moa izany, fa mety tsy mifankaiza amin’izany isika malagasy izany, hoy izy hoe à peu près hoy izy an, na ny lahy na ny vavy, 16.000mots isan’andro no avoakan’io vavantsika io. Dia tsy lavina hoy izy fa ny an’ny vehivavy bebe kely kokoa noho izay, fa ny an’ny lehilahy eo amin’ny 16.000 eo. Ok, fa tsy izay no zava-dehibe. Fa ilay fanontaniana ry havana rehefa mamaky zavatra ohatran’izany ianao, dia afaka manontany tena ianao hoe : amin’ireo 16.000mots avoakan’ny vavanao ireo, firy mots no manana endrika vavaka ? Firy mots no manana endrika vavaka ry havana o ? Ary meloka isika mianakavy, manomboka amin’i Pasitera voalohany indrindra. Ny Fanahy Masina anie hitarika antsika e, hanome antsika an’izany hoe fanahin’ny vavaka izany. Ka ho marina amintsika ny tenin’ny Apostoly Paoly any amin’ny Filipiana 4 :6, teny mamy loatra ; atoro antsika ilay fiainana kristiana, omena fitaovana isika, ny Fanahy Masina, fa tsy raharahantsika izany e. Filipiana 4 :6 : « Aza manahy na inona na inona; fa aoka ny fivavahana sy ny fifonana mbamin’ ny fisaorana no ho entinareo manambara ny fangatahanareo amin’ Andriamanitra amin’ ny zavatra rehetra ». Aoka ny fivavahana, aoka ny fifonana, aoka ny fisaorana no entinareo mangataka amin’Andriaman itra ry havana o. Miandry Andriamanitra, miandry Andriamanitra. Manongilan-tsofina Andriamanitra, miandry anao feno ny Fanahy Masina Izy hoe hanandratra vavaka, hanandratra fifonana noho ny fahalainana mivavaka, hanandratra fisaorana noho ny valim-bavaka. Miandy anao Izy, miandry anao Izy ; capable miteny 16.000mots par jour ianao, fa ny ankamaroantsika, mba tsy hitenenana hoe isika mianakavy, dia moana vavaka ry havana o. Tian’ny Tompo ovaina izany ; tian’ny Tompo ovaina izany.

Faranana ry havana izao hafatra izao : mahavariana ry havana ity tenin’i Simeona ity, « Tompo o, ankehitriny » ; ankehitriny satria izaho efa nahita an’i Kristy, ary tsy vitan’ny hoe nahita an’i Kristy tao am-piangonana fotsiny, fa nihazona Azy. Izay manko ny ankamaroan’ny olona : tonga miangona izy, mety mahita an’i Kristy izy, fa tsy mandray Azy ao am-pony ry havana o. Tsy mandray Azy izy amin’ny alalan’ny batisa, mangatak’andro izy hanaovana katekomena sy ny fandraisana ny fanasan’ny Tompo sy ny tahaka an’izany. Fa hoe : ankehitriny aho, hoy Simeona, efa nahita ny fahatanterahan’ny teninao, dia ny nahitako an’i Kristy mpamonjy, ankehitriny izaho mpanomponao dia alefanao amin’ny fiadanana ; ary ilay « alefa » eto, mahavariana ilay teny grika, ilay « alefa » hoe : « délier ». Délier izany, ohatrany hoe mi-délié fatorana kiraro,  mamaha fatotra. Fa nofatorana tamin’inona ry havana ? Tamin’izay namatopatotra antsika tety an-tany, ny zava-mahafinaritra, ny harena be antsika io, ny harena kelintsika io, ny trano be antsika io, ny trano bongontsika io : mamatotra ny fontsika amin’ity tany ity izany e. Fa izao hoe Simeona : misaotra anao aho Ray o, nampahitana an’i Kristy, novahanao aho ankehitriny amin’izany fatorana izany ; tsy misy na inona na inona mamatotra ahy intsony eto amin’ity tany ity, foiko ny zavatra rehetra eto amin’ity tany ity, miandrandra ny tsara lavitra aho, miandrandra izay hahazoako tombony aho, ary efa vonona ho amin’izany aho.

Tsindrina ry havana, satria malagasy fatra-patahotra fahafatesana no hitoriana teny : mianara ry havana o, ny vavaky ny andevo ohatran’i Simeona, ny vavaky ny andevo izay mandova ny lanitra, dia aoka izay ity fitondran-tena adala nenti-paharazana : aoka izay ity hoe mandeha misasasasa ity, aoka izay ity mandika afo ity rehefa avy mandevina, aoka izay ity hoe ny fasanay tsy azo sokafana alohan’ny amin’ny 03 ; fitondran-tena nenti-paharazana ary tsy fomban’ny andevo manantena ny lanitra. Ary tian’ny Tompo ianao matoa teneniny mafy ohatran’izany androany ry havana o. Te hanafaka anao amin’izany ny Tompo, te hanafaka anao amin’izany ; ary dia enga anie isika mianakavy hahita ny Tompo amin’izao maraina izao ary ho tafahoana marina Aminy, dia Izy ilay miteny hoe : « Ny programako ho anao rehefa miala ety ianao, dia ny ho anilako mandrakizay ao an-tranoko » ; fa efa nanamboaran’i Jesoa fitoerana ho amin’izany ianao. Enga anie ka ho izany isika rehetra ary dia ataontsika vaindohan-draharaha manomboka anio ry havana, izany hoe ho fenoin’ny Fanahy Masina izany. Angataho e, angataho e : « Ray o, mifoha maraina aho izao, dia mangataka Aminao, zavatra tsy nataoko hatramin’izany : fenoy aho e, fenoy aho e, fenoy aho e, fenoy ny Fanahy Masina aho e ; ampaherezo aho isan’andro, fantatrao ny programme-ny journée-ko, ao ny fantatro, ao ny fantatrao izay hitarihinao ahy ; omeo tari-dalana aho, omeo fanambarana aho tahaka ny nanomezanao fanambarana an’i Simeona, ary dia aoka ahafantatra mazava aho hoe eo amin’ny fanatrehanao ao anatin’ny andro manontolo, ka rehefa tonga, tahaka ny an’i Simeona, ny andro hialako ety, dia ho eo amin’ny fanatrehanao mandrakizay aho ».

Ho aminareo ny fahasoavan’ny Tompo. Amena